Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 62: Haomɔ yɛ David Shia Lɛ

Biblia Mli Sane 62: Haomɔ yɛ David Shia Lɛ

BENI David bɔi maŋtsɛyeli yɛ Yerusalem lɛ sɛɛ lɛ, Yehowa ha esraafoi lɛ ye amɛhenyɛlɔi lɛ anɔ kunim shii abɔ. Yehowa ewo shi akɛ ekɛ Kanaan shikpɔŋ lɛ baaha Israelbii lɛ. Ni agbɛnɛ, yɛ naagbee lɛ, shikpɔŋ ni awo amɛ shi yɛ he lɛ fɛɛ ebatsɔ amɛnɔ kɛtsɔ Yehowa yelikɛbuamɔ nɔ.

Nɔyelɔ kpakpa ji David. Esumɔɔ Yehowa. No hewɔ lɛ nibii ni efee klɛŋklɛŋ beni eye Yerusalem nɔ kunim lɛ ateŋ ekome ji akɛ, ekɛ Yehowa kpaŋmɔ adeka lɛ ba jɛmɛ. Ni eetao ni ema sɔlemɔtsu ni ekɛwo mli.

Beni David da yɛ afii amli lɛ, etɔ̃ tɔ̃mɔ ko ni ehiii kwraa. David le akɛ ejaaa akɛ akɔɔ mɔ ko nii. Shi gbi ko gbɛkɛnaashi, beni edamɔ emaŋtsɛwe lɛ yiteŋ lɛ, ekwɛ shikpɔŋ ni ena yoo ko ni he yɔɔ fɛo waa. Egbɛi ji Batsheba, ni ewu ji esraafoi lɛ ateŋ mɔ kome ni gbɛi ji Uria lɛ.

David miitao Batsheba waa, no hewɔ lɛ eha akɛ lɛ ba emaŋtsɛwe lɛ. Ewu etee eewu ta. David kɛ lɛ wɔ ni yɛ sɛɛ mli lɛ yoo lɛ na akɛ ebaafɔ bi. David hao waa diɛŋtsɛ ni etsu ni ayakɛɛ asraafoiatsɛ Yoab ni eha akɛ Uria awo ta lɛ naa he ni abaagbe lɛ yɛ. Beni agbe Uria lɛ, David kɛ Batsheba bote gbalashihilɛ mli.

Yehowa mli fu David waa diɛŋtsɛ. No hewɔ lɛ etsu etsulɔ Natan ni ekɛ lɛ ayawie ehe eshai lɛ ahe. Obaana Natan yɛ jɛmɛ ni ekɛ David miiwie. Edɔ David waa yɛ nɔ ni efee lɛ hewɔ, no hewɔ lɛ Yehowa egbeee lɛ. Shi Yehowa kɛɛ akɛ: ‘Akɛni ofee nɛkɛ nibii fɔji nɛɛ hewɔ lɛ, haomɔi babaoo baaba owe lɛ nɔ.’ Ni mɛɛ haomɔ po ba David nɔ nɛkɛ!

Natan miiwo David ŋaa

Klɛŋklɛŋ lɛ, Batsheba binuu lɛ gbo. Kɛkɛ ni David kromɔbi nuu Amnon nine shɛ enyɛmi yoo Tamar nɔ, ni emɔ lɛ ekãa naa ni ekɛ lɛ wɔ. Enɛ ha David binuu Absalom mli fu waa ni egbe Amnon. Yɛ sɛɛ mli lɛ, maŋbii lɛ babaoo basumɔ Absalom sane, ni eha amɛwo lɛ maŋtsɛ. Yɛ naagbee lɛ, David ye Absalom nɔ kunim yɛ ta mli, ni agbe lɛ. Hɛɛ, haomɔi babaoo ba David nɔ.

Beni enɛɛmɛi fɛɛ yaa nɔ lɛ, Batsheba fɔ binuu ko ni atsɛɔ lɛ Salomo. Beni David egbɔ ni enáaa hewalɛ lɛ, ebinuu Adonija bɔ mɔdɛŋ ni ewo ehe maŋtsɛ. Enɛ hewɔ lɛ David ha osɔfo ko ni atsɛɔ lɛ Zadok fɔse mu eshwie Salomo yiteŋ ni ekɛtsɔɔ akɛ Salomo baaye maŋtsɛ. No sɛɛ lɛ, etsɛɛɛ ni David gbo beni eye afii 70. Ekɛ afii 40 ye maŋtsɛ, shi agbɛnɛ Salomo ji Israel maŋtsɛ.

2 Samuel 11:1-27; 12:1-18; 1 Maŋtsɛmɛi 1:1-48.



Sanebimɔi

  • Yɛ Yehowa yelikɛbuamɔ naa lɛ, mɛni ba Kanaan shikpɔŋ lɛ nɔ yɛ naagbee mli?
  • Mɛni ba gbi ko gbɛkɛnaashi be ni David damɔ emaŋtsɛwe lɛ yiteŋ lɛ?
  • Mɛni hewɔ Yehowa mli fu David waa lɛ?
  • Taakɛ mfoniri lɛ tsɔɔ lɛ, namɔ Yehowa tsu ní ekɛ David ayawie ehe eshai lɛ ahe, ni mɛni nakai nuu lɛ kɛɛ ebaaba David nɔ?
  • Mɛɛ haomɔi ba David nɔ?
  • Namɔ baye Israel nɔ maŋtsɛ yɛ David sɛɛ?

Sanebimɔi ni fata he

  • Kanemɔ 2 Samuel 11:1-27.

    Ní wɔɔtsu nii waa yɛ Yehowa sɔɔmɔ mli lɛ buɔ wɔhe yɛ mɛɛ gbɛ nɔ?

    Mɛni ha David fee esha lɛ, ni mɛɛ kɔkɔbɔɔ enɛ feɔ kɛha Yehowa tsuji ni yɔɔ ŋmɛnɛ lɛ? (2 Sam. 11:2; Mat. 5:27-29; 1 Kor. 10:12; Yak. 1:14, 15)

  • Kanemɔ 2 Samuel 12:1-18.

    Mɛni asafoŋ onukpai kɛ fɔlɔi baanyɛ akase kɛjɛ gbɛ nɔ ni Natan tsɔ ekɛ ŋaawoo ha David lɛ mli? (2 Sam. 12:1-4; Abɛi 12:18; Mat. 13:34)

    Mɛni hewɔ Yehowa kɛ David ye yɛ mɔbɔnalɛ naa lɛ? (2 Sam. 12:13; Lala 32:5; 2 Kor. 7:9, 10)