Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 79: Daniel yɛ Jatai Abu Mli

Biblia Mli Sane 79: Daniel yɛ Jatai Abu Mli

OO, OO! Etamɔ nɔ ni Daniel ebote haomɔ babaoo mli. Shi jatai lɛ yeee lɛ awui! Ani ole nɔ hewɔ? Namɔ kɛ Daniel wo biɛ kɛ jatai nɛɛ fɛɛ? Ha wɔtao mli wɔkwɛ.

Agbɛnɛ Babilon maŋtsɛ ji nuu ko ni atsɛɔ lɛ Dario. Esumɔɔ Daniel sane waa ejaakɛ Daniel he jɔ ni ele nii waa hu. Dario hala Daniel ni efee lɛ emaŋtsɛyeli lɛ mli nɔyelɔ fe fɛɛ. Enɛ ha hii krokomɛi ni yɔɔ emaŋtsɛyeli lɛ mli lɛ ye Daniel he awuŋa, no hewɔ lɛ nɔ ni amɛfee nɛ.

Dario

Amɛtee Dario ŋɔɔ ni amɛyakɛɛ lɛ akɛ: ‘Oo maŋtsɛ, wɔkpɛlɛ nɔ akɛ ofee mla akɛ mɔ ko mɔ ko akasɔle eha nyɔŋmɔ ko loo gbɔmɔ ko ja bo okome too pɛ, gbii 30, Oo maŋtsɛ. Kɛ mɔ ko booo toi lɛ, no lɛ ashɛ lɛ afɔ̃ jatai abu lɛ mli.’ Dario leee nɔ hewɔ ni hii nɛɛ taoɔ ni afee nɛkɛ mla nɛɛ. Shi esusu akɛ eji jwɛŋmɔ kpakpa, no hewɔ lɛ eha aŋma mla lɛ afɔ̃ shi. Agbɛnɛ anyɛɛɛ atsake mla nɛɛ dɔŋŋ.

Beni Daniel nu mla nɛɛ he lɛ, etee shia ni eyasɔle, tamɔ bɔ ni efeɔ daa lɛ. Gbɔmɛi gbohii nɛɛ le akɛ Daniel kpaŋ sɔlemɔ kɛha Yehowa. Eŋɔɔ amɛnaa, ejaakɛ etamɔ nɔ ni amɛyiŋ ni amɛto akɛ amɛbaajie Daniel yɛ jɛmɛ lɛ miiye omanye.

Beni Maŋtsɛ Dario na ele nɔ hewɔ ni hii nɛɛ taoɔ ni afee mla lɛ, edɔ lɛ waa diɛŋtsɛ. Shi enyɛɛɛ etsake mla lɛ, no hewɔ lɛ esa akɛ eha akɛ Daniel awo jatai abu lɛ mli. Shi maŋtsɛ lɛ kɛɛ Daniel akɛ: ‘Miheɔ miyeɔ akɛ, o-Nyɔŋmɔ lɛ ni osɔmɔɔ lɛ lɛ, baanyɛ ahere oyiwala.’

Enɛ hao Dario waa akɛ enyɛɛɛ ewɔ nakai nyɔɔŋ lɛŋ fɛɛ. Enɔ jetsɛremɔ lɛ, ejo foi kɛtee jatai abu lɛ naa. Lɛ onaa yɛ jɛmɛ lɛ. Ebo waa akɛ: ‘Daniel, Nyɔŋmɔ hiɛkalɔ lɛ tsulɔ! Ani Nyɔŋmɔ ni osɔmɔɔ lɛ lɛ enyɛ ehere oyiwala kɛjɛ jatai lɛ adɛŋ?’

Daniel yɛ jatai abu lɛ mli

Daniel ha hetoo akɛ: ‘Nyɔŋmɔ tsu ebɔfo ni ebatsĩmɔ jatai lɛ anaa, no hewɔ lɛ amɛyeee mi awui ko.’

Eŋɔɔ maŋtsɛ lɛ naa waa. Efã akɛ ajie Daniel kɛjɛ bu lɛ mli. Kɛkɛ ni eha akɛ hii gbohii ni bɔ mɔdɛŋ ni amɛgbe Daniel lɛ ha jatai lɛ. Jatai lɛ mɔmɔ amɛ dani amɛshɛ bu lɛ mli po, ni amɛkumɔ amɛwui fɛɛ amli.

No sɛɛ lɛ Maŋtsɛ Dario ŋma wolo eyaha gbɔmɛi ni yɔɔ emaŋtsɛyeli lɛ mli lɛ fɛɛ akɛ: ‘Miiwo akpɔ akɛ mɔ fɛɛ mɔ kɛ bulɛ aha Daniel Nyɔŋmɔ lɛ. Efeɔ naakpɛɛ nibii wuji. Ehere Daniel yiwala ni jatai lɛ kpeee lɛ.’

Daniel 6:2-29.



Sanebimɔi

  • Namɔ ji Dario, ni te ebuɔ Daniel tɛŋŋ?
  • Mɛni hii komɛi ni yeɔ awuŋa ha Dario fee?
  • Mɛni Daniel fee be ni enu akɛ awo mla hee lɛ?
  • Mɛni hewɔ Dario hao aahu akɛ enyɛɛɛ ewɔ lɛ, ni enɔ jetsɛremɔ lɛ mɛni efee?
  • Te Daniel ha Dario hetoo eha tɛŋŋ?
  • Mɛni ba hii gbohii ni bɔ mɔdɛŋ ni amɛgbe Daniel lɛ anɔ, ni mɛni Dario ŋma yaha gbɔmɛi fɛɛ ni yɔɔ emaŋtsɛyeli lɛ mli lɛ?

Sanebimɔi ni fata he

  • Kanemɔ Daniel 6:2-29.

    Ŋaa ni atsɔ koni agbe Daniel lɛ kaiɔ wɔ nɔ ni shitee-kɛ-wolɔi bɔɔ mɔdɛŋ ni amɛfee koni atsĩ Yehowa Odasefoi anitsumɔ lɛ naa yɛ wɔbe nɛɛ mli lɛ yɛ mɛɛ gbɛ nɔ? (Dan. 6:8; Lala 94:20; Yes. 10:1; Rom. 8:31)

    Nyɔŋmɔ tsuji ni yɔɔ ŋmɛnɛ lɛ baanyɛ akase Daniel yɛ heshibaa ni ajieɔ lɛ kpo atsɔɔ “hegbɛi ni yeɔ nɔ lɛ” mli yɛ mɛɛ gbɛ nɔ? (Dan. 6:6, 11; Rom. 13:1; Bɔf. 5:29)

    Wɔbaanyɛ wɔkase nɔkwɛmɔnɔ ni tsɔɔ sɔɔmɔ ni Daniel kɛhaa Yehowa “daa nɛɛ” lɛ yɛ mɛɛ gbɛ nɔ? (Dan. 6:16, 20; Fil. 3:16; Kpoj. 7:15)

Ekrokromɛi Hu Nɛ

Daniel He Sane

Mɛni hewɔ ashɛ Daniel awo jatai abu mli lɛ? Printimɔ Biblia mli sane nɛɛ, koni okase Daniel he saji komɛi hu.