Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 74: Nuu ko ni Sheee Gbeyei

Biblia Mli Sane 74: Nuu ko ni Sheee Gbeyei

KWƐMƆ gbɔmɛi ni yeɔ oblanyo nɛɛ he fɛo lɛ. Ani ole mɔ ni eji? Yeremia ni. Eji Nyɔŋmɔ gbalɔ ni he hiaa waa.

Mɛi miiye Yeremia he fɛo

Beni Maŋtsɛ Yosia je shishi ebɔi amagai lɛ akuumɔ kɛjɛ shikpɔŋ lɛ nɔ etsɛɛɛ pɛ kɛkɛ ni Yehowa kɛɛ Yeremia ni efee E-gbalɔ. Shi kɛlɛ, Yeremia susu akɛ edako bɔ ni eeenyɛ efee gbalɔ. Shi Yehowa kɛɛ lɛ akɛ E-baaye ebua lɛ.

Yeremia kɛɛ Israelbii lɛ ni amɛkpa nibii fɔji lɛ afeemɔ. Ekɛɛ amɛ akɛ: ‘Nyɔŋmɔi ni jeŋmaji lɛ amli bii lɛ jaa lɛ ji apasa nyɔŋmɔi.’ Shi Israelbii lɛ pii miisumɔ ni amɛja amagai moŋ fe ni amɛaaja anɔkwa Nyɔŋmɔ Yehowa lɛ. Beni Yeremia kɛɛ gbɔmɛi lɛ akɛ Nyɔŋmɔ baagbala amɛtoi yɛ amɛ nibii fɔji lɛ ahewɔ lɛ, amɛŋmɔ lɛ waa.

Afii pii ho. Yosia gbo, ni no sɛɛ nyɔji etɛ lɛ, ebinuu Yehoiakim baye maŋtsɛ. Yeremia tee nɔ ekɛɛ gbɔmɛi lɛ akɛ: ‘Kɛ nyɛtsakeee nyɛ gbɛi fɔji lɛ, abaakpata Yerusalem hiɛ.’ Osɔfoi lɛ mɔ Yeremia ni amɛbolɔ akɛ: ‘Esa akɛ agbe bo yɛ nibii ni owie nɛɛ hewɔ.’ Kɛkɛ ni amɛkɛɛ Israel lumɛi lɛ akɛ: ‘Esa akɛ agbeɔ Yeremia, ejaakɛ ewie eshi wɔmaŋ lɛ.’

Mɛni Yeremia baafee agbɛnɛ? Esheee gbeyei! Ekɛɛ amɛ fɛɛ akɛ: ‘Yehowa tsu mi ni mibakɛɛ nyɛ nibii nɛɛ fɛɛ. Kɛji nyɛtsakeee nyɛ shihilɛ gbɛi fɔji lɛ, Yehowa baakpata Yerusalem hiɛ. Shi nyɛhiɛ ahia enɛ nɔ: Kɛji nyɛgbe mi lɛ, nyɛgbe nuu ni efeko nɔ fɔŋ ko.’

Lumɛi lɛ ha Yeremia hi wala mli, shi Israelbii lɛ tsakeee amɛ gbɛi fɔji lɛ. Yɛ sɛɛ mli lɛ, Nebukadnezar, Babilon maŋtsɛ lɛ ba ni ekɛ Yerusalem bawu ta. Yɛ naagbee lɛ, Nebukadnezar fee Israelbii lɛ etsuji. Eloo amɛteŋ mɛi akpei abɔ kɛtee Babilon. Bo diɛŋtsɛ susumɔ he okwɛ bɔ ni ebaaba lɛ eha kɛ́ mɛi ni oleee amɛ bamɔ bo kɛjɛ oshia ni amɛkɛ bo tee maŋ ko ni oleee jɛmɛ lɛ mli!

Yeremia 1:1-8; 10:1-5; 26:1-16; 2 Maŋtsɛmɛi 24:1-17.



Sanebimɔi

  • Namɔ ji oblanyo ni yɔɔ mfoniri lɛ mli lɛ?
  • Mɛɛ jwɛŋmɔ Yeremia ná yɛ gbalɔ ni eeebatsɔ lɛ he, shi mɛni Yehowa kɛɛ lɛ?
  • Mɛɛ shɛɛ sane Yeremia tee nɔ ekɛha gbɔmɛi lɛ?
  • Mɛɛ gbɛ nɔ osɔfoi lɛ ka akɛ amɛaatsĩ Yeremia naa, shi mɛɛ gbɛ nɔ etsɔɔ yɛ akɛ esheee gbeyei?
  • Mɛni ba be ni Israelbii lɛ tsakeee amɛshihilɛ gbɛ̀i fɔji lɛ?

Sanebimɔi ni fata he

  • Kanemɔ Yeremia 1:1-8.

    Taakɛ Yeremia nɔkwɛmɔnɔ lɛ jieɔ lɛ kpo lɛ, mɛni haa mɔ ko he saa kɛha Yehowa sɔɔmɔ? (2 Kor. 3:5, 6)

    Mɛɛ hewalɛwoo Yeremia nɔkwɛmɔnɔ lɛ kɛhaa Kristofoi oblahii kɛ oblayei bibii ni yɔɔ ŋmɛnɛ lɛ? (Jaj. 12:1; 1 Tim. 4:12)

  • Kanemɔ Yeremia 10:1-5.

    Mɛɛ nɔkwɛmɔnɔ ni sa jogbaŋŋ Yeremia kɛtsu nii kɛtsɔɔ bɔ ni sɛɛnamɔ ko kwraa bɛ amagai ní akɛ hiɛ aaafɔ amɛnɔ lɛ he lɛ? (Yer. 10:5; Yes. 46:7; Hab. 2:19)

  • Kanemɔ Yeremia 26:1-16.

    Mɛɛ gbɛ nɔ shwɛɛnii ni afɔ amɛ mu lɛ kɛ famɔ ni Yehowa kɛha Yeremia akɛ ‘ekajie wiemɔ kome yɛ mli’ lɛ tsuɔ nii jogbaŋŋ yɛ be mli ni amɛkɛ kɔkɔbɔɔ shɛɛ sane lɛ haa ŋmɛnɛ lɛ? (Yer. 26:2; 5 Mose 4:2; Bɔf. 20:27)

    Mɛɛ nɔkwɛmɔnɔ fɛfɛo Yeremia fee efɔ shi eha Yehowa Odasefoi ni yɔɔ ŋmɛnɛ lɛ yɛ be mli ni amɛjajeɔ Yehowa kɔkɔbɔɔ amɛtsɔɔ jeŋmaji lɛ? (Yer. 26:8, 12, 14, 15; 2 Tim. 4:1-5)

  • Kanemɔ 2 Maŋtsɛmɛi 24:1-17.

    Mɛɛ mɔbɔ sane jɛ anɔkwa ni Yuda eyayeee Yehowa lɛ mli kɛba? (2 Maŋ. 24:2-4, 14)

Ekrokromɛi Hu Nɛ

Yeremia Biblia Kaad

Mɛɛ be ahala Yeremia akɛ gbalɔ? Okɛ Biblia kaad nɛɛ atsu nii kɛtao hetoo lɛ.