Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 59: Nɔ Hewɔ ni Esa akɛ David Ajo Foi

Biblia Mli Sane 59: Nɔ Hewɔ ni Esa akɛ David Ajo Foi

BENI David egbe Goliat sɛɛ lɛ, Israel tatsɛnukpa Abner kɛ lɛ ba Saul ŋɔɔ. Saul ná David he miishɛɛ waa diɛŋtsɛ. Efee lɛ tatsɛ yɛ esraafoi lɛ ateŋ ni ekɛ lɛ ba ni ebahi maŋtsɛ lɛ shia lɛ.

Yɛ sɛɛ mli, beni asraafoi lɛ jɛ amɛkɛ Filistibii lɛ tawuu lɛ mli amɛba lɛ, yei lɛ la akɛ: ‘Saul egbe akpekpei, shi David egbe akpei nyɔŋma-nyɔŋmai.’ Enɛ hã Saul ye awuŋa waa, ejaakɛ awo David hiɛ nyam babaoo fe Saul. Shi Saul bi Yonatan yeee awuŋa. Esumɔɔ David sane waa diɛŋtsɛ, ni David hu sumɔɔ Yonatan sane. No hewɔ lɛ mɛi enyɔ lɛ wo amɛhe shi akɛ amɛbaaya nɔ amɛfee nanemɛi daa gbi.

Maŋtsɛ Saul miifɔ̃ akpɔlɔ

David he esa kɛ kpãa saŋkutswaa waa diɛŋtsɛ, ni Saul sumɔɔ lalai ni etswaa lɛ. Shi gbi ko lɛ Saul awuŋayeli lɛ ha efee nɔ ko ni yɔɔ gbeyei naakpa. Beni David miitswa saŋku lɛ, Saul kɔ ekpɔlɔ lɛ ni efɔ̃ ni ekɛɛ akɛ: ‘Matsu David kɛmɔ gbogbo lɛ!’ Shi David tsi ehe ni akpɔlɔ lɛ esaaa ehe. Yɛ sɛɛ mli lɛ, Saul kɛ ekpɔlɔ lɛ ka David gbee ekoŋŋ, shi enine shɛɛɛ enɔ. No hewɔ lɛ David na ele agbɛnɛ akɛ esa akɛ ekwɛ ehe nɔ jogbaŋŋ.

Ani okaiɔ shi ni Saul wo lɛ? Ekɛɛ ekɛ ebiyoo lɛ baaha nuu ni baagbe Goliat lɛ koni etsɔ eŋa. Yɛ naagbee lɛ Saul kɛɛ David akɛ ekɛ ebiyoo Mikal baaha lɛ akɛ eŋa, shi ja egbe Filistibii henyɛlɔi lɛ ateŋ mɛi 100 dã. Susumɔ enɛ he okwɛ! Saul hiɛ kã nɔ akɛ Filistibii lɛ baagbe David. Shi amɛnyɛɛɛ, no hewɔ lɛ Saul kɛ ebiyoo lɛ ha David akɛ eŋa.

Gbi ko lɛ Saul kɛɛ Yonatan kɛ etsuji lɛ fɛɛ hu akɛ eetao ni egbe David. Shi Yonatan kɛɛ etsɛ akɛ: ‘Kaahao David. Efeko nɔ fɔŋ ko eshiko bo. Yɛ no najiaŋ lɛ, nɔ fɛɛ nɔ ni efee lɛ he eba sɛɛnamɔ kpele kɛha bo. Ekɛ ewala wo oshara kpele mli ni ekɛgbe Goliat, ni beni ona lɛ, ona he miishɛɛ waa.’

David miitsi ehe kɛmiijɛ akpɔlɔ he

Saul bo ebi nuu lɛ toi, ni ewo lɛ shi akɛ efeŋ David efɔŋ ko. Akɛ David ba ekoŋŋ, ni ebasɔmɔ Saul yɛ eshia lɛ mli taakɛ efeɔ be ko ni eho lɛ. Shi kɛlɛ, gbi ko, beni David miitswa saŋku lɛ, Saul fɔ̃ ekpɔlɔ lɛ ekoŋŋ koni eyatsu David. Shi David tsi ehe, ni akpɔlɔ lɛ yatsu gbogbo lɛ. Enɛ ji nɔ ni ji shii etɛ nɔ! David ná ele akɛ esa akɛ ejo foi agbɛnɛ!

Nakai gbɛkɛ lɛ David tee lɛ diɛŋtsɛ eshia. Shi Saul tsu hii komɛi ni amɛyagbe lɛ. Mikal le nɔ ni etsɛ toɔ eyiŋ akɛ ebaafee lɛ. No hewɔ lɛ ekɛɛ ewu lɛ akɛ: ‘Kɛji ojooo foi nyɔɔŋ nɛŋ lɛ, wɔ lɛ obaagbo.’ Mikal ye ebua David ni ejo foi kɛtsɔ samfɛlɛ ko mli yɛ nakai nyɔɔŋ lɛŋ. Aaafee afii kpawo sɔŋŋ ho, ni esa akɛ daa gbi lɛ David atee ehe yɛ he ko koni Saul akana lɛ.

1 Samuel 18:1-30; 19:1-18.



Sanebimɔi

  • Mɛni hewɔ Saul ye David he awuŋa lɛ, shi Saul bi Yonatan sú yɛ srɔto yɛ mɛɛ gbɛ nɔ?
  • Mɛni ba gbi ko be ni David miitswa saŋku eeha Saul lɛ?
  • Mɛni Saul kɛɛ esa akɛ David afee dani eŋɔ ebiyoo Mikal akɛ eŋa, ni mɛni hewɔ Saul wie nakai lɛ?
  • Taakɛ mfoniri lɛ tsɔɔ lɛ, mɛni ba nɔ ni ji shii etɛ nɔ be ni David miitswa saŋku eeha Saul lɛ?
  • Mikal ye ebua kɛhere David yiwala yɛ mɛɛ gbɛ nɔ, ni yɛ no sɛɛ lɛ, mɛni ehe bahia ni David kɛ afii kpawo afee?

Sanebimɔi ni fata he

  • Kanemɔ 1 Samuel 18:1-30.

    Suɔmɔ ni mli wa ni kã David kɛ Yonatan teŋ lɛ feɔ anɔkwa suɔmɔ ni baakã “tooi krokomɛi” lɛ kɛ “asafo kuu bibioo” lɛ teŋ lɛ he okadi yɛ mɛɛ gbɛ nɔ? (1 Sam. 18:1; Yoh. 10:16; Luka 12:32; Zak. 8:23)

    Akɛni Yonatan ji mɔ ni yɔɔ hegbɛ akɛ eyeɔ Saul sɛɛ akɛ maŋtsɛ hewɔ lɛ, mɛɛ gbɛ nɔ 1 Samuel 18:4 jieɔ heshibaa ni sa kadimɔ ni Yonatan yɔɔ kɛha mɔ ni ahala lɛ akɛ maŋtsɛ lɛ kpo yɛ?

    Saul nɔkwɛmɔnɔ lɛ tsɔɔ akɛ awuŋayeli baanyɛ aha mɔ ko afee esha ni hiɛdɔɔ yɔɔ mli yɛ mɛɛ gbɛ nɔ, ni mɛɛ kɔkɔbɔɔ enɛ kɛhaa wɔ? (1 Sam. 18:7-9, 25; Yak. 3:14-16)

  • Kanemɔ 1 Samuel 19:1-17.

    Mɛɛ gbɛ nɔ Yonatan kɛ lɛ diɛŋtsɛ ewala wo oshara mli be ni ewie wiemɔi ni yɔɔ 1 Samuel 19:4, 5 lɛ? (1 Sam. 19:1, 6)

Ekrokromɛi Hu Nɛ

FIM

David—Ekɛ Ehiɛ Fɔ̃ Nyɔŋmɔ Nɔ

David fee nibii komɛi ni esaaa yɛ shihilɛ mli ni ekɛ naagbai babaoo kpe, shi etee nɔ eja Nyɔŋmɔ. Enɔkwɛmɔnɔ kpakpa lɛ baaye abua bo ni oya nɔ oye Nyɔŋmɔ anɔkwa.