Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 71: Nyɔŋmɔ Kɛ Paradeiso He Shiwoo Eha

Biblia Mli Sane 71: Nyɔŋmɔ Kɛ Paradeiso He Shiwoo Eha

PARADEISO ni tamɔ nɔ ni ekolɛ Nyɔŋmɔ kɛtsɔɔ egbalɔ Yesaia lɛ he mfoniri nɛ. Yesaia hi shi yɛ Yona shihilɛ be lɛ sɛɛ fioo.

Mɛi yɛ Paradeiso

Paradeiso shishitsɔɔmɔ ji “abɔɔ” loo “trom.” Ani ekaiɔ bo nɔ ko ni wɔtsɔ hiɛ wɔna momo yɛ wolo nɛɛ mli? Etamɔ abɔɔ fɛfɛo ni Yehowa Nyɔŋmɔ fee eha Adam kɛ Hawa lɛ, aloo jeee nakai? Shi ani jeŋ muu lɛ fɛɛ baatsɔ paradeiso wɔsɛɛ ko?

Yehowa kɛɛ egbalɔ Yesaia akɛ eŋma paradeiso hee ni akɛbaaha Nyɔŋmɔ webii lɛ he sane efɔ shi. Ekɛɛ akɛ: ‘Ni klaŋ kɛ too gwantɛŋ aaahi shi yɛ he kome yɛ toiŋjɔlɛ mli. Tsina bii kɛ jata bii baaye nii yɛ he kome, ni gbekɛbii bibii baakpala amɛ. Ni kɛ́ gbekɛ abifao kɛ enine miishwɛ onufu ni ébɔɔ yɔɔ emli bu naa po lɛ, efeŋ lɛ efɔŋ ko.’

Shi mɛi pii baakɛɛ akɛ: ‘Enɛ nyɛŋ aba mli. Naagbai ekã he ehi shikpɔŋ nɛɛ nɔ aahu, ni ebaahi shi daa.’ Shi susumɔ he okwɛ: Mɛɛ shia nɛkɛ Nyɔŋmɔ kɛha Adam kɛ Hawa?

Nyɔŋmɔ kɛ Adam kɛ Hawa wo paradeiso mli. Akɛni amɛbooo Nyɔŋmɔ toi hewɔ ni amɛlaaje nakai shia fɛfɛo lɛ, ni amɛgbɔlɔ ni amɛgboi lɛ. Nyɔŋmɔ ewo shi akɛ ebaaha mɛi ni sumɔɔ lɛ lɛ nibii ni Adam kɛ Hawa laaje lɛ nɔŋŋ pɛpɛɛpɛ.

Nɔ ko nɔ ko yeŋ mɔ awui ni akpataŋ nii ahiɛ hu yɛ paradeiso hee ni baa lɛ mli. Toiŋjɔlɛ ni eye emuu baahi shi. Gbɔmɛi fɛɛ baana gbɔmɔtsoŋ hewalɛ kɛ miishɛɛ. Ebaafee tamɔ bɔ ni Nyɔŋmɔ taoɔ ni efee kɛjɛ shishijee mli lɛ pɛpɛɛpɛ. Shi wɔbaakase bɔ ni Nyɔŋmɔ baafee ni ekɛ enɛ aba lɛ he sane yɛ sɛɛ mli.

Yesaia 11:6-9; Kpojiemɔ 21:3, 4.



Sanebimɔi

  • Namɔ ji Yesaia, mɛɛ be ehi shi, ni mɛni Yehowa jie kpo etsɔɔ lɛ?
  • Mɛni ji wiemɔ “paradeiso” lɛ shishinumɔ, ni mɛni ekaiɔ bo?
  • Mɛni Yehowa kɛɛ Yesaia aŋma yɛ Paradeiso hee lɛ he?
  • Mɛni hewɔ Adam kɛ Hawa laaje amɛshia fɛfɛo lɛ?
  • Mɛɛ shiwoo Yehowa kɛhaa mɛi ni sumɔɔ lɛ lɛ?

Sanebimɔi ni fata he

  • Kanemɔ Yesaia 11:6-9.

    Te Nyɔŋmɔ Wiemɔ lɛ tsɔɔ bɔ ni toiŋjɔlɛ ni baahi gbɔmɛi kɛ kooloi ateŋ yɛ jeŋ hee lɛ mli lɛ baatamɔ eha tɛŋŋ? (Lala 148:10, 13; Yes. 65:25; Ezek. 34:25)

    Yesaia wiemɔi lɛ miiná emlibaa yɛ mumɔŋ shishinumɔ naa yɛ Yehowa webii ateŋ ŋmɛnɛ yɛ mɛɛ gbɛ nɔ? (Rom. 12:2; Efe. 4:23, 24)

    Namɔ esa ákɛ akɛ tsakemɔi ni adesai feɔ yɛ amɛsubaŋi amli ŋmɛnɛ kɛ agbɛnɛ hu yɛ jeŋ hee lɛ mli lɛ he yijiemɔ lɛ aha? (Yes. 48:17, 18; Gal. 5:22, 23; Fil. 4:7)

  • Kanemɔ Kpojiemɔ 21:3, 4.

    Mɛɛ gbɛ nɔ Ŋmalɛi lɛ haa aleɔ akɛ shihilɛ ni Nyɔŋmɔ diɛŋtsɛ kɛ adesai baahi mli lɛ tsɔɔ akɛ ekɛ amɛ baahi shi yɛ shikpɔŋ nɔ yɛ mfonirifeemɔ shishinumɔ naa, shi etsɔɔɔ akɛ ebaaba ebahi shikpɔŋ nɔ? (3 Mose 26:11, 12; 2 Kron. 6:18; Yes. 66:1; Kpoj. 21:2, 3, 22-24)

    Mɛɛ yaafonui kɛ piŋmɔi nɛkɛ abaafo sɛɛ lɛ? (Luka 8:49-52; Rom. 8:21, 22; Kpoj. 21:4)