Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 68: Gbekɛbii Hii Enyɔ ni Ba Wala Mli Ekoŋŋ

Biblia Mli Sane 68: Gbekɛbii Hii Enyɔ ni Ba Wala Mli Ekoŋŋ

KƐJI ogbo ni atee bo shi kɛba wala mli ekoŋŋ lɛ, te onyɛ baanu he eha tɛŋŋ? Ebaaná miishɛɛ waa! Shi ani mɔ ko ni egbo lɛ hiɛ baanyɛ akã ekoŋŋ? Ani eko eba pɛŋ?

Kwɛmɔ nuu ni yɔɔ biɛ lɛ, kɛ yoo lɛ kɛ gbekɛ nuu fioo lɛ hu. Nuu lɛ ji gbalɔ Elia. Yoo lɛ ji yoo okulafo ni jɛ Zarefat maŋ lɛ mli, ni ebinuu ji gbekɛ lɛ. Ojogbaŋŋ, gbi ko lɛ hela mɔ gbekɛ lɛ. Hela lɛ mli bawa aahu kɛyashi egbo yɛ sɛɛ mli kwraa. Ni Elia kɛɛ yoo lɛ akɛ: ‘Okɛ gbekɛ lɛ aha mi.’

Elia kɛ yoo okulafo kɛ ebinuu ni atee lɛ shi lɛ

Elia wo gbekɛ ni egbo lɛ kɛtee ŋwɛitsu ko nɔ ni ekɛ lɛ yafɔ̃ saatso nɔ. Kɛkɛ ni esɔle akɛ: ‘Oo Yehowa, ha gbekɛ lɛ hiɛ atsɛ̃ ekoŋŋ.’ Ni gbekɛ lɛ bɔi muu! No sɛɛ lɛ Elia kɛ gbekɛ lɛ kpeleke shi ni ebakɛɛ yoo lɛ akɛ: ‘Kwɛmɔ, obi lɛ hiɛ kã ekoŋŋ!’ Enɛ hewɔ ni enyɛ mii eshɛ ehe waa nakai lɛ.

Yehowa gbalɔ kroko ni he hiaa waa hu ji Elisha. Esɔmɔ akɛ Elia yelikɛbualɔ. Shi yɛ be ko mli lɛ, Yehowa kɛ Elisha hu tsu nii ni ekɛfee naakpɛɛ nii. Gbi ko lɛ Elisha tee Shunem maŋ lɛ mli, ni yoo ko jie mlihilɛ kpo etsɔɔ lɛ. Yɛ sɛɛ mli lɛ yoo nɛɛ fɔ binuu.

Gbi ko leebi, beni gbekɛ lɛ hiɛ efã fioo lɛ, etee koni eyafata etsɛ ni tsuɔ nii yɛ eŋmɔ mli lɛ he. Amrɔ nɔŋŋ kɛkɛ ni gbekɛ lɛ bo akɛ: ‘Miyitso miigba mi!’ Beni akɛ lɛ ba shia lɛ, gbekɛ lɛ bagbo. Kwɛ bɔ ni enyɛ ye awerɛho ha! Amrɔ nɔŋŋ kɛkɛ ni eyatao Elisha.

Beni Elisha ba lɛ, ekɛ gbekɛ ni egbo lɛ tee tsũ lɛ mli. Esɔle eha Yehowa, ni ebú gbonyo lɛ nɔ. Etsɛɛɛ kɛkɛ ni gbekɛ lɛ he bɔi dɔɔ, ni etsine shii kpawo. Kwɛ bɔ ni enyɛ ná miishɛɛ waa eha beni ebana akɛ ebi lɛ hiɛ kã lɛ!

Mɛi babaoo diɛŋtsɛ egboi. Enɛ eha amɛwekui kɛ amɛnanemɛi anii efee mɔbɔ waa. Wɔbɛ hewalɛ ni wɔkɛaatee gbohii ashi. Shi Yehowa yɛ nakai hewalɛ lɛ. Yɛ sɛɛ mli lɛ wɔbaakase bɔ ni ebaafee ni ekɛ mɛi akpekpei abɔ ni egboi lɛ aba wala mli lɛ he sane.

1 Maŋtsɛmɛi 17:8-24; 2 Maŋtsɛmɛi 4:8-37.


Sanebimɔi

  • Namɛi ji mɛi etɛ ni yɔɔ mfoniri lɛ mli lɛ, ni mɛni ba gbekɛ nuu fioo lɛ nɔ?
  • Elia sɔle yɛ mɛni he kɛha gbekɛ lɛ, ni mɛni ba sɛɛ mli?
  • Te atsɛ́ɔ Elia yelikɛbualɔ lɛ tɛŋŋ?
  • Mɛni hewɔ aha Elisha tee Shunem yoo ko shia lɛ?
  • Mɛni Elisha fee, ni mɛni ba gbekɛ ni egbo lɛ nɔ?
  • Mɛɛ hewalɛ Yehowa yɔɔ taakɛ ajie lɛ kpo kɛtsɔ Elia kɛ Elisha nɔ lɛ?

Sanebimɔi ni fata he

  • Kanemɔ 1 Maŋtsɛmɛi 17:8-24.

    Mɛɛ gbɛ nɔ atsɔ aka heshibaa kɛ hemɔkɛyeli ni Elia yɔɔ lɛ akwɛ? (1 Maŋ. 17:9; 19:1-4, 10)

    Mɛni hewɔ hemɔkɛyeli ni Zarefat yoo okulafo lɛ jie lɛ kpo lɛ sa kadimɔ waa lɛ? (1 Maŋ. 17:12-16; Luka 4:25, 26)

    Mɛɛ gbɛ nɔ Zarefat okulafo lɛ niiashikpamɔ lɛ maa anɔkwale ni yɔɔ Yesu wiemɔi ni aŋmala yɛ Mateo 10:41, 42 lɛ mli lɛ nɔ mi? (1 Maŋ. 17:10-12, 17, 23, 24)

  • Kanemɔ 2 Maŋtsɛmɛi 4:8-37.

    Mɛni Shunem yoo lɛ tsɔɔ wɔ yɛ gbɔfeemɔ sú he? (2 Maŋ. 4:8; Luka 6:38; Rom. 12:13; 1 Yoh. 3:17)

    Mɛɛ gbɛ̀i anɔ wɔɔtsɔ wɔjie mlihilɛ nifeemɔi akpo wɔtsɔɔ Nyɔŋmɔ tsuji ni yɔɔ ŋmɛnɛ lɛ? (Bɔf. 20:35; 28:1, 2; Gal. 6:9, 10; Heb. 6:10)