Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 67: Yehoshafat Kɛ Ehe Fɔ̃ Yehowa Nɔ

Biblia Mli Sane 67: Yehoshafat Kɛ Ehe Fɔ̃ Yehowa Nɔ

ANI ole mɛi ni nɛkɛ hii nɛɛ ji kɛ nɔ ni amɛfeɔ lɛ? Amɛmiiya ta, ni hii ni nyiɛ hiɛ lɛ miila. Shi ekolɛ obaabi akɛ: ‘Mɛni hewɔ ni lalɔi lɛ ehiɛɛɛ klantei kɛ akpɔlɔi ni amɛkɛbaawu ta lɛ?’ Hã ni wɔkwɛ.

Israelbii ni miiya ta

Yehoshafat ji Israel akutsei enyɔ maŋtsɛyeli lɛ nɔ maŋtsɛ. Ehi shi yɛ be mli ni Maŋtsɛ Ahab kɛ Izebel yeɔ maŋtsɛ yɛ kooyigbɛ akutsei 10 lɛ nɔ lɛ nɔŋŋ mli. Shi maŋtsɛ kpakpa ji Yehoshafat, ni etsɛ Asa hu ji maŋtsɛ kpakpa nakai nɔŋŋ. No hewɔ lɛ mɛi ni yɔɔ wuoyigbɛ akutsei enyɔ maŋtsɛyeli lɛ mli lɛ ná shihilɛ kpakpa afii babaoo.

Shi agbɛnɛ nɔ ko ba ni ha gbɔmɛi lɛ she gbeyei. Tsuji babɔ Yehoshafat amaniɛ akɛ: ‘Ta babaoo ko ni jɛ Moab kɛ Amon maji lɛ anɔ kɛ Seir Gɔŋ lɛ nɔ lɛ miiba ni amɛkɛ bo abawu.’ Israelbii pii bua amɛhe naa yɛ Yerusalem koni amɛtao Yehowa dɛŋ yelikɛbuamɔ. Amɛtee sɔlemɔwe lɛ, ni Yehoshafat sɔle yɛ jɛmɛ akɛ: ‘Oo Yehowa wɔ-Nyɔŋmɔ, wɔleee nɔ ni wɔbaafee. Wɔnyɛŋ wɔhe wɔjie kɛjɛ nɛkɛ tai babaoo nɛɛ adɛŋ. Bo onɔ wɔhiɛ kã kɛha yelikɛbuamɔ.’

Yehowa bo toi, ni eha etsuji lɛ ateŋ mɔ kome kɛɛ gbɔmɛi lɛ akɛ: ‘Ta lɛ jeee nyɛ nɔ ni, shi moŋ Nyɔŋmɔ nɔ ni. Jeee nyɛ nyɛbaawu ta lɛ. Nyɛdamɔa shi ni nyɛkwɛa nyɛyiwala ni Yehowa baahere.’

No hewɔ lɛ enɔ jetsɛremɔ lɛ, Yehoshafat kɛɛ gbɔmɛi lɛ akɛ: ‘Nyɛkɛ nyɛhiɛ afɔ̃a Yehowa nɔ!’ Kɛkɛ ni ekɛ lalɔi lɛ ye esraafoi lɛ ahiɛ, ni beni amɛnyiɛ kɛmiiya lɛ amɛmiila kɛmiijie Yehowa yi. Ani ole nɔ ni ba beni amɛbɛŋkɛ he ni abaawu ta lɛ yɛ lɛ? Yehowa ha asraafoi henyɛlɔi lɛ kɛ amɛhe bɔi nɔmɔ. Ni beni Israelbii lɛ shɛɔ jɛmɛ lɛ, asraafoi henyɛlɔi lɛ ateŋ mɔ fɛɛ mɔ egbo!

Ani Yehoshafat jeee nilelɔ akɛ ekɛ ehe fɔ̃ Yehowa nɔ? Wɔ hu wɔbaafee nilelɔi kɛ wɔkɛ wɔhe fɔ̃ E-nɔ.

1 Maŋtsɛmɛi 22:41-54; 2 Kronika 20:1-30.


Sanebimɔi

  • Namɔ ji Yehoshafat, ni mɛɛ be ehi shi?
  • Mɛni hewɔ Israelbii lɛ sheɔ gbeyei lɛ, ni mɛni amɛteaŋ mɛi pii fee?
  • Mɛɛ hetoo Yehowa kɛha Yehoshafat be ni esɔle lɛ?
  • Mɛni Yehowa fee dani ta be lɛ shɛ?
  • Mɛni wɔbaanyɛ wɔkase yɛ Yehoshafat he?

Sanebimɔi ni fata he

  • Kanemɔ 2 Kronika 20:1-30.

    Yɛ mɛɛ gbɛ nɔ Yehoshafat tsɔɔ nɔ ni esa akɛ Nyɔŋmɔ tsuji anɔkwafoi afee kɛ́ amɛkɛ shihilɛi ni yɔɔ gbeyei kpe? (2 Kron. 20:12; Lala 25:15; 62:1)

    Akɛni be fɛɛ be lɛ, Yehowa yɛ gbɛjianɔtoo ko ni etsɔɔ nɔ ekɛ ewebii ni ekɛ amɛ tsuɔ nii lɛ wieɔ hewɔ lɛ, mɛɛ gbɛjianɔtoo nɔ etsɔɔ ekɛ wɔ wieɔ yɛ ŋmɛnɛ? (2 Kron. 20:14, 15; Mat. 24:45-47; Yoh. 15:15)

    Be ni “Nyɔŋmɔ Ofe lɛ gbi wulu lɛ nɔ ta” lɛ baaje shishi lɛ, wɔshidaamɔ lɛ baatamɔ Yehoshafat nɔ̃ lɛ pɛpɛɛpɛ yɛ mɛɛ gbɛ nɔ? (2 Kron. 20:15, 17; 32:8; Kpoj. 16:14, 16)

    Akɛni gbɛgbalɔi kɛ maŋsɛɛ sanekpakpa shiɛlɔi kaseɔ Levibii lɛ hewɔ lɛ, mɛɛ yelikɛbuamɔ nɛkɛ amɛkɛhaa yɛ jeŋ muu fɛɛ shiɛmɔ nitsumɔ lɛ mli ŋmɛnɛ? (2 Kron. 20:19; Rom. 10:13-15; 2 Tim. 4:2)