Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 73: Israel Naagbee Maŋtsɛ Kpakpa

Biblia Mli Sane 73: Israel Naagbee Maŋtsɛ Kpakpa

BENI Yosia bafee Israel wuoyigbɛ akutsei enyɔ lɛ nɔ maŋtsɛ lɛ, no mli lɛ eye afii kpaanyɔ pɛ. Edako bɔ ni esa akɛ awoɔ lɛ maŋtsɛ. No hewɔ lɛ, shishijee mli lɛ, onukpai komɛi ye amɛbua lɛ ni eye maŋ lɛ nɔ.

Beni Yosia eye maŋtsɛ afii kpawo sɛɛ lɛ, eje shishi etao Yehowa sɛɛ gbɛ. Enyiɛ maŋtsɛmɛi kpakpai tamɔ David, Yehoshafat kɛ Hezekia nɔkwɛmɔ nii lɛ asɛɛ. Ni yɛ be mli ni Yosia yeko afii nyɔŋmai enyɔ po lɛ, ekɛ ekãa fee nɔ ko.

Maŋtsɛ Yosia kɛ emɛi lɛ miikumɔ amagai lɛ

Israelbii lɛ ateŋ mɛi babaoo efee amɛhe mɛi fɔji yɛ bei babaoo mli. Amɛjaa apasa nyɔŋmɔi. Amɛkulaa shi amɛhaa amagai. No hewɔ lɛ Yosia kɛ emɛi lɛ tee ni amɛje shishi amɛjie apasa jamɔ kɛjɛ shikpɔŋ lɛ nɔ. Nitsumɔ wulu ji enɛ ejaakɛ gbɔmɛi lɛ ateŋ mɛi pii jaa apasa nyɔŋmɔi. Obaana Yosia kɛ emɛi lɛ yɛ biɛ ni amɛmiikumɔ amagai lɛ.

Yɛ no sɛɛ lɛ, Yosia kɛ nitsumɔ wo mɛi etɛ adɛŋ ni amɛkwɛ koni asaa Yehowa sɔlemɔwe lɛ. Ahe shika yɛ gbɔmɛi lɛ adɛŋ ni akɛha hii nɛɛ ni amɛkɛwo nitsumɔ ni abaatsu lɛ he nyɔmɔ. Beni amɛtsuɔ nii yɛ sɔlemɔtsu lɛ he lɛ, osɔfonukpa Hilkia na nɔ ko ni he hiaa waa yɛ jɛmɛ. Mla wolo lɛ ni Yehowa ha Mose ŋma be babaoo ni eho nɛ lɛ ni. Afii babaoo nɛ ni elaaje.

Akɛ wolo lɛ yaha Yosia, ni efã ni akane aha lɛ. Beni Yosia boɔ toi lɛ, ena akɛ gbɔmɛi lɛ yeee Yehowa mla lɛ nɔ. Edɔ lɛ waa yɛ enɛ hewɔ, no hewɔ lɛ etserɛ etadei lɛ yɛ ehe, taakɛ onaa yɛ biɛ nɛɛ lɛ. Ekɛɛ akɛ: ‘Yehowa mli efu wɔ waa, ejaakɛ wɔtsɛmɛi lɛ yeee mlai ni aŋmala yɛ wolo nɛɛ mli lɛ anɔ.’

Shafan kɛ Maŋtsɛ Yosia

Yosia fã osɔfonukpa Hilkia ni etao nɔ ni Yehowa baafee amɛ yɛ enɛ hewɔ. Hilkia tee yoo ko ni atsɛɔ lɛ Hulda, ni ji gbalɔyoo lɛ ŋɔɔ, ni eyabi lɛ. Ekɛ nɛkɛ shɛɛ sane ni jɛ Yehowa ŋɔɔ nɛɛ ha lɛ ni ekɛyaha Yosia: ‘Abaagbala Yerusalem kɛ gbɔmɛi ni yɔɔ mli lɛ fɛɛ atoi, ejaakɛ amɛja apasa nyɔŋmɔi, ni shikpɔŋ lɛ eyi obɔ kɛ efɔŋ sɔŋŋ. Shi akɛni bo, Yosia, ofee ekpakpa hewɔ lɛ, nɛkɛ toigbalamɔ nɛɛ baŋ ja ogbele sɛɛ dã.’

2 Kronika 34:1-28.



Sanebimɔi

  • Afii enyiɛ Yosia eye be ni ebatsɔ maŋtsɛ lɛ, ni be ni eye maŋtsɛ afii kpawo sɛɛ lɛ, mɛni eje shishi efee?
  • Mɛni onaa ni Yosia feɔ yɛ klɛŋklɛŋ mfoniri lɛ mli lɛ?
  • Be ni hii lɛ tsuɔ nii yɛ sɔlemɔtsu lɛ he lɛ, mɛni osɔfonukpa lɛ na?
  • Mɛni hewɔ Yosia tserɛ etadei lɛ yɛ ehe lɛ?
  • Mɛɛ shɛɛ sane ni jɛ Yehowa ŋɔɔ gbalɔyoo Hulda kɛha Yosia?

Sanebimɔi ni fata he

  • Kanemɔ 2 Kronika 34:1-28.

    Mɛɛ nɔkwɛmɔnɔ Yosia fee kɛha mɛi ni ekolɛ ehe baahia ni amɛŋmɛ amɛtsui shi yɛ shihilɛi ni mli wawai amli yɛ amɛgbekɛbiiashi lɛ? (2 Kron. 33:21-25; 34:1, 2; Lala 27:10)

    Mɛɛ nitsumɔi ni sa kadimɔ Yosia kɛ ehe wo mli yɛ enɔyeli afi ni ji 8, afi ni ji 12 kɛ afi ni ji 18 lɛ mli bɔni afee ni anɔkwa jamɔ ashwere? (2 Kron. 34:3, 8)

    Mɛni wɔbaanyɛ wɔkase kɛjɛ Maŋtsɛ Yosia kɛ Osɔfonukpa Hilkia nɔkwɛmɔnii lɛ amli yɛ nɔ ni kɔɔ wɔjamɔhei lɛ ni wɔɔsaa jɛmɛ jogbaŋŋ lɛ he lɛ? (2 Kron. 34:9-13; Abɛi 11:14; 1 Kor. 10:31)

Ekrokromɛi Hu Nɛ

Yosia He Sane

Eyɛ mli akɛ etsɛ efeee nɔkwɛmɔnɔ kpakpa moŋ, Yosia hala akɛ ebaasɔmɔ Nyɔŋmɔ. Mɛni ye ebua lɛ ni efee jalɛ nii?