Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 69: Gbekɛ Yoo ko Ye Ebua Nuu Hewalɔ Ko

Biblia Mli Sane 69: Gbekɛ Yoo ko Ye Ebua Nuu Hewalɔ Ko

ANI ole nɔ ni gbekɛ yoo fioo nɛɛ kɛɔ lɛ? Eegba Yehowa gbalɔ Elisha, kɛ naakpɛɛ nibii ni Yehowa yeɔ ebuaa lɛ ni efeɔ lɛ he sane eetsɔɔ awula lɛ. Awula lɛ leee Yehowa he nɔ ko ejaakɛ jeee Israelnyo ji lɛ. Agbɛnɛ, ha wɔkwɛ nɔ hewɔ ni gbekɛ yoo nɛɛ yɔɔ awula lɛ shia lɛ.

Aramnyo ji awula lɛ. Ewu ji Naeman, Arambii lɛ atatsɛnukpa lɛ. Arambii lɛ mɔ nɛkɛ Israel gbekɛ yoo bibioo nɛɛ, ni akɛ lɛ ba Naeman ŋa lɛ ŋɔɔ koni ebasɔmɔ lɛ.

Naeman ŋa lɛ kɛ gbekɛ yoo ni ji etsulɔ lɛ

Naeman miiye hela gbonyo ko ni atsɛɔ lɛ kpiti. Hela nɛɛ nyɛɔ ehaa mɔ ko ni miiye eko lɛ hewolo po tserɛɔ. No hewɔ lɛ enɛ ji nɔ ni gbekɛ yoo lɛ kɛɔ Naeman ŋa lɛ: ‘Miná ni kulɛ minuŋtsɔ tee Yehowa gbalɔ lɛ ŋɔɔ yɛ Israel. Ebaatsa ekpiti lɛ eha lɛ.’ Yɛ sɛɛ mli lɛ akɛɛ awula lɛ wu lɛ.

Naeman miisumɔ waa ni atsa ehela lɛ aha lɛ; no hewɔ lɛ ekpɛ eyiŋ akɛ ebaaya Israel. Beni eshɛ jɛmɛ lɛ, etee Elisha shia lɛ. Elisha ha etsulɔ lɛ je kpo ni eyakɛɛ Naeman ni eyaju ehe shii kpawo yɛ Yordan Faa lɛ mli. Enɛ ha Naeman mli fu waa, ni ekɛɛ akɛ: ‘Faai ni yɔɔ mimaŋ lɛ hi fe faai fɛɛ ni yɔɔ Israel!’ Beni ewie nɛkɛ sɛɛ lɛ, Naeman ku esɛɛ.

Shi etsuji lɛ ateŋ mɔ kome kɛɛ lɛ akɛ: ‘Minuŋtsɔ, eji Elisha kɛɛ ofee nɔ ko ni wa kulɛ, obaafee. Agbɛnɛ mɛni hewɔ onyɛɛɛ oyaju ohe kɛkɛ, tamɔ bɔ ni ekɛɛ lɛ?’ Naeman bo etsulɔ lɛ toi ni etee ni ekɛ ehe yatsɔ Yordan Faa lɛ mli shii kpawo. Beni efee nakai lɛ, ehewolo nɔ bafee fɛo ni ená hewalɛ ekoŋŋ!

Naeman ná miishɛɛ waa. Eku esɛɛ eba Elisha ŋɔɔ ni ebakɛɛ lɛ akɛ: ‘Agbɛnɛ mina mile akɛ Nyɔŋmɔ ni yɔɔ Israel lɛ ji anɔkwa Nyɔŋmɔ kome pɛ yɛ shikpɔŋ lɛ nɔ fɛɛ. No hewɔ lɛ ofainɛ hemɔ nɛkɛ nikeenii nɛɛ.’ Shi Elisha ha lɛ hetoo akɛ: ‘Dabi, miheŋ.’ Elisha le akɛ ejaaa akɛ ebaahe nikeenii lɛ, ejaakɛ Yehowa ji mɔ ni tsa Naeman hela lɛ. Shi Elisha tsulɔ Gehazi miitao nikeenii lɛ kɛha ehe.

No hewɔ lɛ nɔ ni Gehazi fee nɛ. Beni Naeman etee sɛɛ lɛ, Gehazi jo foi waa kɛyanina lɛ. Gehazi kɛɛ: ‘Elisha tsu mi ni mibakɛɛ bo akɛ ebaasumɔ onikeenii lɛ ekomɛi eha enanemɛi komɛi ni eba eŋɔɔ amrɔ nɛɛ nɔŋŋ lɛ.’ Yɛ anɔkwale mli lɛ, amale diɛŋtsɛ nɛ. Shi Naeman leee akɛ amale ni; no hewɔ lɛ ekɛ nibii lɛ ekomɛi ha Gehazi.

Beni Gehazi ku esɛɛ eba shia lɛ, Elisha le nɔ ni eyafee lɛ. Yehowa ekɛɛ lɛ. No hewɔ lɛ ekɛɛ lɛ akɛ: ‘Akɛni ofee nɛkɛ efɔŋ nɛɛ hewɔ lɛ, Naeman kpiti lɛ baaba onɔ.’ Ni eba enɔ amrɔ nɔŋŋ!

Mɛni wɔbaanyɛ wɔkase kɛjɛ enɛɛmɛi fɛɛ mli? Klɛŋklɛŋ lɛ, esa akɛ wɔfee tamɔ gbekɛ yoo fioo lɛ ni wɔgba Yehowa he sane. Ebaanyɛ efee nɔ kpakpa waa. Nɔ ni ji enyɔ lɛ, esaaa akɛ wɔwoɔ wɔhe nɔ tamɔ Naeman fee kɛje shishi lɛ, shi moŋ esa akɛ wɔbo Nyɔŋmɔ tsuji lɛ atoi. Ni nɔ ni ji etɛ lɛ, esaaa akɛ wɔmaleɔ tamɔ Gehazi fee lɛ. Ani wɔnyɛŋ wɔkase nibii babaoo kɛjɛ Biblia lɛ kanemɔ mli?

2 Maŋtsɛmɛi 5:1-27.



Sanebimɔi

  • Mɛni gbekɛ yoo fioo lɛ kɛɔ awula lɛ yɛ mfoniri lɛ mli lɛ?
  • Namɔ ji awula ni yɔɔ mfoniri lɛ mli lɛ, ni mɛni gbekɛ yoo fioo lɛ feɔ yɛ awula lɛ shia?
  • Mɛni Elisha hã etsulɔ lɛ yakɛɛ Naeman, ni mɛni hewɔ Naeman mli fu waa lɛ?
  • Mɛni ba be ni Naeman bo etsuji lɛ atoi lɛ?
  • Mɛni hewɔ Elisha kpoo Naeman nikeenii lɛ, shi mɛni Gehazi fee?
  • Mɛni ba Gehazi nɔ, ni mɛni wɔbaanyɛ wɔkase kɛjɛ enɛ mli?

Sanebimɔi ni fata he

  • Kanemɔ 2 Maŋtsɛmɛi 5:1-27.

    Israel gbekɛ yoo fioo lɛ nɔkwɛmɔnɔ lɛ baanyɛ awo gbekɛbii ni yɔɔ ŋmɛnɛ lɛ hewalɛ yɛ mɛɛ gbɛ nɔ? (2 Maŋ. 5:3; Lala 8:3; 148:12, 13)

    Mɛni hewɔ ehi jogbaŋŋ akɛ wɔɔha Naeman niiashikpamɔ lɛ ahi wɔjwɛŋmɔ mli be mli ni akɛ Ŋmalɛ mli ŋaawoo haa wɔ lɛ? (2 Maŋ. 5:15; Heb. 12:5, 6; Yak. 4:6)

    Mɛɛ nibii wɔbaanyɛ wɔkase kɛjɛ srɔtofeemɔ ni yɔɔ Elisha nɔkwɛmɔnɔ lɛ kɛ Gehazi nɔkwɛmɔnɔ lɛ teŋ lɛ mli? (2 Maŋ. 5:9, 10, 14-16, 20; Mat. 10:8; Bɔf. 5:1-5; 2 Kor. 2:17)

Ekrokomɛi Hu Nɛ

OKƐ YEHOWA ABƆ NAANYO

Yehowa Baawa Bo ní Ofee Ekãa

Mɛni baanyɛ awa bo koni oná ekãa kɛgba mɛi krokomɛi Yehowa he sane?

MFONIRII AMLIPƐIMƆ

Gehazi Male

Mɛɛ malemɔi enyɔ Gehazi male? Printimɔ niiamlipɛimɔ nɛɛ, otsara kpɔbii lɛ, koni okase nɔ ko kɛjɛ Biblia mli amaniɛbɔɔ nɛɛ mli.