Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 70: Yona kɛ Loo Agbo Lɛ

Biblia Mli Sane 70: Yona kɛ Loo Agbo Lɛ

KWƐMƆ nuu ni yɔɔ nu lɛ mli lɛ. Eyɛ haomɔ babaoo mli, aloo jeee nakai? Nakai loo lɛ miiba ebami lɛ! Ani ole mɔ ni nuu nɛɛ ji? Egbɛi ji Yona. Ha wɔkwɛ bɔ ni fee ni ebote haomɔ babaoo mli nɛkɛ lɛ.

Yehowa gbalɔ ji Yona. Gbalɔ Elisha gbele sɛɛ etsɛɛɛ tsɔ ni Yehowa kɛɛ Yona akɛ: ‘Yaa Ninive maŋ kpeteŋkpele lɛ mli. Gbɔmɛi ni yɔɔ jɛmɛ lɛ anɔ fɔŋ feemɔ lɛ fa waa diɛŋtsɛ, ni miitao ni okɛ amɛ ayawie yɛ no hewɔ.’

Yona kɛ loo agbo lɛ

Shi Yona sumɔɔɔ ni eyaa. No hewɔ lɛ ebote lɛlɛ ko ni miiya he kroko kwraa ni jeee Ninive lɛ mli. Yehowa naaa Yona he miishɛɛ akɛni eejo foi lɛ hewɔ. No hewɔ lɛ E-ha ahum kpeteŋkpele ko tswa. Enaa wa aahu akɛ eha lɛlɛ lɛ fee tamɔ nɔ ni ebaabutu. Amlakui lɛ she gbeyei waa naakpa, ni amɛbolɔ amɛtsɛ amɛnyɔŋmɔi lɛ ni amɛye amɛbua amɛ.

Yɛ naagbee lɛ Yona kɛɛ amɛ akɛ: ‘Mijáa Yehowa, Nyɔŋmɔ ni fee ŋwɛi kɛ shikpɔŋ lɛ. Ni miijo foi yɛ nɔ ni Yehowa tsu mi akɛ miyafee lɛ naa.’ No hewɔ lɛ amlakui lɛ bi lɛ akɛ: ‘Mɛni wɔfee bo koni ahum lɛ akpa tswaa?’

Yona kɛɛ akɛ: ‘Nyɛshɛa mi nyɛfɔa ŋshɔ lɛ mli, ni ŋshɔ lɛ baaŋmɛ diŋŋ ekoŋŋ.’ Amlakui lɛ sumɔɔɔ ni amɛfeɔ nakai, shi beni ahum lɛ naa wa waa fe nine lɛ amɛshɛ Yona amɛfɔ ŋshɔ lɛ mli. Amrɔ nɔŋŋ ni ahum lɛ kpa tswaa, ni ŋshɔ lɛ fee dioo.

Beni Yona tee nu lɛ shishi lɛ, ŋshɔŋ loo agbo ko mi lɛ. Shi egbooo. Ehi nakai loo lɛ musuŋ nyɔɔŋnyɔɔŋ kɛ shwaneshwane gbii etɛ. Yona shwa ehe akɛ ebooo Yehowa toi koni eya Ninive. No hewɔ lɛ ani ole nɔ ni efee?

Yona sɔle eha Yehowa kɛha yelikɛbuamɔ. Ni Yehowa ha loo lɛ yashwe Yona efɔ shikpɔŋ gbiŋ nɔ. Yɛ no sɛɛ lɛ Yona tee Ninive. Ani enɛ etsɔɔɔ wɔ akɛ ehe miihia ni wɔfee nɔ fɛɛ nɔ ni Yehowa kɛɔ wɔ lɛ?

Biblia mli Yona wolo lɛ.



Sanebimɔi

  • Namɔ ji Yona, ni mɛni Yehowa kɛɛ efee?
  • Akɛni Yona sumɔɔɔ ni eyaa he ni Yehowa kɛɛ eya lɛ hewɔ lɛ, mɛni Yona fee?
  • Mɛni Yona kɛɛ amlakui lɛ ni amɛfee bɔni afee ni ahum lɛ akpa tswaa?
  • Taakɛ onaa yɛ mfoniri lɛ mli lɛ, mɛni ba be ni Yona tee nu lɛ shishi lɛ?
  • Gbii enyiɛ Yona ye yɛ loo agbo lɛ musu mli, ni mɛni efee yɛ jɛmɛ?
  • Nɛgbɛ Yona tee be ni eje kpo kɛjɛ loo agbo lɛ musu mli lɛ, ni mɛni enɛ tsɔɔ wɔ?

Sanebimɔi ni fata he

  • Kanemɔ Yona 1:1-2:1.

    Yɛ anɔkwale mli lɛ, te Yona bu enitsumɔ akɛ eyashiɛ etsɔɔ Ninivebii lɛ eha tɛŋŋ? (Yona 1:2, 3; Abɛi 3:7; Jaj. 8:12)

  • Kanemɔ Yona 2:2, 3, 11.

    Yona nɔkwɛmɔnɔ lɛ haa wɔnáa hekɛnɔfɔɔ akɛ Yehowa baaha wɔsɔlemɔi lɛ ahetoo yɛ mɛɛ gbɛ nɔ? (Lala 22:25; 34:7; 1 Yoh. 5:14)

  • Kanemɔ Yona 3:1-10.

    Eyɛ mli akɛ yɛ shishijee lɛ, Yona kpoo nitsumɔ ni akɛha lɛ lɛ moŋ, shi mɛɛ hewalɛwoo wɔnáa kɛjɛɔ anɔkwale ni eji akɛ Yehowa tee nɔ ekɛ lɛ tsu nii lɛ mli? (Lala 103:14; 1 Pet. 5:10)

    Mɛni Yona niiashikpamɔ ni kɔɔ Ninivebii lɛ ahe lɛ tsɔɔ wɔ yɛ mɛi ni yɔɔ wɔshikpɔŋkuku lɛ mli ni wɔɔtsɔ hiɛ wɔkojo amɛ lɛ he? (Yona 3:6-9; Jaj. 11:6; Bɔf. 13:48)

Ekrokomɛi Hu Nɛ

BIBLIA MLI MƐI AHE SAJI

Yona He Sane

Mɛɛ Yehowa sui wɔkaseɔ he nii yɛ Biblia mli amaniɛbɔɔ ni kɔɔ Yona he lɛ mli?