Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 60: Abigail kɛ David

Biblia Mli Sane 60: Abigail kɛ David

ANI ole oblayoo fɛfɛo ni baa ekɛ David abakpe lɛ? Egbɛi ji Abigail. Eyɛ jwɛŋmɔ kpakpa, no hewɔ lɛ etsĩ David gbɛ koni ekafee nɔ fɔŋ. Shi dani wɔbaakase enɛ he sane lɛ, ha wɔkwɛ nɔ ni baa David nɔ.

Beni David jo foi kɛjɛ Saul hiɛ lɛ, eyatee ehe yɛ tɛkpolo ko mli. Enyɛmimɛi hii lɛ kɛ weku muu lɛ fɛɛ bafata ehe yɛ jɛmɛ. Gbɔmɛi aaafee 400 ji mɛi ni ba eŋɔɔ lɛ, ni David bafee amɛ hiɛnyiɛlɔ. Ni David tee Moab maŋtsɛ lɛ ŋɔɔ ni eyakɛɛ lɛ akɛ: ‘Ofainɛ ha ni mitsɛ kɛ minyɛ kɛ bo ahi shi yɛ biɛ kɛyashi beyinɔ ni mana nɔ ni baaba minɔ.’ Yɛ sɛɛ mli lɛ David kɛ hii lɛ bɔi amɛhe teemɔ yɛ gɔji lɛ anɔ.

Yɛ enɛ sɛɛ dani David na Abigail. Ewu Nabal ji niiatsɛ ko ni yɔɔ abɔɔ. Eyɛ gwaŋtɛŋi 3,000 kɛ abotiai 1,000. Shi Nabal ji gbɔmɔ fɔŋ waa. Shi eŋa Abigail he yɛ fɛo waa. Agbɛnɛ hu, ele bɔ ni afeɔ nɔ ni ja. Gbi ko lɛ ehere eweku lɛ yiwala po. Ha wɔkwɛ bɔ ni fee ni eba lɛ nakai.

David kɛ ehii lɛ kɛ Nabal eye yɛ mlihilɛ mli. Amɛye amɛbua ni abu etooi lɛ ahe. No hewɔ lɛ gbi ko lɛ David tsu ehii lɛ ekomɛi kɛtee Nabal ŋɔɔ koni eye ebua amɛ. David hii lɛ ba Nabal ŋɔɔ yɛ be mli ni ekɛ mɛi ni yeɔ buaa lɛ lɛ miiku etooi lɛ ahe tsɔi. Gbijurɔ ni, ni Nabal yɛ niyenii kpakpai babaoo diɛŋtsɛ ni ebaaye. No hewɔ lɛ nɛkɛ ji bɔ ni David hii lɛ kɛɛ lɛ: ‘Wɔjie mlihilɛ kpo wɔtsɔɔ bo. Wɔjuko otooi lɛ eko, shi wɔye wɔbua ni akɛkwɛ amɛ nɔ. Agbɛnɛ, ofainɛ, ha wɔ niyenii ni wɔye.’

Nabal kɛɛ: ‘Mikɛ miniyenii haaa hii ni tamɔ nyɛ.’ Ewie yɛ heguɔgbee gbɛ nɔ, ni ewie David he efɔŋ babaoo. Beni hii lɛ ku amɛsɛɛ ni amɛbakɛɛ David lɛ, David mli fu waa diɛŋtsɛ. Ekɛɛ ehii lɛ akɛ: ‘Nyɛkɔlɔa nyɛ klantei lɛ!’ Ni amɛyi gbɛ kɛmiiya koni amɛyagbe Nabal kɛ ehii lɛ.

Nabal hii lɛ ateŋ mɔ kome ni nu heguɔgbee wiemɔi ni Nabal wie lɛ, yakɛɛ Abigail nɔ ni eba lɛ. Amrɔ nɔŋŋ kɛkɛ ni Abigail bua niyenii komɛi anaa oya. Ekɛfimɔ tejii asɛɛ ni eyi gbɛ kɛmiiya. Beni ekɛ David kpe lɛ, eyi shi kɛjɛ eteji lɛ nɔ amrɔ nɔŋŋ, ni ekoto shi yɛ ehiɛ ni ekɛɛ: ‘Ofainɛ, minuŋtsɔ akadi miwu Nabal sɛɛ. Buulu ji lɛ, ni buului asane eyeɔ. Nikeenii ni mikɛbahao nɛ. Ofainɛ hemɔ, ni okɛ nɔ ni eba lɛ ake wɔ.’

Abigail kɛ niyenii miiba ebaha David

David here lɛ nɔ akɛ: ‘Yoo nilelɔ ji bo. Otsĩ minaa koni mikagbe Nabal ni mikɛwo lɛ enɔ fɔŋ feemɔ lɛ he nyɔmɔ. Agbɛnɛ yaa shia yɛ hejɔlɛ mli.’ Yɛ sɛɛ mli, beni Nabal gbo lɛ, Abigail batsɔ̃ David ŋamɛi lɛ ateŋ mɔ kome.

1 Samuel 22:1-4; 25:1-43.



Sanebimɔi

  • Te atsɛ́ɔ yoo ni baa ekɛ David abakpe yɛ mfoniri lɛ mli lɛ tɛŋŋ, ni mɛɛ gbɔmɔ nɛkɛ eji?
  • Namɔ ji Nabal?
  • Mɛni hewɔ David tsu ehii lɛ ekomɛi kɛtee Nabal ŋɔɔ koni ebaye ebua amɛ lɛ?
  • Mɛni Nabal kɛɛ David hii lɛ, ni te David fee enii yɛ he eha tɛŋŋ?
  • Mɛɛ gbɛ nɔ Abigail tsɔɔ yɛ akɛ eji yoo nilelɔ?

Sanebimɔi ni fata he

  • Kanemɔ 1 Samuel 22:1-4.

    David weku lɛ fee nɔkwɛmɔnɔ kpakpa yɛ bɔ ni esa akɛ wɔye wɔbua wɔhe yɛ Kristofoi asafo lɛ mli lɛ yɛ mɛɛ gbɛ nɔ? (Abɛi 17:17; 1 Tes. 5:14)

  • Kanemɔ 1 Samuel 25:1-43.

    Mɛni hewɔ awieee Nabal he ekpakpa kwraa nakai lɛ? (1 Sam. 25:2-5, 10, 14, 21, 25)

    Mɛni ŋamɛi ni ji Kristofoi ni yɔɔ ŋmɛnɛ lɛ baanyɛ akase kɛjɛ Abigail nɔkwɛmɔnɔ lɛ mli? (1 Sam. 25:32, 33; Abɛi 31:26; Efe. 5:24)

    Mɛɛ nibii fɔji enyɔ Abigail tsĩ David naa koni ekafee? (1 Sam. 25:31, 33; Rom. 12:19; Efe. 4:26)

    Mɛɛ gbɛ nɔ bɔ ni David fee enii yɛ Abigail wiemɔi lɛ ahe lɛ yeɔ ebuaa hii ni yɔɔ ŋmɛnɛ lɛ koni amɛná jwɛŋmɔ ni Yehowa hiɛ yɛ yei ahe lɛ eko? (Bɔf. 21:8, 9; Rom. 2:11; 1 Pet. 3:7)

Ekrokromɛi Hu Nɛ

Abigail Fee Enii yɛ Hiɛshikamɔ Mli

Mɛni wɔbaanyɛ wɔkase yɛ gbalashihilɛ gbonyo ni Abigail yabote mli lɛ mli?