Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 64: Salomo Ma Sɔlemɔtsu Lɛ

Biblia Mli Sane 64: Salomo Ma Sɔlemɔtsu Lɛ

DANI David baagbo lɛ, ekɛ sɔlemɔtsu lɛ maa he gbɛjianɔtoo ni Nyɔŋmɔ kɛha ni akwɛ nɔ ni akɛma Yehowa sɔlemɔtsu lɛ ha Salomo. Salomo bɔi sɔlemɔtsu lɛ maa yɛ enɔyeli afi ni ji ejwɛ lɛ mli, ni ehe afii kpawo kɛ fã dani agbe emaa naa. Hii akpei nyɔŋmai abɔ tsu nii yɛ sɔlemɔtsu lɛ he, ni tsũ lɛ maa hé shika babaoo. Nɔ hewɔ ji akɛ, akɛ shika kɛ jwiɛtɛi babaoo tsu nii yɛ mli.

Sɔlemɔtsu lɛ yɛ tsũi wuji enyɔ, tamɔ bɔ ni kpee buu lɛ yɔɔ lɛ nɔŋŋ. Shi tsũi nɛɛ dara fe kpee buu lɛ nɔ̃ lɛ toi enyɔ. Salomo ha akɛ kpaŋmɔ adeka lɛ ma sɔlemɔtsu lɛ mli tsũ ni yɔɔ mligbɛ lɛ mli, ni akɛ nibii krokomɛi ni akɛtoɔ kpee buu lɛ mli lɛ to tsũ kroko lɛ mli.

Beni agbe sɔlemɔtsu lɛ naa lɛ, aye gbijurɔ wulu ko. Salomo kula shi yɛ sɔlemɔtsu lɛ hiɛ ni esɔle, taakɛ onaa yɛ mfoniri lɛ mli lɛ. Salomo kɛɛ Yehowa akɛ: ‘Naa, ŋwɛi kɛ ŋwɛii amli ŋwɛi nyɛɛɛ bo ato, aahu ni shia ni mima nɛɛ. Shi, Oo mi-Nyɔŋmɔ, ofainɛ bo sɔlemɔ ni owebii lɛ sɔleɔ yɛ biɛ nɛɛ lɛ toi.’

Maŋtsɛ Salomo miisɔle

Beni Salomo gbe esɔlemɔ lɛ naa lɛ, la jɛ ŋwɛi kɛba. Ebashã kooloi ni agbe ni akɛshãa afɔle lɛ. Ni la ko ni kpɛ́ɔ waa ni jɛ Yehowa ŋɔɔ yi sɔlemɔtsu lɛ mli obɔ. Enɛ tsɔɔ akɛ Yehowa miibo toi, ni ehiɛ esɔ sɔlemɔtsu lɛ kɛ Salomo sɔlemɔ lɛ hu. Yɛ kpee buu lɛ najiaŋ lɛ, agbɛnɛ sɔlemɔtsu lɛ batsɔ he ni gbɔmɛi lɛ baa ni amɛbajáa yɛ.

Salomo kɛ nilee ye maŋtsɛ be kakadaŋŋ, ni gbɔmɛi lɛ ná miishɛɛ. Shi Salomo kɛ yei pii ni jɛ maji krokomɛi amli, ní amɛjáaa Yehowa bote gbalashihilɛ mli. Ani oona amɛteŋ mɔ kome ni miijá amaga lɛ? Yɛ naagbee lɛ Salomo ŋamɛi lɛ ha lɛ hu ebɔi nyɔŋmɔi krokomɛi ajamɔ. Ani ole nɔ ni ba beni Salomo fee nakai lɛ? Ekɛ gbɔmɛi lɛ ehiii shi yɛ mlihilɛ mli dɔŋŋ. Eyitsoŋ bawa waa, ni gbɔmɛi lɛ naaa miishɛɛ dɔŋŋ.

Maŋtsɛ Salomo miijá amaga

Enɛ ha Yehowa mli fu Salomo, ni ekɛɛ lɛ akɛ: ‘Mahe maŋtsɛyeli lɛ yɛ odɛŋ ni mikɛbaaha mɔ kroko. Mifeŋ enɛ yɛ be mli ni oyɔɔ wala mli lɛ, shi yɛ obinuu lɛ nɔyeli bei amli. Shi mishɔŋ maŋtsɛyeli lɛ shishibii lɛ fɛɛ kɛjɛŋ obinuu lɛ dɛŋ.’ Ha wɔkwɛ bɔ ni enɛ ba lɛ ha.

1 Kronika 28:9-21; 29:1-9; 1 Maŋtsɛmɛi 5:15-32; 2 Kronika 6:12-42; 7:1-5; 1 Maŋtsɛmɛi 11:9-13.



Sanebimɔi

  • Afii enyiɛ ehé Salomo dani egbe Yehowa sɔlemɔtsu lɛ maa naa, ni mɛni hewɔ tsũ lɛ maa hé shika babaoo lɛ?
  • Tsũi wuji enyiɛ yɔɔ sɔlemɔtsu lɛ mli, ni mɛni akɛma tsũ ni yɔɔ mligbɛ lɛ mli?
  • Be ni agbe sɔlemɔtsu lɛ naa lɛ, mɛni Salomo wie yɛ esɔlemɔ lɛ mli?
  • Yehowa tsɔɔ akɛ ehiɛ esɔ Salomo sɔlemɔ lɛ yɛ mɛɛ gbɛ nɔ?
  • Mɛni Salomo ŋamɛi lɛ ha ebɔi feemɔ, ni mɛni ba Salomo nɔ?
  • Mɛni ha Yehowa mli fu Salomo lɛ, ni mɛni Yehowa kɛɛ lɛ?

Sanebimɔi ni fata he

  • Kanemɔ 1 Kronika 28:9, 10.

    Taakɛ David wiemɔi ni yɔɔ 1 Kronika 28:9, 10 lɛ tsɔɔ lɛ, mɛni esa akɛ wɔkɛ mɔdɛŋbɔɔ afee yɛ wɔ daa gbi shihilɛi amli? (Lala 19:15; Fil. 4:8, 9)

  • Kanemɔ 2 Kronika 6:12-21, 32-42.

    Mɛɛ gbɛ nɔ Salomo tsɔɔ yɛ akɛ Ŋwɛi Flooflo Nyɔŋmɔ lɛ nyɛŋ ahi tsũi ni adesai ma lɛ eko eko mli? (2 Kron. 6:18; Bɔf. 17:24, 25)

    Mɛni Salomo wiemɔi ni yɔɔ 2 Kronika 6:32, 33 lɛ tsɔɔ yɛ Yehowa he? (Bɔf. 10:34, 35; Gal. 2:6)

  • Kanemɔ 2 Kronika 7:1-5.

    Taakɛ bɔ ni Yehowa anunyam ní Israelbii lɛ na lɛ kanya amɛ ni amɛjie eyi lɛ, te esa akɛ bɔ ni Yehowa ejɔɔ ewebii eha lɛ hesusumɔ aná wɔnɔ hewalɛ eha tɛŋŋ ŋmɛnɛ? (2 Kron. 7:3; Lala 22:23; 34:2; 96:2)

  • Kanemɔ 1 Maŋtsɛmɛi 11:9-13.

    Salomo shihilɛ gbɛ lɛ tsɔɔ bɔ ni ehe hiaa ni aye anɔkwa kɛyashi naagbee yɛ mɛɛ gbɛ nɔ? (1 Maŋ. 11:4, 9; Mat. 10:22; Kpoj. 2:10)