Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 72: Nyɔŋmɔ Ye Ebua Maŋtsɛ Hezekia

Biblia Mli Sane 72: Nyɔŋmɔ Ye Ebua Maŋtsɛ Hezekia

ANI ole nɔ hewɔ ni nuu nɛɛ sɔleɔ ehaa Yehowa lɛ? Mɛni hewɔ ekɛ woji nɛɛ eshwie Yehowa afɔleshaa latɛ lɛ hiɛ lɛ? Nuu lɛ ji Hezekia. Lɛ ji wuoyigbɛ Israel akutsei enyɔ maŋtsɛyeli lɛ nɔ maŋtsɛ. Ni eyɛ haomɔ babaoo mli. Mɛni hewɔ?

Maŋtsɛ Hezekia miisɔle

Ejaakɛ Ashur asraafoi lɛ ekpata kooyigbɛ akutsei 10 lɛ hiɛ momo. Yehowa ŋmɛ gbɛ ni enɛ ba ejaakɛ nakai gbɔmɛi lɛ ehiii. Ni agbɛnɛ Ashur asraafoi lɛ eba koni amɛkɛ akutsei enyɔ maŋtsɛyeli lɛ hu abawu.

Etsɛko kwraa ni Ashur maŋtsɛ lɛ kɛ woji tsu ni akɛyaha maŋtsɛ Hezekia. Woji nɛɛ ji nɔ ni Hezekia kɛshwie shi yɛ Nyɔŋmɔ hiɛ yɛ biɛ lɛ. Woji lɛ miiye Yehowa he fɛo, ni eekɛɛ Hezekia ni eŋmɛɛ ehe eha. No hewɔ lɛ, enɛ hewɔ Hezekia sɔle akɛ: ‘Oo Yehowa heremɔ wɔ kɛjɛ Ashur maŋtsɛ lɛ dɛŋ. Kɛkɛ lɛ jeŋmaji lɛ fɛɛ baaná ale akɛ bo okome too pɛ ji Nyɔŋmɔ.’ Ani Yehowa baabo Hezekia toi?

Maŋtsɛ kpakpa ji Hezekia. Etamɔɔɔ maŋtsɛmɛi fɔji ni ye Israel akutsei 10 lɛ anɔ lɛ, aloo etsɛ gbɔmɔ fɔŋ ni ji Maŋtsɛ Ahaz hu. Hezekia kwɛ jogbaŋŋ ni eye Yehowa mlai lɛ fɛɛ nɔ. No hewɔ lɛ, beni Hezekia sɔle eta lɛ, gbalɔ Yesaia kɛ shɛɛ sane ni jɛ Yehowa ŋɔɔ nɛɛ tsu ni akɛbaha lɛ akɛ: ‘Ashur maŋtsɛ lɛ shɛŋ Yerusalem. Ni esraafoi lɛ ateŋ mɔ ko mɔ ko bɛŋkɛŋ maŋ lɛ po. Amɛtsɛŋ gaimlibi kome folo po amɛshiŋ maŋ lɛ.’

Kwɛmɔ mfoniri ni yɔɔ baafa nɛɛ mli lɛ. Ani ole mɛi ni nɛkɛ asraafoi ni egboi nɛɛ ji? Ashurbii lɛ ni. Yehowa tsu ebɔfo, ni yɛ maŋkɛ̃ mli lɛ, bɔfo lɛ gbe Ashur asraafoi 185,000. No hewɔ lɛ Ashur maŋtsɛ lɛ ŋmɛɛ ta lɛ he ni eku esɛɛ etee shia.

Ashur asraafoi ni egboi

Ahere akutsei enyɔ maŋtsɛyeli lɛ yiwala, ni gbɔmɛi lɛ ná toiŋjɔlɛ yɛ be kukuoo ko mli. Shi beni Hezekia gbo sɛɛ lɛ, ebinuu Manase baye esɛɛ akɛ maŋtsɛ. Manase kɛ ebinuu Amon ni baye esɛɛ lɛ fɛɛ lɛ, maŋtsɛmɛi fɔji waa ji amɛ. No hewɔ lɛ, shikpɔŋ lɛ nɔ bayi obɔ̃ ekoŋŋ kɛ awuiyeli kɛ basabasafeemɔ. Beni Maŋtsɛ Amon diɛŋtsɛ tsuji lɛ gbe lɛ lɛ, aha ebinuu Yosia bafee akutsei enyɔ maŋtsɛyeli lɛ nɔ maŋtsɛ.

2 Maŋtsɛmɛi 18:1-36; 19:1-37; 21:1-25.



Sanebimɔi

  • Namɔ ji nuu ni yɔɔ mfoniri lɛ mli lɛ, ni mɛni hewɔ ebote haomɔ babaoo mli lɛ?
  • Mɛɛ woji Hezekia kɛshwie Nyɔŋmɔ hiɛ lɛ, ni mɛni he Hezekia sɔle yɛ?
  • Mɛɛ maŋtsɛ nɛkɛ Hezekia ji, ni mɛɛ shɛɛ sane Yehowa kɛha lɛ kɛtsɔ gbalɔ Yesaia nɔ?
  • Mɛni Yehowa bɔfo lɛ fee Ashurbii lɛ, taakɛ wɔnaa yɛ mfoniri lɛ mli lɛ?
  • Eyɛ mli akɛ akutsei enyɔ maŋtsɛyeli lɛ ná toiŋjɔlɛ yɛ be kukuoo ko mli moŋ, shi mɛni ba sɛɛ mli be ni Hezekia gbo lɛ?

Sanebimɔi ni fata he

  • Kanemɔ 2 Maŋtsɛmɛi 18:1-36.

    Rabshake ni ji Ashurbii anaawielɔ lɛ bɔ mɔdɛŋ ni egbɔjɔ Israelbii lɛ ahemɔkɛyeli yɛ mɛɛ gbɛ nɔ? (2 Maŋ. 18:19, 21; 2 Mose 5:2; Lala 64:4)

    Mɛɛ gbɛ nɔ Yehowa Odasefoi tsɔɔ amɛkaseɔ Hezekia nɔkwɛmɔnɔ lɛ be mli ni amɛkɛ shitee-kɛ-wolɔi yeɔ? (2 Maŋ. 18:36; Lala 39:2; Abɛi 26:4; 2 Tim. 2:24)

  • Kanemɔ 2 Maŋtsɛmɛi 19:1-37.

    Yehowa webii kaseɔ Hezekia ŋmɛnɛ yɛ haomɔ bei amli yɛ mɛɛ gbɛ nɔ? (2 Maŋ. 19:1, 2; Abɛi 3:5, 6; Heb. 10:24, 25; Yak. 5:14, 15)

    Mɛɛ shihilɛi srɔtoi etɛ mli aye Maŋtsɛ Sanherib nɔ kunim yɛ, ni namɔ he mfoniri efeɔ yɛ gbalɛ naa? (2 Maŋ. 19:32, 35, 37; Kpoj. 20:2, 3)

  • Kanemɔ 2 Maŋtsɛmɛi 21:1-6, 16.

    Mɛni hewɔ abaanyɛ akɛɛ akɛ Manase ji maŋtsɛmɛi ni yitseiaŋ wa fe fɛɛ ni eye Yerusalem nɔ pɛŋ lɛ ateŋ mɔ kome lɛ? (2 Kron. 33:4-6, 9)