Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 82: Mordekai kɛ Ester

Biblia Mli Sane 82: Mordekai kɛ Ester

HA WƆKU wɔsɛɛ kɛya afii fioo ni ho dani Ezra tee Yerusalem lɛ. Mordekai kɛ Ester ji Israelbii ni he hiaa fe fɛɛ yɛ Persia maŋtsɛyeli lɛ mli. Ester ji maŋnyɛ, ni etsɛkwɛ̃ bi Mordekai ji mɔ ni yeɔ maŋtsɛ lɛ sɛɛ yɛ nɔyeli hewalɛ mli. Ha wɔkwɛ bɔ ni fee ni enɛ ba mli nakai.

Ester fɔlɔi gboi beni eji gbekɛ bibioo, no hewɔ lɛ Mordekai ji mɔ ni tsɔse lɛ. Ahashwerosh, ni ji Persia maŋtsɛ lɛ, yɛ mɔɔ yɛ Shushan maŋ lɛ mli, ni Mordekai ji etsuji lɛ ateŋ mɔ kome. Ojogbaŋŋ, gbi ko lɛ maŋtsɛ lɛ ŋa Washti booo lɛ toi, no hewɔ lɛ maŋtsɛ lɛ hala ŋa hee akɛ emaŋnyɛ. Ani ole yoo ni ehala nɛɛ? Hɛɛ, oblayoo Ester ni he yɔɔ fɛo lɛ.

Haman mli wo la ewo Mordekai

Ani oona nuu ni woɔ ehe nɔ ni gbɔmɛi lɛ kulaa shi amɛhaa lɛ nɛɛ? Haman ni. Gbɔmɔ wulu waa ji lɛ yɛ Persia. Haman miitao ni Mordekai, mɔ ni onaa ni eta shi yɛ jɛmɛ lɛ hu akula shi aha lɛ. Shi Mordekai efeee nakai. Esusuuu akɛ eja akɛ ekula shi eha nɛkɛ nuu gbɔmɔ gbonyo nɛɛ. Enɛ ha Haman mli wo la waa diɛŋtsɛ. No hewɔ lɛ nɔ ni efee nɛ.

Haman yamale Israelbii lɛ ahe etsɔɔ maŋtsɛ lɛ. Ekɛɛ lɛ akɛ: ‘Gbɔmɛi gbohii ji amɛ, ni amɛyeee omlai lɛ anɔ. Esa akɛ agbe amɛ fɛɛ.’ Ahashwerosh leee akɛ Israelnyo ji eŋa Ester lɛ. No hewɔ lɛ ebo Haman toi, ni eha afee mla akɛ abaagbe Israelbii lɛ fɛɛ yɛ gbi pɔtɛɛ ko nɔ.

Beni Mordekai nu mla lɛ he lɛ, egba enaa waa. Ekɛ shɛɛ tsu kɛyaha Ester akɛ: ‘Esa akɛ okɛɛ maŋtsɛ lɛ, ni okpa lɛ fai ni ehere wɔ yiwala.’ Persia mla ekpɛlɛɛɛ ni mɔ ko ayana maŋtsɛ lɛ, ja lɛ efɔ̃ mɔ lɛ nine dã. Shi Ester tee ni afɔ̃ko nine atsɛko lɛ. Maŋtsɛ lɛ wo eshika tso lɛ nɔ etsɔɔ lɛ, ni tsɔɔ akɛ esaaa akɛ agbeɔ lɛ. Ester fɔ̃ maŋtsɛ lɛ kɛ Haman nine kɛtee okpɔlɔ wulu ko ni eŋmɛ lɛ shishi. Jɛmɛ ni maŋtsɛ lɛ bi Ester nɔ ni etaoɔ ni efee eha lɛ. Ester kɛɛ lɛ akɛ, ebaakɛɛ lɛ kɛji lɛ kɛ Haman fɛɛ baaba okpɔlɔ kroko ni ebaaŋmɛ enɔ jetsɛremɔ lɛ hu shishi.

Yɛ nakai niyeli lɛ shishi lɛ, Ester kɛɛ maŋtsɛ lɛ akɛ: ‘Abaagbe miwebii lɛ fɛɛ kɛ mi diɛŋtsɛ hu.’ Maŋtsɛ lɛ mli fu waa. Ebi akɛ: ‘Namɔ taoɔ afee nɔ ko ni tamɔ nɛkɛ?’

Ni Ester kɛɛ: ‘Nakai mɔ lɛ, ni ji henyɛlɔ lɛ, ji Haman mɔ fɔŋ nɛɛ!’

Maŋnyɛ Ester miiwie nɔ ni Haman efee lɛ

Agbɛnɛ maŋtsɛ lɛ mli fu waa diɛŋtsɛ. Efã akɛ agbe Haman. No sɛɛ lɛ, maŋtsɛ lɛ fee Mordekai mɔ ni ji enyɔ yɛ lɛ esɛɛ yɛ nɔyeli hewalɛ mli. Kɛkɛ ni Mordekai kwɛ koni awo mla kroko ni baaha Israelbii lɛ anyɛ afã amɛwala he yɛ gbi ni ato ni akɛbaagbe amɛ lɛ nɔ. Akɛni Mordekai ebatsɔ mɔ ko ni he hiaa waa agbɛnɛ hewɔ lɛ, mɛi babaoo ye bua Israelbii lɛ, ni ahere amɛyiwala kɛjɛ amɛ henyɛlɔi lɛ adɛŋ.

Biblia mli wolo ni ji Ester.



Sanebimɔi

  • Namɛi ji Mordekai kɛ Ester?
  • Mɛni hewɔ Maŋtsɛ Ahashwerosh taoɔ ŋa hee lɛ, ni namɔ ehala?
  • Namɔ ji Haman, ni mɛni ha emli wo la waa lɛ?
  • Mɛni mla afee, ni mɛni Ester fee sɛɛ mli be ni enine shɛ Mordekai shɛɛ lɛ nɔ lɛ?
  • Mɛni ba Haman nɔ, ni mɛni ba Mordekai nɔ?
  • Mɛɛ gbɛ nɔ atsɔ ahere Israelbii lɛ ayiwala kɛjɛ amɛhenyɛlɔi lɛ adɛŋ?

Sanebimɔi ni fata he

  • Kanemɔ Ester 2:12-18.

    Ester fee sɛɛnamɔ ni yɔɔ “mumɔ ni he jɔ ni yɔɔ kpoo” ni aaaná lɛ he nɔkwɛmɔnɔ yɛ mɛɛ gbɛ nɔ? (Ester 2:15; 1 Pet. 3:1-5)

  • Kanemɔ Ester 4:1-17.

    Taakɛ aha Ester hegbɛ ni ekɛtsu nii kɛfĩ anɔkwa jamɔ sɛɛ lɛ, mɛɛ hegbɛ wɔ hu wɔyɔɔ ŋmɛnɛ ni wɔkɛtsɔɔ bɔ ni wɔhetuu-kɛ-hamɔ kɛ anɔkwayeli kɛha Yehowa lɛ ji? (Ester 4:13, 14; Mat. 5:14-16; 24:14)

  • Kanemɔ Ester 7:1-6.

    Taakɛ Ester ji lɛ, Nyɔŋmɔ webii babaoo ni yɔɔ ŋmɛnɛ lɛ ebatsɔmɔ mɛi ni abaanyɛ awa amɛyi yɛ mɛɛ gbɛ nɔ? (Ester 7:4; Mat. 10:16-22; 1 Pet. 2:12)

Ekrokromɛi Hu Nɛ

Ester He Sane

Ester ekãa lɛ here mɛi ayiwala yɛ mɛɛ gbɛ nɔ? Printimɔ Biblia mli sane nɛɛ, koni okase enɔkwɛmɔnɔ lɛ.