Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 65: Agbála Maŋtsɛyeli lɛ Mli

Biblia Mli Sane 65: Agbála Maŋtsɛyeli lɛ Mli

ANI ole nɔ hewɔ ni nuu nɛɛ tserɛɔ etade lɛ mli lɛ? Yehowa kɛɛ lɛ ni efee nakai. Nuu nɛɛ ji Nyɔŋmɔ gbalɔ Ahia. Ani ole mɔ ni gbalɔ ji? Eji mɔ ni Nyɔŋmɔ tsɔɔ hiɛ ekɛɔ lɛ nɔ ni baaba wɔsɛɛ.

Ahia kɛ Yerobeam

Yerobeam ji mɔ ni Ahia kɛ wieɔ yɛ biɛ lɛ. Yerobeam ji nuu ni Salomo kɛ etsumaa nitsumɔi lɛ ekomɛi wo edɛŋ koni ekwɛ nɔ. Beni Ahia kɛ Yerobeam kpe yɛ gbɛ nɔ yɛ biɛ lɛ, Ahia fee nɔ ko ni yɔɔ naakpɛɛ. Ejie ehe atade ni ewo lɛ ni etserɛ mli kukuji 12. Ni ekɛɛ Yerobeam akɛ: ‘Hemɔ emli kukuji 10 oha ohe.’ Ani ole nɔ hewɔ ni Ahia kɛ kukuji 10 ha Yerobeam lɛ?

Ahia tsɔɔ mli akɛ, Yehowa baahe maŋtsɛyeli lɛ kɛjɛ Salomo dɛŋ. Ekɛɛ akɛ Yehowa kɛ akutsei 10 baaha Yerobeam. Enɛ tsɔɔ akɛ akutsei enyɔ pɛ baashwɛ kɛha Salomo binuu Rehabeam ni eye amɛnɔ maŋtsɛ.

Beni Salomo nu nɔ ni Ahia kɛɛ Yerobeam lɛ, emli fu waa diɛŋtsɛ. Ebɔ mɔdɛŋ ni egbe Yerobeam. Shi Yerobeam jo foi kɛtee Mizraim. Yɛ be fioo sɛɛ lɛ Salomo bagbo. Eye maŋtsɛ afii 40, shi amrɔ nɛɛ ebinuu Rehabeam ji mɔ ni yeɔ maŋtsɛ. Yerobeam nu he yɛ Mizraim tɔ̃ɔ akɛ Salomo egbo, no hewɔ lɛ eku esɛɛ eba Israel.

Jeee maŋtsɛ kpakpa ji Rehabeam. Eyitsoŋ wa yɛ gbɔmɛi lɛ anɔ fe bɔ ni etsɛ Salomo ji lɛ po. Yerobeam kɛ hii krokomɛi ni abuɔ amɛ lɛ tee Maŋtsɛ Rehabeam ŋɔɔ ni amɛyakɛɛ lɛ ni eyitsoŋ akawa yɛ gbɔmɛi lɛ anɔ babaoo. Shi Rehabeam booo amɛ toi. Yɛ anɔkwale mli lɛ, eyitsoŋ bawa moŋ fe tsutsu lɛ. No hewɔ lɛ gbɔmɛi lɛ wo Yerobeam maŋtsɛ yɛ akutsei 10 lɛ nɔ, shi akutsei enyɔ ni ji Benyamin kɛ Yuda akutsei lɛ ha Rehabeam ye amɛnɔ maŋtsɛ.

Yerobeam sumɔɔɔ ni ewebii lɛ yaa Yerusalem ni amɛyaja Yehowa yɛ esɔlemɔtsu lɛ mli. No hewɔ lɛ efee shika tsinabi amagai enyɔ ni eha akutsei 10 maŋtsɛyeli lɛ mli bii bɔi amɛ jamɔ. Etsɛɛɛ kɛkɛ ni shikpɔŋ lɛ nɔ bayi obɔ kɛ awuiyeli kɛ yiwalɛ.

Haomɔ ba akutsei enyɔ maŋtsɛyeli lɛ hu mli. Yɛ nɔ ni shɛɛɛ afii enumɔ yɛ be mli ni Rehabeam baye maŋtsɛ lɛ sɛɛ lɛ, Mizraim maŋtsɛ lɛ ba koni ekɛ Yerusalem abawu ta. Eloo jwetrii babaoo kɛjɛ Yehowa sɔlemɔwe lɛ kɛtee. No hewɔ lɛ be fioo pɛ mli sɔlemɔtsu lɛ hi shi tamɔ bɔ ni ama lɛ lɛ nɔŋŋ.

1 Maŋtsɛmɛi 11:26-43; 12:1-33; 14:21-31.



Sanebimɔi

  • Te atsɛ́ɔ hii enyɔ ni yɔɔ mfoniri lɛ mli lɛ tɛŋŋ, ni namɛi ni?
  • Mɛni Ahia fee atade ni ewo lɛ, ni mɛni ji nakai nifeemɔ lɛ shishi?
  • Mɛni Salomo bɔ mɔdɛŋ akɛ ebaafee Yerobeam?
  • Mɛni hewɔ gbɔmɛi lɛ wó Yerobeam maŋtsɛ yɛ akutsei nyɔŋma lɛ nɔ lɛ?
  • Mɛni hewɔ Yerobeam fee shika tsinabi amagai enyɔ lɛ, ni mɛni ba shikpɔŋ lɛ nɔ be fioo ko sɛɛ?
  • Mɛni ba akutsei enyɔ maŋtsɛyeli lɛ kɛ Yehowa sɔlemɔtsu ni yɔɔ Yerusalem lɛ nɔ?

Sanebimɔi ni fata he

  • Kanemɔ 1 Maŋtsɛmɛi 11:26-43.

    Mɛɛ gbɔmɔ nɛkɛ Yerobeam ji, ni mɛni Yehowa wo shi akɛ ebaafee eha lɛ kɛji ebo Nyɔŋmɔ kitai lɛ atoi? (1 Maŋ. 11:28, 38)

  • Kanemɔ 1 Maŋtsɛmɛi 12:1-33.

    Mɛni fɔlɔi kɛ asafoŋ onukpai baanyɛ akase kɛjɛ nɔkwɛmɔnɔ gbonyo ni Rehabeam fee yɛ hewalɛ ni akɛtsuɔ nii yɛ gbɛ fɔŋ nɔ lɛ mli? (1 Maŋ. 12:13; Jaj. 7:7; 1 Pet. 5:2, 3)

    Namɛi aŋɔɔ esa akɛ oblahii kɛ oblayei bibii ni yɔɔ ŋmɛnɛ lɛ aya koni amɛná gbɛtsɔɔmɔ ni anyɛɔ akɛ he fɔɔ nɔ be mli ni amɛkpɛɔ amɛyiŋ yɛ shihilɛ mli saji ni hiɛdɔɔ yɔɔ mli lɛ ahe lɛ? (1 Maŋ. 12:6, 7; Abɛi 1:8, 9; 2 Tim. 3:16, 17; Heb. 13:7)

    Mɛni ha Yerobeam fee hei enyɔ kɛha tsinabi amaga jamɔ lɛ, ni enɛ tsɔɔ akɛ ebɛ hemɔkɛyeli kwraa yɛ Yehowa mli yɛ mɛɛ gbɛ nɔ? (1 Maŋ. 11:37; 12:26-28)

    Namɔ nyiɛ akutsei nyɔŋma maŋtsɛyeli lɛ mli bii lɛ ahiɛ be ni amɛtse atua amɛshi anɔkwa jamɔ lɛ? (1 Maŋ. 12:32, 33)