Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 101: Ágbe Yesu

Biblia Mli Sane 101: Ágbe Yesu

KWƐMƆ yiwalɛ nii ni yaa nɔ nɛɛ! Aagbe Yesu. Amɛsɛŋ lɛ yɛ tso nɔ. Akala plɛkooi awo eniji kɛ enaji amli. Mɛni hewɔ mɛi komɛi baasumɔ ni amɛfee Yesu nɛkɛ?

Yesu ni miigbo

Nɔ hewɔ ji akɛ, gbɔmɛi komɛi nyɛ̃ɔ Yesu. Ani ole gbɔmɛi ni amɛji? Amɛteŋ mɔ kome ji bɔfo ni yitsoŋ wa ni ji Satan Abonsam lɛ. Lɛ ji mɔ ni haaa Adam kɛ Hawa abo Yehowa toi lɛ. Ni Satan ji mɔ ni ha Yesu henyɛlɔi lɛ fee nɛkɛ yiwalɛ nii nɛɛ.

Shi dani abaakala Yesu akpɛtɛ biɛ yɛ sɛŋmɔtso nɛɛ nɔ lɛ, ehenyɛlɔi lɛ fee lɛ nibii fɔji pii. Ani okaiɔ bɔ ni amɛba Getsemane abɔɔ lɛ mli ni amɛbamɔ lɛ kɛtee lɛ? Namɛi ji nakai ehenyɛlɔi lɛ? Hɛɛ, amɛji jamɔ mli hiɛnyiɛlɔi lɛ. Ojogbaŋŋ, nyɛhaa wɔkwɛa nɔ ni tee nɔ agbɛnɛ.

Beni jamɔ mli hiɛnyiɛlɔi lɛ mɔ̃ Yesu kɛtee lɛ, ebɔfoi lɛ jo foi. Amɛshi Yesu pɛ kɛ ehenyɛlɔi lɛ, ejaakɛ amɛmiishe gbeyei. Shi bɔfo Petro kɛ bɔfo Yohane eyaaa shɔŋŋ. Amɛnyiɛ amɛsɛɛ koni amɛna nɔ ni baaba Yesu nɔ.

Osɔfoi lɛ kɛ Yesu tee nuumo ni atsɛɔ lɛ Hana, ni tsutsu ko lɛ eji osɔfonukpa lɛ ŋɔɔ. Asafo babaoo lɛ etsɛɛɛ tsɔ yɛ biɛ. Kɛkɛ ni amɛkɛ Yesu tee Kaiafa shia lɛ, mɔ ni no mli lɛ, lɛ ji osɔfonukpa lɛ. Jamɔ mli hiɛnyiɛlɔi pii ebua amɛhe naa yɛ eshia lɛ.

Biɛ yɛ Kaiafa shia lɛ ji he ni amɛbakojo lɛ yɛ. Amɛkɛ gbɔmɛi ba biɛ koni amɛbamale amɛshi Yesu. Jamɔ mli hiɛnyiɛlɔi lɛ fɛɛ kɛɛ akɛ: ‘Esa akɛ agbe Yesu.’ Kɛkɛ ni amɛfɛ̃ lajɔ̃ amɛshwie ehiɛ, ni amɛfimɔ atswɛrɛ amɛkɛshimɔ lɛ.

Beni enɛɛmɛi fɛɛ yaa nɔ lɛ, no mli lɛ Petro yɛ agbó lɛ naa. Je ena ni fɛ̃i miiye, no hewɔ lɛ gbɔmɛi lɛ shɛre la. Beni amɛwereɔ la lɛ koni amɛhe adɔ lɛ, gbekɛ yoo tsulɔ ko kwɛ Petro, ni ekɛɛ: ‘Nɛkɛ nuu nɛɛ hu fata Yesu he.’

Petro ha hetoo akɛ: ‘Dabi, mifataaa ehe!’

Gbɔmɛi bakɛɛ Petro shii etɛ sɔŋŋ akɛ efata Yesu he. Shi be fɛɛ be lɛ, Petro kɛɔ akɛ ejeee anɔkwale. Beni Petro kɛɛ nakai nɔ ni ji shii etɛ nɔ lɛ, Yesu tsɔ̃ ehe ni ekwɛ lɛ. Edɔ Petro waa akɛ emale yɛ gbɛ ni tamɔ nɛkɛ nɔ, ni eje kpo ni eyafó.

Beni hulu teɔ shi yɛ Sohaa leebi lɛ, osɔfoi lɛ kɛ Yesu tee amɛkpeehe wulu lɛ, he ni atsɛɔ lɛ Akuashɔŋ lɛ. Biɛ ji he ni amɛbawie nɔ ni amɛbaafee lɛ lɛ he yɛ. Ni amɛkɛ lɛ tee Pontio Pilato, ni ji nɔyelɔ ni kwɛɔ Yudea kpokpaa lɛ nɔ lɛ hiɛ.

Osɔfoi lɛ kɛɛ Pilato akɛ: ‘Gbɔmɔ fɔŋ ji nuu nɛɛ. Esa akɛ agbe lɛ.’ Beni Pilato ebi Yesu saji sɛɛ lɛ, ekɛɛ akɛ: ‘Minaaa akɛ efee nɔ fɔŋ ko.’ Kɛkɛ ni Pilato kɛ Yesu tee Herode Antipa ŋɔɔ. Herode ji nɔyelɔ ni kwɛɔ Galilea nɔ, shi Yerusalem ji he ni eyɔɔ. Herode hu enaaa akɛ Yesu efee nɔ fɔŋ ko, no hewɔ lɛ ekɛ lɛ ku sɛɛ kɛba Pilato ŋɔɔ ekoŋŋ.

Pilato miitao ni eha Yesu aya. Shi Yesu henyɛlɔi lɛ miitao ni aŋmɛɛ gbokɛlɛfonyo kroko moŋ he ni eya. Nuu nɛɛ ji julɔ ni atsɛɔ lɛ Baraba lɛ. Agbɛnɛ eehe eshɛ shwane fintii beni Pilato kɛ Yesu je kpo lɛ. Ekɛɛ gbɔmɛi lɛ akɛ: ‘Naa! Nyɛ maŋtsɛ lɛ!’ Shi osɔfonukpai lɛ bolɔ waa akɛ: ‘Nyɛkɛ lɛ ayaa! Nyɛyagbea lɛ! Nyɛyagbea lɛ!’ No hewɔ lɛ Pilato ŋmɛɛ Baraba he, ni amɛmɔ Yesu kɛtee koni amɛyagbe lɛ.

Mra mli yɛ Sohaa shwane mli ni akala Yesu akpɛtɛ sɛŋmɔtso nɔ. Onaaa amɛ yɛ mfoniri lɛ mli, shi asɛŋ ojotswalɔi enyɔ hu yɛ tso nɔ yɛ Yesu masɛi biɛ kɛ biɛ koni amɛgboi. Beni eshwɛ fioo ni Yesu baagbo lɛ, ojotswalɔi lɛ ateŋ mɔ kome kɛɛ lɛ akɛ: ‘Kɛji oba omaŋtsɛyeli lɛ mli lɛ kaimɔ mi.’ Ni Yesu here lɛ nɔ akɛ: ‘Miiwo bo shi akɛ okɛ mi baahi Paradeiso.’

Ani enɛ jeee shiwoo ni yɔɔ naakpɛɛ? Ani ole paradeiso ni Yesu wieɔ he lɛ? Nɛgbɛ ji he ni paradeiso ni Nyɔŋmɔ fee kɛjɛ shishijee lɛ yɔɔ? Hɛɛ, yɛ shikpɔŋ lɛ nɔ. Ni beni Yesu baaye nɔ akɛ maŋtsɛ yɛ ŋwɛi lɛ, ekɛ nuu nɛɛ baaba wala mli ekoŋŋ koni ebana Paradeiso hee lɛ mli ŋɔɔmɔ yɛ shikpɔŋ nɛɛ nɔ. Ani wɔnaŋ enɛ he miishɛɛ?

Mateo 26:57-75; 27:1-50; Luka 22:54-71; 23:1-49; Yohane 18:12-40; 19:1-30.



Sanebimɔi

  • Namɔ ji mɔ titri ni ha agbe Yesu lɛ?
  • Mɛni bɔfoi lɛ fee be ni jamɔ mli hiɛnyiɛlɔi lɛ bamɔ Yesu kɛtee lɛ?
  • Mɛni ba yɛ osɔfonukpa Kaiafa shia lɛ?
  • Mɛni hewɔ Petro je kpo ni eyafó lɛ?
  • Be ni akɛ Yesu ku sɛɛ kɛba Pilato ŋɔɔ ekoŋŋ lɛ, mɛni osɔfonukpai lɛ bolɔ amɛkɛɛ?
  • Mɛni ba Yesu nɔ mrã mli yɛ Sohaa shwane mli, ni mɛɛ shiwoo Yesu kɛha efɔŋfeelɔ ni asɛŋ lɛ yɛ sɛŋmɔtso nɔ yɛ Yesu masɛi lɛ?
  • Nɛgbɛ abaana Paradeiso ni Yesu wie he lɛ yɛ?

Sanebimɔi ni fata he

  • Kanemɔ Mateo 26:57-75.

    Yudafoi akojomɔhe wulu lɛ mli bii lɛ tsɔɔ akɛ amɛtsui eyi kɛ efɔŋfeemɔ yɛ mɛɛ gbɛ nɔ? (Mat. 26:59, 67, 68)

  • Kanemɔ Mateo 27:1-50.

    Mɛni hewɔ wɔbaanyɛ wɔkɛɛ akɛ heshwamɔ ni Yuda jie lɛ kpo lɛ jeee nɔ ni yɔɔ krɔŋŋ lɛ? (Mat. 27:3, 4; Mar. 3:29; 14:21; 2 Kor. 7:10, 11)

  • Kanemɔ Luka 22:54-71.

    Mɛni wɔbaanyɛ wɔkase kɛjɛ kwamɔ ni Petro kwá Yesu yɛ gbɛkɛ ni atsɔɔ esɛɛ gbɛ ni amɔ lɛ lɛ mli? (Luka 22:60-62; Mat. 26:31-35; 1 Kor. 10:12)

  • Kanemɔ Luka 23:1-49.

    Te Yesu fee enii yɛ bɔ ni akɛ lɛ ye yɛ gbɛ ni ejaaa nɔ lɛ he tɛŋŋ, ni mɛɛ nikasemɔ wɔbaanyɛ wɔkase kɛjɛ enɛ mli? (Luka 23:33, 34; Rom. 12:17-19; 1 Pet. 2:23)

  • Kanemɔ Yohane 18:12-40.

    Mɛni tsɔɔ akɛ eyɛ mli akɛ gbɔmɔ gbeyeishemɔ ha Petro kumɔ be kukuoo ko moŋ, shi ebaná hewalɛ ekoŋŋ ni ebatsɔ bɔfo ko ni bɔɔ mɔdɛŋ waa? (Yoh. 18:25-27; 1 Kor. 4:2; 1 Pet. 3:14, 15; 5:8, 9)

  • Kanemɔ Yohane 19:1-30.

    Mɛɛ jwɛŋmɔ ni ŋmɛɔ pɛpɛɛpɛ Yesu yɔɔ yɛ heloonaa nibii ahe? (Yoh. 2:1, 2, 9, 10; 19:23, 24; Mat. 6:31, 32; 8:20)

    Yesu naagbee wiemɔi lɛ ji sanejajemɔ ni tsɔɔ akɛ eye kunim yɛ jeŋ muu fɛɛ maŋtsɛ ni Yehowa ji lɛ sɛɛfimɔ mli yɛ mɛɛ gbɛ nɔ? (Yoh. 16:33; 19:30; 2 Pet. 3:14; 1 Yoh. 5:4)

Ekrokromɛi Hu Nɛ

Akɛ Yesu Tee Ana Ŋɔɔ, No Sɛɛ lɛ Kaiafa Ŋɔɔ

Sane ni akɛ Yesu ye lɛ tsɔɔ akɛ ayeee jalɛ sane.

Sanhedrin lɛ Kojo Lɛ, ni Akɛ Lɛ Yahã Pilato

Yudafoi ajamɔŋ hiɛnyiɛlɔi lɛ hã ana yiŋ diɛŋtsɛ ni amɛto.

Maŋtsɛ ni Efeko Efɔŋ ko Piŋ yɛ Tso Jaŋŋ He

Yesu wo efɔŋfeelɔi ni asɛŋ ekɛ amɛ lɛ ateŋ mɔ kome shi ko ni he hiaa waa.

Kasemɔ Yohane 3:16 lɛ Owo Oyitsoŋ

kasemɔ nɔ ni yohane 3:16 lɛ kɛɔ, koni kɛ́ otee shiɛmɔ lɛ okɛtsu nii.