Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 66: Izebel—Maŋnyɛ Yitsoŋwalɔ

Biblia Mli Sane 66: Izebel—Maŋnyɛ Yitsoŋwalɔ

BENI Maŋtsɛ Yerobeam egbo sɛɛ lɛ, maŋtsɛ fɛɛ maŋtsɛ ni baye kooyigbɛ Israel akutsei 10 maŋtsɛyeli lɛ nɔ lɛ fee mɔ ni ehiii. Maŋtsɛ Ahab ji amɛteŋ mɔ ni ehiii fe fɛɛ. Ani ole nɔ hewɔ? Yiŋtoo titri kome ni fe fɛɛ ji eŋa lɛ, Maŋnyɛ Izebel yitsoŋwalɔ lɛ.

Izebel jeee Israelyoo. Zidon maŋtsɛ lɛ biyoo ji lɛ. Ejáa apasa nyɔŋmɔ ni ji Baal, ni eha Ahab kɛ Israelbii lɛ ateŋ mɛi pii hu já Baal. Izebel nyɛ̃ɔ Yehowa ni egbe egbalɔi lɛ ateŋ mɛi pii. Mɛi komɛi po yatee amɛhe yɛ tɛkploi amli koni ekagbe amɛ. Kɛ Izebel miitao nɔ ko lɛ, ebaagbe gbɔmɔ po koni enine ashɛ nɔ.

Gbi ko lɛ Maŋtsɛ Ahab bafee enii mɔbɔmɔbɔ. No hewɔ lɛ Izebel bi lɛ akɛ: ‘Mɛni eba ni ŋmɛnɛ lɛ ofee onii mɔbɔmɔbɔ nɛkɛ?’

Ahab ha lɛ hetoo akɛ: ‘Ejɛ nɔ ni Nabot kɛɛ mi lɛ hewɔ. Miitao ni mikɛ shika ahe eweintrom lɛ. Shi ekɛɛ mi akɛ minine shɛŋ nɔ.’

Izebel kɛɛ: ‘Kaaye otsui. Mahe yɛ edɛŋ mahao.’

No hewɔ lɛ Izebel ŋmala woji eyaha hii onukpai ni yɔɔ maŋ mli he ni Nabot yɔɔ lɛ. Ekɛɛ amɛ akɛ: ‘Nyɛtaoa hii yakagbɔmɛi komɛi ni amɛye odase amɛshi Nabot akɛ elomɔ Nyɔŋmɔ kɛ maŋtsɛ lɛ. Ni nyɛkpalaa Nabot kɛjea maŋ lɛ mli ni nyɛtswiaa lɛ tɛi ni egbo.’

Ní Izebel ná ele akɛ Nabot egbo nɔŋŋ pɛ kɛkɛ ni ekɛɛ Ahab akɛ: ‘Tee shi ni oyaŋɔ eweintrom lɛ.’ Ani okpɛlɛɛɛ nɔ akɛ esa akɛ agbala Izebel toi yɛ nɛkɛ yiwalɛ nii ni efee nɛɛ hewɔ?

Maŋnyɛ Izebel

No hewɔ lɛ, yɛ be ni sa mli lɛ, Yehowa tsu nuu ko ni atsɛɔ lɛ Yehu koni eyagbala etoi. Beni Izebel nu akɛ Yehu miiba lɛ, ediki ehiŋmɛii asɛɛ ni ebɔ mɔdɛŋ koni eha ehe afee fɛo. Shi beni Yehu ba ni ena Izebel yɛ samfɛlɛ lɛ mli lɛ, ekɛɛ hii ni yɔɔ maŋtsɛwe lɛ akɛ: ‘Nyɛshɛa lɛ nyɛfɔa!’ Hii lɛ fee nakai, taakɛ onaa yɛ mfoniri lɛ mli lɛ. Amɛshɛ lɛ amɛfɔ kɛbagbee shi, ni egbo. Nɛkɛ ji bɔ ni Maŋnyɛ Izebel yitsoŋwalɔ lɛ naagbee ba lɛ ha.

1 Maŋtsɛmɛi 16:29-33; 18:1-4; 21:1-16; 2 Maŋtsɛmɛi 9:30-37.



Sanebimɔi

  • Namɔ ji Izebel?
  • Mɛni hewɔ gbi ko lɛ, Maŋtsɛ Ahab fee enii mɔbɔmɔbɔ lɛ?
  • Mɛni Izebel fee koni ehé Nabot weintrom lɛ yɛ edɛŋ eha ewu Ahab?
  • Namɔ Yehowa tsu ni eyagbala Izebel toi?
  • Taakɛ onaa yɛ mfoniri lɛ mli lɛ, mɛni ba be ni Yehu tee Izebel ŋɔɔ yɛ maŋtsɛwe lɛ?

Sanebimɔi ni fata he

  • Kanemɔ 1 Maŋtsɛmɛi 16:29-33 kɛ 18:3, 4.

    Te shihilɛ ni yɔɔ Israel lɛ fite kwraa eha tɛŋŋ yɛ Maŋtsɛ Ahab yinɔ? (1 Maŋ. 14:9)

  • Kanemɔ 1 Maŋtsɛmɛi 21:1-16.

    Nabot jie ekãa kɛ anɔkwayeli kɛha Yehowa kpo yɛ mɛɛ gbɛ nɔ? (1 Maŋ. 21:1-3; 3 Mose 25:23-28)

    Mɛni wɔbaanyɛ wɔkase kɛjɛ Ahab nɔkwɛmɔnɔ lɛ mli yɛ bɔ ni aaafee akpee nijiaŋwujee naa lɛ mli? (1 Maŋ. 21:4; Rom. 5:3-5)

  • Kanemɔ 2 Maŋtsɛmɛi 9:30-37.

    Mɛni wɔbaanyɛ wɔkase kɛjɛ ekãa ni Yehu kɛfeɔ Yehowa suɔmɔnaa nii lɛ mli? (2 Maŋ. 9:4-10; 2 Kor. 9:1, 2; 2 Tim. 4:2)