Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 77: Amɛkulaŋ Shi

Biblia Mli Sane 77: Amɛkulaŋ Shi

ANI okaiɔ akɛ onu nɛkɛ oblahii etɛ nɛɛ ahe sane pɛŋ? Hɛɛ, amɛji Daniel nanemɛi ni kpoo akɛ amɛaaye nɔ ni ehiii kɛhaaa amɛ lɛ. Babilonbii lɛ tsɛɔ amɛ Shadrak, Meshak kɛ Abednego. Shi kwɛmɔ amɛ agbɛnɛ. Mɛni hewɔ amɛkulaaa shi amɛhaaa nɛkɛ amaga agbo nɛɛ tamɔ bɔ ni mɔ fɛɛ mɔ ekula shi lɛ? Ha wɔkwɛ.

Ani okaiɔ mlai ni Yehowa diɛŋtsɛ ŋmala ni atsɛɔ lɛ Kitai Nyɔŋma lɛ? Amɛteŋ klɛŋklɛŋ nɔ ji: ‘Kaaja nyɔŋmɔi krokomɛi akɛ ja mi pɛ.’ Nɛkɛ oblahii ni yɔɔ biɛ nɛɛ miiye mla nɛɛ nɔ, eyɛ mli akɛ ejeee nɔ ko ni efeemɔ yɔɔ mlɛo.

Nebukadnezar, Babilon maŋtsɛ lɛ etsɛ mɛi ni hiɛ yɔɔ nyam babaoo kɛba ni amɛbawo amaga ni ekɛma shi nɛɛ hiɛ nyam. Egbe wiemɔ ni ekɛ gbɔmɛi lɛ fɛɛ wie lɛ naa akɛ: ‘Be fɛɛ be ni nyɛaanu koofɛŋ, kɛ saŋkui kɛ jooi srɔtoi agbɛɛmɔ he lɛ, esa akɛ nyɛkula shi ni nyɛja nɛkɛ shika amaga nɛɛ. Mɔ fɛɛ mɔ ni kulaaa shi ni eeeja lɛ lɛ, abaashɛ lɛ afɔ̃ la kɛ flɔnɔɔ ni mli edɔ waa lɛ mli amrɔ nɔŋŋ.’

Beni Nebukadnezar ná ele akɛ Shadrak, Meshak kɛ Abednego kulaaa shi lɛ, emli fu waa. Eha akɛ amɛ ba ehiɛ. Eha amɛ hegbɛ ekoŋŋ ni amɛkula shi. Shi oblahii nɛɛ kɛ amɛhiɛ fɔ̃ɔ Yehowa nɔ. Amɛkɛɛ Nebukadnezar akɛ: ‘Wɔ Nyɔŋmɔ ni wɔjaa lɛ lɛ baanyɛ ahere wɔ yiwala. Shi kɛji ehereee wɔ yiwala po lɛ, wɔkulaŋ shi wɔhaŋ oshika amaga lɛ.’

Shadrak, Meshak kɛ Abednego

Beni Nebukadnezar nu enɛ lɛ, emli fu waa fe tsutsu lɛ. La kɛ flɔnɔɔ bɛŋkɛ jɛmɛ, ni efã akɛ: ‘Nyɛhaa flɔnɔɔ lɛ adɔa shii kpawo fe bɔ ni edɔ lɛ!’ Kɛkɛ ni eha hii ni he wa waa ni yɔɔ esraafoi lɛ ateŋ lɛ fimɔ Shadrak, Meshak kɛ Abednego ni amɛshɛrɛ amɛ amɛshwie flɔnɔɔ lɛ mli. Flɔnɔɔ lɛ edɔ aahu akɛ lalilɛii lɛ gbe hii hewalɔi nɛɛ. Shi oblahii etɛ ni amɛshɛrɛ amɛ amɛshwie mli lɛ hu?

Maŋtsɛ lɛ kwɛ flɔnɔɔ lɛ mli, ni eshe gbeyei waa diɛŋtsɛ. Ebi akɛ: ‘Ani jeee hii etɛ wɔfimɔ ni wɔshɛrɛ wɔshwie flɔnɔɔ kɛ la ni tsoɔ ni edɔ nɛɛ mli lɛ?’

Etsuji lɛ ha lɛ hetoo akɛ: ‘Hɛɛ, nakai wɔfee.’

Ekɛɛ akɛ: ‘Shi miina hii ejwɛ ni amɛnyiɛ la lɛ mli. Afimɔko amɛ, ni la lɛ hu eshãaa amɛ. Ni mɔ ni ji ejwɛ lɛ tamɔ nyɔŋmɔ ko.’ Ni maŋtsɛ lɛ tsi ebɛŋkɛ flɔnɔɔ lɛ shinaa lɛ naa ni ebo waa akɛ: ‘Shadrak! Meshak! Abednego! Nyɛ Ŋwɛi Flooflo Nyɔŋmɔ lɛ tsuji, nyɛjea kpo!’

Beni amɛje kpo lɛ, mɔ fɛɛ mɔ na amɛ akɛ la lɛ eshãko amɛ. Kɛkɛ ni maŋtsɛ lɛ kɛɛ: ‘Ajie Shadrak, Meshak kɛ Abednego Nyɔŋmɔ lɛ yi! Etsu ebɔfo lɛ ni ebahere amɛyiwala ejaakɛ amɛkulaaa shi ni amɛjaaa nyɔŋmɔ kroko akɛ ja amɛnɔ lɛ pɛ.’

Ani enɛ jeee anɔkwale ni ayeɔ Yehowa lɛ he nɔkwɛmɔ nɔ ni sa akɛ wɔnyiɛ sɛɛ?

2 Mose 20:3; Daniel 3:1-30.



Sanebimɔi

  • Mɛɛ fãmɔ Babilon maŋtsɛ Nebukadnezar kɛha gbɔmɛi lɛ?
  • Mɛni hewɔ Daniel nanemɛi etɛ lɛ kulaaa shi amɛhaaa shika amaga lɛ?
  • Be ni Nebukadnezar ha Hebribii etɛ lɛ hegbɛ ekoŋŋ ni amɛkula shi lɛ, mɛɛ gbɛ nɔ amɛtsɔɔ yɛ akɛ amɛyɛ hekɛnɔfɔɔ yɛ Yehowa mli?
  • Mɛni Nebukadnezar ha ehii lɛ fee Shadrak, Meshak kɛ Abednego?
  • Mɛni Nebukadnezar na be ni ekwɛ flɔnɔɔ lɛ mli lɛ?
  • Mɛni hewɔ maŋtsɛ lɛ jie Shadrak, Meshak kɛ Abednego Nyɔŋmɔ lɛ yi lɛ, ni amɛbafeɔ mɛni he nɔkwɛmɔnɔ kɛhaa wɔ?

Sanebimɔi ni fata he

  • Kanemɔ Daniel 3:1-30.

    Mɛɛ su ní Hebribii oblahii etɛ lɛ jie lɛ kpo esa akɛ Nyɔŋmɔ tsuji fɛɛ akase be mli ni amɛkɛ anɔkwayeli he kaa kpeɔ lɛ? (Dan. 3:17, 18; Mat. 10:28; Rom. 14:7, 8)

    Mɛɛ nikasemɔ ni he hiaa Yehowa Nyɔŋmɔ tsɔɔ Nebukadnezar? (Dan. 3:28, 29; 4:34, 35)