Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 83: Yerusalem Gbogboi Lɛ

Biblia Mli Sane 83: Yerusalem Gbogboi Lɛ
Nitsulɔi ni miyatswa Yerusalem gbogboi lɛ ekoŋŋ

KWƐMƆ nii ni atsuɔ yɛ biɛ lɛ. Israelbii lɛ ahiɛ edɔ amɛmiitswa Yerusalem gbogboi lɛ. Beni Maŋtsɛ Nebukadnezar kpãta Yerusalem hiɛ afii 152 ni eho nɛ lɛ, ekumɔ maŋ lɛ gbogboi lɛ ni eshã maŋ lɛ agbói lɛ. Israelbii lɛ etswaaa gbogboi lɛ nɔŋŋ beni amɛku amɛsɛɛ kɛjɛ Babilon amɛba shia lɛ.

Te osusuɔ akɛ gbɔmɛi lɛ baanu he amɛha tɛŋŋ, yɛ afii babaoo ni amɛyɔɔ maŋ lɛ mli ni gbogbo bɛ maŋ lɛ he lɛ? Amɛnuɔ he akɛ amɛbɛ shweshweeshwe. Amɛ henyɛlɔi lɛ baanyɛ aba mli be fɛɛ be ni amɛbatutua amɛ. Shi amrɔ nɛɛ, yɛ naagbee mli lɛ, nɛkɛ nuu ni ji Nehemia nɛɛ miiye kɛmiibua gbɔmɛi lɛ koni amɛtswa gbogboi lɛ ekoŋŋ. Ani ole mɔ ni Nehemia ji?

Israelnyo ji Nehemia, ni ejɛ Shushan maŋ lɛ mli, he ni Mordekai kɛ Ester yɔɔ lɛ. Nehemia tsu nii yɛ maŋtsɛwe lɛ, no hewɔ lɛ ebaanyɛ efee akɛ eji Mordekai kɛ Maŋnyɛ Ester naanyo waa. Shi Biblia lɛ ekɛɛɛ akɛ Nehemia tsu nii eha Maŋtsɛ Ahashwerosh, ni ji Ester wu lɛ. Etsu nii eha maŋtsɛ ni nyiɛ lɛ esɛɛ lɛ, ni ji Maŋtsɛ Artashasta.

Kaimɔ akɛ Artashasta ji maŋtsɛ kpakpa ni kɛ shika babaoo ha Ezra koni ekɛya Yerusalem ni ekɛyasaa Yehowa sɔlemɔwe lɛ. Shi Ezra etswaaa maŋ lɛ he gbogboi ni ekumɔ lɛ. Ha wɔkwɛ bɔ ni eba lɛ ni Nehemia batsu nɛkɛ nitsumɔ nɛɛ.

Afii 13 sɔŋŋ eho kɛjɛ be mli ni Artashasta kɛ shika lɛ ha Ezra akɛ ekɛyasaa sɔlemɔtsu lɛ. Agbɛnɛ Nehemia ji Maŋtsɛ Artashasta dãawolɔ nukpa. Enɛ tsɔɔ akɛ lɛ ewoɔ maŋtsɛ lɛ dãa, ni ekwɛɔ jogbaŋŋ koni mɔ ko kɛ ebɔɔ akaha maŋtsɛ lɛ. Eji nitsumɔ ni he hiaa waa.

Ojogbaŋŋ, gbi ko lɛ Nehemia nyɛmi nuu Hanani kɛ hii krokomɛi ni jɛ Israel shikpɔŋ lɛ nɔ ba koni amɛbasara Nehemia. Amɛgba lɛ haomɔi ni Israelbii lɛ kɛkpeɔ lɛ he sane, kɛ bɔ ni Yerusalem gbogboi lɛ ekumɔ eshwie shi ni ejwere shi lolo lɛ. Enɛ dɔ Nehemia waa, ni esɔle eha Yehowa yɛ no hewɔ.

Gbi ko lɛ maŋtsɛ lɛ na akɛ Nehemia mii shɛɛɛ ehe, ni ebi lɛ akɛ: ‘Mɛni hewɔ omii shɛɛɛ ohe nɛkɛ?’ Nehemia kɛɛ lɛ akɛ nɔ hewɔ ji akɛ, Yerusalem yɛ shihilɛ gbonyo mli ni ehe gbogboi ni ekumɔ lɛ jwere shi lolo. Maŋtsɛ lɛ bi lɛ akɛ: ‘Mɛni ji nɔ ni otaoɔ?’

Nehemia miikwɛ nitsumɔ lɛ nɔ

Nehemia kɛɛ: ‘Ha ni maya Yerusalem koni miyatswa gbogboi lɛ ekoŋŋ.’ Maŋtsɛ Artashasta mli jɔ waa. Ekɛɛ Nehemia akɛ ebaanyɛ eya, ni eye ebua lɛ ni ená tsei koni ekɛyatsu nii lɛ. Beni Nehemia ba Yerusalem etsɛɛɛ lɛ, ekɛ gbɔmɛi lɛ wie eyiŋtoi ahe. Amɛná jwɛŋmɔ ni ehiɛ lɛ he miishɛɛ, ni amɛkɛɛ: ‘Nyɛhaa wɔjea shishi wɔtswaa.’

Beni Israelbii lɛ ahenyɛlɔi lɛ na akɛ gbogboi lɛ ebɔi ŋwɛi yaa lɛ, amɛkɛɛ: ‘Wɔbaaya wɔyagbe amɛ, ní wɔtsĩ nitsumɔ lɛ naa.’ Shi Nehemia nu enɛ he, ni ekɛ klantei kɛ akpɔlɔi ha nitsulɔi lɛ fɛɛ. Ni ekɛɛ amɛ akɛ: ‘Nyɛkashea wɔhenyɛlɔi lɛ gbeyei. Nyɛwuaa ta nyɛhaa nyɛnyɛmimɛi lɛ, kɛ nyɛbii, kɛ nyɛŋamɛi, kɛ nyɛshiai.’

Gbɔmɛi lɛ fee ekãa waa. Amɛfee amɛtawuu nibii lɛ klalo nyɔɔŋ kɛ shwane, ni amɛtee nɔ amɛtsu nii lɛ. No hewɔ lɛ agbe gbogbo lɛ tswaa lɛ naa yɛ gbii 52 pɛ mli. Agbɛnɛ gbɔmɛi lɛ nuɔ he akɛ amɛyɛ shweshweeshwe yɛ maŋ lɛ mli. Nehemia kɛ Ezra tsɔɔ gbɔmɛi lɛ Nyɔŋmɔ mla lɛ, ni gbɔmɛi lɛ ná miishɛɛ.

Shi nibii bɛ tamɔ bɔ ni amɛyɔɔ dani abaloo Israelbii lɛ kɛtee nomŋɔɔ mli yɛ Babilon lɛ dɔŋŋ. Persia maŋtsɛ lɛ ji mɔ ni yeɔ gbɔmɛi lɛ anɔ ni esa akɛ amɛsɔmɔ lɛ. Shi Yehowa ewo amɛ shi akɛ ebaatsu maŋtsɛ hee ko kɛba, ni nɛkɛ maŋtsɛ hee nɛɛ kɛ toiŋjɔlɛ baaha gbɔmɛi lɛ. Namɔ ji nɛkɛ maŋtsɛ nɛɛ? Te ebaafee tɛŋŋ ni ekɛ toiŋjɔlɛ aba shikpɔŋ lɛ nɔ? Aaafee afii 450 ho dani ale nibii babaoo yɛ enɛ he. No sɛɛ lɛ, abafɔ abifao ko ni he hiaa waa. Shi sane kroko hu ni.

Nehemia yitsei 1 kɛyashi 6.



Sanebimɔi

  • Akɛni Yerusalem maŋ lɛ bɛ gbogboi ni bɔle he hewɔ lɛ, te Israelbii lɛ nu he amɛha tɛŋŋ?
  • Namɔ ji Nehemia?
  • Mɛni ji Nehemia nitsumɔ, ni mɛni hewɔ ehe hiaa waa lɛ?
  • Mɛɛ saji haaa Nehemia mii ashɛ ehe lɛ, ni mɛni efee?
  • Maŋtsɛ Artashasta jie mlijɔlɛ kpo etsɔɔ Nehemia yɛ mɛɛ gbɛ nɔ?
  • Te Nehemia to tsumaa nitsumɔ lɛ he gbɛjianɔ eha tɛŋŋ bɔni afee ni Israelbii lɛ ahenyɛlɔi lɛ akanyɛ amɛtsĩ naa?

Sanebimɔi ni fata he

  • Kanemɔ Nehemia 1:4-6 kɛ 2:1-20.

    Mɛɛ gbɛ nɔ Nehemia tsɔ etao Yehowa gbɛtsɔɔmɔ? (Neh. 2:4, 5; Rom. 12:12; 1 Pet. 4:7)

  • Kanemɔ Nehemia 3:3-5.

    Mɛni asafoŋ onukpai kɛ asafoŋ sɔɔlɔi baanyɛ akase kɛjɛ bɔ ni Tekoabii lɛ asú yɔɔ srɔto yɛ “amɛbladei” lɛ anɔ̃ he lɛ mli? (Neh. 3:5, 27; 2 Tes. 3:7-10; 1 Pet. 5:5)

  • Kanemɔ Nehemia 3:33-4:17.

    Yɛ shitee-kɛ-woo ni naa wa lɛ fɛɛ sɛɛ lɛ, mɛni kanya Israelbii lɛ ni amɛtee nɔ amɛtswa gbogboi lɛ? (Neh. 3:38; 4:2, 3; Lala 50:15; Yes. 65:13, 14)

    Yɛ mɛɛ gbɛ nɔ Israelbii lɛ anɔkwɛmɔnɔ lɛ woɔ wɔ hewalɛ ŋmɛnɛ?

  • Kanemɔ Nehemia 6:15.

    Anɔkwale ni eji akɛ agbe Yerusalem gbogboi lɛ tswaa lɛ naa yɛ nyɔji enyɔ pɛ mli lɛ tsɔɔ wɔ mɛni yɛ hewalɛ ni hemɔkɛyeli yɔɔ lɛ he? (Lala 56:4, 5; Mat. 17:20; 19:26)