Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 81: Nyɔŋmɔ Yelikɛbuamɔ Mli Hekɛnɔfɔɔ

Biblia Mli Sane 81: Nyɔŋmɔ Yelikɛbuamɔ Mli Hekɛnɔfɔɔ

GBƆMƐI ni amɛyifalɛ miihe ashɛ 50,000 ji mɛi ni fã gbɛ kakadaŋŋ lɛ kɛjɛ Babilon kɛtee Yerusalem. Shi beni amɛshɛ jɛmɛ lɛ, Yerusalem hiɛ ekpata kwraa. Mɔ ko mɔ ko bɛ jɛmɛ. Esa akɛ Israelbii lɛ asaa ama nɔ fɛɛ nɔ ekoŋŋ.

Nibii ni amɛma klɛŋklɛŋ lɛ ateŋ ekome ji afɔleshaa latɛ. Biɛ ji he ni amɛbaanyɛ amɛkɛ kooloi ashã afɔlei yɛ, aloo amɛkɛ nikeenii abaha Yehowa. No sɛɛ nyɔji fioo ko lɛ, Israelbii lɛ bɔi sɔlemɔtsu lɛ maa. Shi henyɛlɔi ni yɔɔ shikpɔji ni bɛŋkɛ amɛ lɛ anɔ lɛ sumɔɔɔ ni Israelbii lɛ maa. No hewɔ lɛ amɛbɔ mɔdɛŋ ni amɛwo amɛhe gbeyei ni amɛkpa. Yɛ naagbee lɛ, henyɛlɔi nɛɛ ha Persia maŋtsɛ hee lɛ fee mla ni eha akpa tsũ lɛ maa.

Afii pii baho. Agbɛnɛ afii 17 sɔŋŋ nɛ kɛjɛ be mli ni Israelbii lɛ ku amɛsɛɛ kɛjɛ Babilon kɛba. Yehowa tsu egbalɔi Hagai kɛ Zakaria ni amɛkɛɛ gbɔmɛi lɛ koni amɛbɔi tsũ lɛ maa ekoŋŋ. Gbɔmɛi lɛ kɛ amɛhiɛ fɔ̃ Nyɔŋmɔ yelikɛbuamɔ nɔ, ni amɛbo gbalɔi lɛ atoi. Amɛje shishi amɛma tsũ lɛ ekoŋŋ, eyɛ mli akɛ mla yɛ akɛ amɛkama dɔŋŋ.

No hewɔ lɛ Persia onukpa ko ni atsɛɔ lɛ Tatnai ba ni ebabi Israelbii lɛ mɔ ni ha amɛ hegbɛ akɛ amɛma sɔlemɔwe lɛ. Israelbii lɛ ha hetoo akɛ beni amɛyɔɔ Babilon lɛ, Maŋtsɛ Koresh kɛɛ amɛ akɛ: ‘Agbɛnɛ nyɛyaa Yerusalem, nyɛyamaa Yehowa, nyɛ-Nyɔŋmɔ lɛ sɔlemɔwe lɛ.’

Tatnai ŋma wolo kɛtee Babilon ni eyabi kɛji Koresh, ni nakai beaŋ nɔŋŋ lɛ egbo lɛ, kɛɛ nakai lɛɛlɛŋ lo. Etsɛɛɛ kɛkɛ ni wolo jɛ Persia maŋtsɛ hee lɛ dɛŋ kɛba. Ekɛɛ akɛ Koresh kɛɛ nakai lɛɛlɛŋ. No hewɔ lɛ maŋtsɛ lɛ ŋma akɛ: ‘Ha ni Israelbii lɛ ama amɛ Nyɔŋmɔ lɛ sɔlemɔwe lɛ. Ni miifã bo ni oye obua amɛ.’ Aaafee afii ejwɛ mli lɛ, agbe sɔlemɔwe lɛ maa naa, ni Israelbii lɛ ná miishɛɛ waa.

Afii babaoo baho lolo. Agbɛnɛ aaafee afii 48 nɛ ni agbe sɔlemɔwe lɛ maa naa. Ohiafoi ji gbɔmɛi ni yɔɔ Yerusalem lɛ, ni maŋ lɛ kɛ Nyɔŋmɔ sɔlemɔwe lɛ bɛ fɛo. Beni Israelnyo Ezra yɔɔ Babilon lɛ, ená ele akɛ ehe miihia ni asaa Nyɔŋmɔ sɔlemɔtsu lɛ mli. No hewɔ lɛ, ole nɔ ni efee?

Ezra tee ni eyana Artashasta, Persia maŋtsɛ lɛ, ni nɛkɛ maŋtsɛ kpakpa nɛɛ ha Ezra nikeenii babaoo ni ekɛya Yerusalem. Ezra kɛɛ Israelbii ni yɔɔ Babilon lɛ ni amɛwa lɛ ni etere nikeenii lɛ kɛya Yerusalem. Mɛi aaafee 6,000 kɛɛ amɛbaaya. Amɛyɛ jwiɛtɛi kɛ shika kɛ nibii krokomɛi ni jara wa babaoo ni amɛbaaloo kɛya.

Ezra tsui miiye, ejaakɛ gbɔmɛi gbohii yɛ gbɛ lɛ nɔ. Gbɔmɛi nɛɛ baahe amɛ jwiɛtɛi kɛ shika lɛ yɛ amɛdɛŋ, ni amɛgbe amɛ. No hewɔ lɛ Ezra tsɛ gbɔmɛi lɛ kɛkpe, tamɔ bɔ ni onaa yɛ mfoniri lɛ mli lɛ. Kɛkɛ ni amɛsɔle amɛha Yehowa ni ebu amɛhe yɛ gbɛ kakadaŋŋ ni amɛbaafã kɛya Yerusalem lɛ mli.

Ezra kɛ gbɔmɛi lɛ miisɔle

Yehowa bu amɛhe lɛɛlɛŋ. Ni beni amɛfã gbɛ nyɔji ejwɛ lɛ, amɛyashɛ Yerusalem shweshweeshwe. Ani enɛ etsɔɔɔ akɛ Yehowa baanyɛ abu mɛi ni kɛ amɛhe fɔ̃ɔ enɔ kɛha yelikɛbuamɔ lɛ ahe?

Ezra yitsei 2 kɛyashi 8.



Sanebimɔi

  • Gbɔmɛi ayifalɛ enyiɛ fã gbɛ kakadaŋŋ kɛjɛ Babilon kɛtee Yerusalem lɛ, shi mɛni amɛna be ni amɛshɛ jɛmɛ lɛ?
  • Mɛɛ nibii Israelbii lɛ je shishi amɛmamɔ be ni amɛshɛ jɛmɛ lɛ, shi mɛni amɛhenyɛlɔi lɛ fee?
  • Namɛi ji Hagai kɛ Zakaria, ni mɛni amɛkɛɛ gbɔmɛi lɛ?
  • Mɛni hewɔ Tatnai ŋma wolo kɛtee Babilon lɛ, ni mɛɛ hetoo enine shɛ nɔ?
  • Mɛni Ezra fee be ni ená ele akɛ ehe miihia ni asaa Nyɔŋmɔ sɔlemɔtsu lɛ mli lɛ?
  • Yɛ mfoniri lɛ mli lɛ mɛni he Ezra sɔleɔ yɛ lɛ, yɛ mɛɛ gbɛ nɔ aha esɔlemɔ lɛ hetoo, ni mɛni enɛ tsɔɔ wɔ?

Sanebimɔi ni fata he

  • Kanemɔ Ezra 3:1-13.

    Kɛji wɔyaje akutso ko mli be ko, ni Nyɔŋmɔ webii asafo bɛ jɛmɛ lɛ, mɛni esa akɛ wɔya nɔ wɔfee? (Ezra 3:3, 6; Bɔf. 17:16, 17; Heb. 13:15)

  • Kanemɔ Ezra 4:1-7.

    Mɛɛ nɔkwɛmɔnɔ Zerubabel fee kɛha Yehowa webii yɛ futufutu hemɔkɛyeli he? (2 Mose 34:12; 1 Kor. 15:33; 2 Kor. 6:14-17)

  • Kanemɔ Ezra 5:1-5, 17 kɛ 6:1-22.

    Mɛni hewɔ shitee-kɛ-wolɔi lɛ nyɛɛɛ amɛtsĩ sɔlemɔtsu lɛ mãa he nitsumɔ lɛ naa lɛ? (Ezra 5:5; Yes. 54:17)

    Yudafoi onukpai lɛ anifeemɔ lɛ woɔ Kristofoi asafoŋ onukpai ahewalɛ koni amɛtao Yehowa gbɛtsɔɔmɔ be mli ni amɛkɛ shitee-kɛ-wolɔi yeɔ lɛ yɛ mɛɛ gbɛ nɔ? (Ezra 6:14; Lala 32:8; Rom. 8:31; Yak. 1:5)

  • Kanemɔ Ezra 8:21-23, 28-36.

    Dani wɔbaaje nifeemɔ gbɛ ko ni wɔbaakɔ lɛ shishi lɛ, mɛɛ nɔkwɛmɔnɔ ni Ezra fee ebaafee nɔ ni sa akɛ wɔɔkase? (Ezra 8:23; Lala 127:1; Abɛi 10:22; Yak. 4:13-15)