Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 61: Awo David Maŋtsɛ

Biblia Mli Sane 61: Awo David Maŋtsɛ

SAUL bɔ mɔdɛŋ ekoŋŋ koni enine ashɛ David nɔ. Ehala esraafoi lɛ ateŋ mɛi 3,000 ni he esa ni amɛtee koni amɛyatao lɛ. Ní David ná ele enɛ lɛ, etsu shikpálɔi kɛtee koni amɛyakwɛ he ni Saul kɛ emɛi lɛ ebɔ ŋsara yɛ gbɛkɛ lɛ. Kɛkɛ ni David bi ehii lɛ ateŋ mɛi enyɔ akɛ: ‘Nyɛteŋ namɔ kɛ mi baaya Saul ŋsara lɛ mli?’

David miibo eetsɛ Maŋtsɛ Saul

Abishai ha hetoo akɛ: ‘Mi maya.’ David nyɛmi yoo Zeruia bi ji Abishai. Beni Saul kɛ ehii lɛ wɔɔ lɛ, David kɛ Abishai dɛkɛ shi blɛoo kɛtee ŋsara lɛ mli. Amɛkɔlɔ Saul akpɔlɔ kɛ enu kpulu ni jwere Saul yitso he kpaakpa lɛ. Mɔ ko mɔ ko enaaa amɛ ni anuuu amɛ he hu ejaakɛ amɛ fɛɛ amɛwɔ vii diɛŋtsɛ.

Kwɛmɔ David kɛ Abishai agbɛnɛ. Amɛjo foi, ni amɛyashɛ gɔŋ ko nɔ shweshweeshwe. David bo waa ni ekɛɛ Israel asraafoiatsɛ lɛ akɛ: ‘Abner, mɛni hewɔ obuuu onuŋtsɔ maŋtsɛ lɛ he lɛ? Kwɛmɔ! Nɛgbɛ ekpɔlɔ kɛ enu kpulu lɛ yɔɔ?’

Saul hiɛ tsɛ̃. Enu akɛ David gbee ni, kɛkɛ ni ebi akɛ: ‘David, bo ni lo?’ Ani oona Saul kɛ Abner yɛ shishigbɛ nɛɛ?

David ha Saul hetoo akɛ: ‘Hɛɛ, minuŋtsɔ maŋtsɛ.’ Ni David bi lɛ akɛ: ‘Mɛni hewɔ otaoɔ akɛ onine ashɛ minɔ lɛ? Mɛɛ efɔŋ mifee? Naa okpɔlɔ lɛ, Oo maŋtsɛ. Ha ni ohii lɛ ateŋ mɔ kome abahe.’

Maŋtsɛ Saul kɛ Abner

Saul kpɛlɛ nɔ akɛ: ‘Mifee efɔŋ. Miye kwashiai asane.’ Enɛ hewɔ lɛ David tee, ni Saul ku esɛɛ etee shia. Shi David kɛɛ ehe akɛ: ‘Saul baagbe mi gbi ko yɛ bei nɛɛ amli. Esa akɛ majo foi kɛya Filistibii lɛ ashikpɔŋ lɛ nɔ.’ Ni nakai ji bɔ ni efee. David nyɛ elaka Filistibii lɛ, ni eha amɛhe amɛye akɛ agbɛnɛ eyɛ amɛ gbɛfaŋ.

Yɛ sɛɛ mli lɛ, Filistibii lɛ tee ni amɛkɛ Israelbii lɛ ayawu ta. Agbe Saul kɛ Yonatan fɛɛ yɛ nakai ta lɛ mli. Enɛ ha David ye awerɛho waa, ni eŋma lala ko ni ŋɔɔ, ni ela yɛ mli akɛ: ‘Osane miidɔ mi, minyɛmi Yonatan. Osane eŋɔɔ minaa kɛho!’

Yɛ enɛ sɛɛ lɛ David ku esɛɛ kɛtee Israel ni etee Hebron maŋ lɛ mli. Ni ta te shi yɛ mɛi ni sumɔɔ ni Saul binuu Ishboshet aye maŋtsɛ lɛ kɛ mɛi krokomɛi ni sumɔɔ ni David aye maŋtsɛ lɛ ateŋ. Shi yɛ naagbee lɛ David hii lɛ ye kunim. David eye afii 30 beni awó lɛ maŋtsɛ lɛ. Ekɛ afii kpawo kɛ fã sɔŋŋ ye maŋtsɛ yɛ Hebron. Bihii ni efɔ amɛ yɛ jɛmɛ lɛ ekomɛi agbɛi ji Amnon, Absalom kɛ Adonija.

Be bashɛ ni David kɛ hii lɛ tee koni amɛyaŋɔ maŋ fɛfɛo ko ni atsɛɔ lɛ Yerusalem lɛ. David nyɛmi yoo Zeruia binuu kroko ni atsɛɔ lɛ Yoab ji mɔ ni nyiɛ ta lɛ hiɛ. No hewɔ lɛ, David fee Yoab etatsɛ nukpa ni ekɛwo lɛ nyɔmɔ. Agbɛnɛ David babɔi maŋtsɛyeli yɛ Yerusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Kronika 11:1-9.



Sanebimɔi

  • Mɛni David kɛ Abishai fee be mli ni Saul wɔɔ yɛ eŋsara lɛ mli lɛ?
  • Mɛɛ saji David bi Saul?
  • Nɛgbɛ David tee be ni eshi Saul masɛi lɛ?
  • Mɛni ha David ye awerɛho waa ni eŋma lala ko ni ŋɔɔ lɛ?
  • Afii enyiɛ David eye be ni awó lɛ maŋtsɛ yɛ Hebron lɛ, ni te atsɛ́ɔ ebihii lɛ ekomɛi tɛŋŋ?
  • Yɛ sɛɛ mli lɛ, nɛgbɛ David baye maŋtsɛ yɛ?

Sanebimɔi ni fata he

  • Kanemɔ 1 Samuel 26:1-25.

    Mɛɛ sú David wiemɔi ni yɔɔ 1 Samuel 26:11 lɛ jieɔ lɛ kpo yɛ teokrase gbɛjianɔtoo he? (Lala 37:7; Rom. 13:2)

    Be mli ni wɔbɔɔ mɔdɛŋ waa ni wɔkɛ mɛi aye yɛ mɔbɔnalɛ naa shi amɛjieee hiɛsɔɔ kpo amɛtsɔɔɔ wɔ lɛ, mɛɛ gbɛ nɔ David wiemɔi ni yɔɔ 1 Samuel 26:23 lɛ yeɔ ebuaa wɔ ni wɔhiɛ jwɛŋmɔ ni ja? (1 Maŋ. 8:32; Lala 18:21)

  • Kanemɔ 2 Samuel 1:26.

    Kristofoi ni yɔɔ ŋmɛnɛ lɛ baanyɛ aná ‘suɔmɔ ni mli wa kɛha amɛhe’ tamɔ David kɛ Yonatan nɔ̃ lɛ nɔŋŋ eko yɛ mɛɛ gbɛ nɔ? (1 Pet. 4:8; Kol. 3:14; 1 Yoh. 4:12)

  • Kanemɔ 2 Samuel 5:1-10.

    Afii enyiɛ David kɛye nɔ akɛ maŋtsɛ, ni te ajara be nɛɛ mli aha tɛŋŋ? (2 Sam. 5:4, 5)

    Mɛni ha David shwere waa lɛ, ni enɛ feɔ kaimɔnɔ ko kɛhaa wɔ ŋmɛnɛ yɛ mɛɛ gbɛ nɔ? (2 Sam. 5:10; 1 Sam. 16:13; 1 Kor. 1:31; Fil. 4:13)

Ekrokromɛi Hu Nɛ

David Sheee Gbeyei

Kanemɔ Biblia mli sane ni yɔɔ miishɛɛ nɛɛ koni ole nɔ ni ha David fee ekãa waa lɛ.