Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 87: Gbekɛ Yesu yɛ Sɔlemɔwe Lɛ

Biblia Mli Sane 87: Gbekɛ Yesu yɛ Sɔlemɔwe Lɛ

KWƐMƆ gbekɛ nuu fioo ni kɛ hii onukpai nɛɛ wieɔ lɛ. Tsɔɔlɔi ji amɛ yɛ Nyɔŋmɔ sɔlemɔwe lɛ yɛ Yerusalem. Ni gbekɛ nuu lɛ ji Yesu. Éda fioo agbɛnɛ. Amrɔ nɛɛ eye afii 12.

Tsɔɔlɔi lɛ anaa ekpɛ amɛhe waa akɛ Yesu le Nyɔŋmɔ he nii kɛ nibii ni aŋmala yɛ Biblia lɛ mli lɛ babaoo nakai. Shi mɛni hewɔ Yosef kɛ Maria bɛ biɛ lɛ? Nɛgbɛ amɛyɔɔ? Ha wɔtao mli wɔkwɛ.

Gbekɛ nuu fioo Yesu ni kɛ tsɔɔlɔi lɛ miiwie

Daa afi lɛ Yosef kɛ eweku lɛ baa Yerusalem kɛha gbijurɔyeli krɛdɛɛ ni atsɛɔ lɛ Hehoo lɛ. Gbɛfãa kɛjɛ Nazaret kɛbaa Yerusalem lɛ jɛkɛ waa. Mɔ ko mɔ ko bɛ kar, ni oketeke hu bɛ. Amɛbɛ eko yɛ nakai bei lɛ amli. Mɛi pii nyiɛɔ, ni eheɔ amɛ aaafee gbii etɛ dani amɛshɛɔ Yerusalem.

Agbɛnɛ, Yosef weku lɛ eda agbo. No hewɔ lɛ Yesu yɛ nyɛmimɛi hii kɛ yei bibii ni esa akɛ akwɛ amɛ. Ojogbaŋŋ, afi nɛɛ Yosef kɛ Maria kɛ amɛbii lɛ fɛɛ eku amɛsɛɛ kɛmiifã gbɛ kakadaŋŋ lɛ kɛmiiya shia yɛ Nazaret. Amɛsusu akɛ Yesu kɛ mɛi krokomɛi lɛ etsɔ hiɛ kɛmiiya. Shi beni je na ni amɛyawa yɛ he ko lɛ, amɛna akɛ amɛnaaa Yesu. Amɛtao lɛ yɛ amɛwekumɛi kɛ amɛnanemɛi lɛ ateŋ, shi efataaa amɛhe! No hewɔ lɛ amɛku amɛsɛɛ kɛtee Yerusalem koni amɛyatao lɛ yɛ jɛmɛ.

Yɛ naagbee lɛ amɛna Yesu kɛ tsɔɔlɔi lɛ yɛ biɛ. Eebo amɛ toi, ni eebibii amɛ saji. Ni gbɔmɛi lɛ fɛɛ anaa ekpɛ amɛhe yɛ bɔ ni Yesu le nii lɛ hewɔ. Shi Maria kɛɛ akɛ: ‘Mibi, mɛɛba ni ofee wɔ nɛkɛ? Otsɛ kɛ mi fɛɛ etao bo kɛ awerɛho sɔŋŋ.’

Yesu here lɛ nɔ akɛ: ‘Mɛɛba ni nyɛtaoɔ mi? Ani nyɛleee akɛ esa akɛ mihiɔ shi yɛ mi-Tsɛ shia lɛ?’

Hɛɛ, Yesu sumɔɔ ni ehi he ni ebaanyɛ ekase Nyɔŋmɔ he nii yɛ. Ani jeee nɛkɛ esa akɛ wɔ hu wɔnu he? Beni amɛyɔɔ shia yɛ Nazaret lɛ, Yesu yaa kpeei kɛha jamɔ daa otsi. Akɛni eboɔ sane toi jogbaŋŋ be fɛɛ be hewɔ lɛ, ekase nibii pii kɛjɛ Biblia lɛ mli. Ha ni wɔtamɔ Yesu ni wɔnyiɛ enɔkwɛmɔ nɔ lɛ sɛɛ.

Luka 2:41-52; Mateo 13:53-56.



Sanebimɔi

  • Kɛ́ okwɛ mfoniri lɛ mli lɛ, afii enyiɛ Yesu eye, ni nɛgbɛ eyɔɔ lɛ?
  • Mɛni Yosef kɛ eweku lɛ feɔ daa afi?
  • Mɛni hewɔ Yosef kɛ Maria ku amɛsɛɛ kɛtee Yerusalem ekoŋŋ yɛ gbi kome sɛɛ be mli ni amɛfãa gbɛ kɛyaa shia lɛ?
  • Nɛgbɛ Yosef kɛ Maria na Yesu yɛ, ni mɛni hewɔ gbɔmɛi ni yɔɔ jɛmɛ lɛ anaa kpɛ amɛhe lɛ?
  • Mɛni Yesu kɛɛ enyɛ Maria?
  • Mɛɛ gbɛ nɔ wɔbaanyɛ wɔfee tamɔ Yesu yɛ Nyɔŋmɔ he nikasemɔ mli?

Sanebimɔi ni fata he

  • Kanemɔ Luka 2:41-52.

    Eyɛ mli akɛ Mla lɛ biɔ ni hii pɛ aya daa afi gbii juji lɛ ashishi moŋ, shi mɛɛ nɔkwɛmɔnɔ kpakpa Yosef kɛ Maria fee kɛha fɔlɔi ŋmɛnɛ? (Luka 2:41; 5 Mose 16:16; 31:12; Abɛi 22:6)

    Yesu fee nɔkwɛmɔnɔ kpakpa kɛha gbekɛbii ni yɔɔ ŋmɛnɛ lɛ koni amɛba amɛhe shi amɛha amɛfɔlɔi yɛ mɛɛ gbɛ nɔ? (Luka 2: 51; 5 Mose 5:16; Abɛi 23:22; Kol. 3:20)

  • Kanemɔ Mateo 13:53-56.

    Mɛɛ Yesu heloonaa nyɛmimɛi hii ejwɛ atsĩ amɛgbɛi atã yɛ Biblia lɛ mli, ni sɛɛ mli lɛ akɛ amɛteŋ mɛi enyɔ tsu nii yɛ Kristofoi asafo lɛ mli yɛ mɛɛ gbɛ nɔ? (Mat. 13:55; Bɔf. 12:17; 15:6, 13; 21:18; Gal. 1:19; Yak. 1:1; Yuda 1)