Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 63: Maŋtsɛ Salomo Nilelɔ Lɛ

Biblia Mli Sane 63: Maŋtsɛ Salomo Nilelɔ Lɛ

OBLANYO fioo ji Salomo beni ebatsɔ maŋtsɛ lɛ. Esumɔɔ Yehowa, ni enyiɛɔ ŋaawoo kpakpa ni etsɛ David kɛha lɛ lɛ sɛɛ. Yehowa ná Salomo he miishɛɛ, no hewɔ lɛ gbi ko gbɛkɛ lɛ etsɔ lamɔ nɔ ekɛ lɛ wie akɛ: ‘Salomo, mɛni obaasumɔ ni maha bo?’

Salomo ha hetoo akɛ: ‘Yehowa mi-Nyɔŋmɔ, gbekɛ bibioo ji mi, ni mileee bɔ ni ayeɔ maŋtsɛ. No hewɔ lɛ ha mi nilee ni mikɛye owebii lɛ anɔ yɛ gbɛ ni ja nɔ.’

Yehowa ná nɔ ni Salomo bi lɛ he miishɛɛ. No hewɔ lɛ E-kɛɛ akɛ: ‘Akɛni obi nilee shi obiii wala sɛɛkɛlɛ loo ninamɔ hewɔ lɛ, maha bo nilee babaoo fe mɔ fɛɛ mɔ ni ehi shi pɛŋ. Shi masaa maha bo nɔ ni obiko lɛ hu, ninamɔ kɛ anunyam babaoo hu.’

Yɛ no sɛɛ be fioo mli lɛ, yei enyɔ komɛi kɛ sane ko ni mli wa waa ba Salomo ŋɔɔ. Mɔ kome tsɔɔ mli akɛ: ‘Mikɛ yoo nɛɛ fɛɛ yɔɔ shia kome mli. Ni mifɔ binuu, ni no sɛɛ gbii enyɔ lɛ, lɛ hu efɔ binuu. Kɛkɛ ni gbi ko gbɛkɛ lɛ ebi lɛ gbo. Shi beni miwɔ lɛ, ekɛ ebi ni egbo lɛ fɔ̃ mimasɛi ni ewo mibi lɛ. Beni mihiɛ tsɛ̃ ni mikwɛ gbekɛ ni egbo lɛ, mina akɛ jeee mibi lɛ ni.’

Kɛkɛ ni yoo kroko lɛ hu kɛɛ: ‘Dabi! Mibi ji gbekɛ ni hiɛ kã lɛ, ni lɛ ebi ji mɔ ni egbo lɛ!’ Klɛŋklɛŋ yoo lɛ here nɔ akɛ: ‘Dabi! Bo obi ji mɔ ni egbo lɛ, ni mibi ji mɔ ni hiɛ kã lɛ!’ Nɛkɛ ji bɔ ni yei lɛ tao sane lɛ naa. Mɛni ji nɔ ni Salomo baafee?

Etsu ni ayakɔ klante kɛba, ni beni akɛba lɛ, ekɛɛ akɛ: ‘Jaa abifao ni hiɛ kã lɛ mli enyɔ, ni oha amɛteŋ mɔ fɛɛ mɔ fã.’

Gbekɛ lɛ nyɛ diɛŋtsɛ lɛ here nɔ akɛ: ‘Dabi! Ofainɛ kaagbe abifao lɛ. Okɛ lɛ aha lɛ!’ Shi yoo kroko lɛ kɛɛ: ‘Akɛ lɛ akaha wɔteŋ mɔ ko mɔ ko; yaa nɔ ni oja emli enyɔ.’

Maŋtsɛ Salomo miitsu sane ko ni mli wa waa he nii

Yɛ naagbee lɛ, Salomo wie akɛ: ‘Kaagbe abifao lɛ! Okɛ lɛ aha klɛŋklɛŋ yoo lɛ. Lɛ ji enyɛ diɛŋtsɛ.’ Salomo na ele enɛ ejaakɛ gbekɛ lɛ nyɛ diɛŋtsɛ lɛ sumɔɔ abifao lɛ waa akɛ eesumɔ ni ekɛ lɛ aha yoo kroko lɛ ni akagbe lɛ. Beni maŋbii lɛ nu bɔ ni Salomo ye sane lɛ eha lɛ, eŋɔɔ amɛnaa akɛ amɛna maŋtsɛ nilelɔ ni tamɔ nɛkɛ.

Beni Salomo yeɔ maŋtsɛ lɛ, Nyɔŋmɔ jɔɔ gbɔmɛi lɛ ni eha shikpɔŋ lɛ wo ŋmaa, akoko, weintso yibii kɛ agbamii kɛ niyenii krokomɛi babaoo. Gbɔmɛi lɛ woɔ atadei fɛfɛji ni amɛhi shiai kpakpai amli. Nibii kpakpai lɛ fa babaoo kɛha mɔ fɛɛ mɔ fe bɔ ni ehe hiaa amɛ po.

1 Maŋtsɛmɛi 3:3-28; 5:9-14.



Sanebimɔi

  • Mɛɛ sane Yehowa bi Salomo, ni te eha hetoo tɛŋŋ?
  • Akɛni Yehowa ná nɔ ni Salomo bi lɛ he miishɛɛ hewɔ lɛ, mɛni Yehowa wo shi akɛ ebaaha lɛ?
  • Mɛɛ sane ko ni mli wa waa yei enyɔ komɛi kɛba Salomo ŋɔɔ?
  • Taakɛ onaa yɛ mfoniri lɛ mli lɛ, te Salomo ye sane lɛ tɛŋŋ?
  • Te shihilɛ lɛ yɔɔ tɛŋŋ be mli ni Salomo yeɔ maŋtsɛ lɛ, ni mɛni hewɔ?

Sanebimɔi ni fata he

  • Kanemɔ 1 Maŋtsɛmɛi 3:3-28.

    Mɛni hii ni akɛ gbɛnaa nii ewo amɛdɛŋ yɛ Yehowa asafo ni yɔɔ ŋmɛnɛ lɛ mli lɛ baanyɛ akase kɛjɛ Salomo wiemɔi ni jɛ tsui mli ni yɔɔ 1 Maŋtsɛmɛi 3:7 lɛ mli? (Lala 119:105; Abɛi 3:5, 6)

    Nɔ ni Salomo bi lɛ feɔ nɔkwɛmɔnɔ kpakpa yɛ nibii ni sa ni abaanyɛ asɔle yɛ he lɛ he yɛ mɛɛ gbɛ nɔ? (1 Maŋ. 3:9, 11; Abɛi 30:8, 9; 1 Yoh. 5:14)

    Bɔ ni Salomo saa yei enyɔ lɛ ateŋ béi lɛ haa wɔnáa mɛɛ hekɛnɔfɔɔ yɛ Salomo Kpeteŋkpele ni ji Yesu Kristo lɛ wɔsɛɛ be mli nɔyeli lɛ mli? (1 Maŋ. 3:28; Yes. 9:5, 6; 11:2-4)

  • Kanemɔ 1 Maŋtsɛmɛi 5:9-14.

    Mɛɛ gbɛ nɔ Yehowa ha Salomo nibimɔ akɛ eha lɛ toiboo tsui lɛ hetoo yɛ? (1 Maŋ. 5:9)

    Yɛ mɔdɛŋ ni mɛi bɔ koni amɛbabo Salomo nilee lɛ toi hewɔ lɛ, mɛɛ su esa akɛ wɔná yɛ Nyɔŋmɔ Wiemɔ lɛ kasemɔ he? (1 Maŋ. 5:9, 14; Yoh. 17:3; 2 Tim. 3:16)

Ekrokromɛi Hu Nɛ

Salomo He Sane

Ŋɔɔ Biblia mli sane nɛɛ koni okɛkase Maŋtsɛ Salomo he saji komɛi hu.