Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 58: David kɛ Goliat

Biblia Mli Sane 58: David kɛ Goliat

FILISTIBII lɛ ba ni amɛkɛ Israel abawu ta ekoŋŋ. David nyɛmimɛi hii onukpai etɛ fata Saul asraafoi lɛ ahe agbɛnɛ. No hewɔ lɛ, gbi ko lɛ Ishai kɛɛ David akɛ: ‘Ŋɔɔ mamu kɛ aboloo akwaabɔi fioo ko ni okɛyaha onyɛmimɛi lɛ. Ni okwɛ bɔ ni amɛ yɔɔ.’

Goliat

Beni David shɛ tawuu he lɛ, etee ta lɛ naa koni eyatao enyɛmimɛi hii lɛ. Ni Filistinyo obalaŋ Goliat je kpo koni ebaye Israelbii lɛ ahe fɛo. Nɛkɛ ji bɔ ni efeɔ daa leebi kɛ gbɛkɛ gbii 40 sɔŋŋ nɛ. Ebolɔɔ waa akɛ: ‘Nyɛhalaa nyɛteŋ nuu kome ni ekɛ mi abawua. Kɛ eye kunim ni egbe mi lɛ, no lɛ wɔbaatsɔmɔ nyɛ nyɔji. Shi kɛ miye kunim ni migbe lɛ lɛ, nyɛbaatsɔmɔ wɔ nyɔji. Nyɛhalaa nuu kɛjɛa nyɛteŋ ni ekɛ mi abanɔ ni wɔkwɛ.’

David bi asraafoi lɛ ekomɛi akɛ: ‘Mɛni aaafee aha mɔ ni aaagbe Filistinyo nɛɛ ni eeejie ahorabɔɔ nɛɛ yɛ Israel nɔ lɛ?’

Asraafonyo lɛ here nɔ akɛ: ‘Saul baaha lɛ nii babaoo. Ni ekɛ lɛ diɛŋtsɛ ebiyoo lɛ baaha lɛ akɛ eŋa.’

Shi Israelbii lɛ fɛɛ miishe Goliat gbeyei, ejaakɛ eda waa diɛŋtsɛ. Ekwɔ fe ninetalɔi 9 (aaafee mitai 3), ni eyɛ asraafonyo kroko ni hiɛɔ etsɛŋ ehaa lɛ.

Asraafoi lɛ ekomɛi tee ni amɛyakɛɛ Maŋtsɛ Saul akɛ David miitao ni ekɛ Goliat awu. Shi Saul kɛɛ David akɛ: ‘Onyɛŋ okɛ Filistinyo nɛɛ awu. Gbekɛ kɛkɛ jio, ni lɛ lɛ tawulɔ ji lɛ kɛjɛ egbekɛbiiashi tɔ̃ɔ.’ Ni David ha hetoo akɛ: ‘Oshishibrishi kɛ jata ni bamɔ mitsɛ tooi lɛ, migbe amɛ. Ni nɛkɛ Filistinyo nɛɛ baatsɔ tamɔ amɛteŋ mɔ kome. Yehowa baaye abua mi.’ No hewɔ lɛ Saul kɛɛ akɛ: ‘Yaa, ni Yehowa kɛo aya.’

Ni David tee faa ko naa ni eyahala fɔbitɛi enumɔ ni ekɛwo ekotoku lɛ mli. Ni ekɔ ekromia lɛ ehiɛ edɛŋ, ni eyi mli ní ekɛ obalaŋ lɛ ayakpe. Beni Goliat na lɛ lɛ, ebuuu lɛ. Esusu akɛ ewaŋ kwraa kɛha lɛ akɛ eeegbe David.

David miifɔ̃ akromia

Goliat kɛɛ akɛ: ‘Bo lɛ ba, ni maŋɔ oheloo maha ŋwɛi loofɔji kɛ ŋa nɔ kooloi ni amɛye.’ Shi David kɛɛ akɛ: ‘Bo lɛ ooba miŋɔɔ kɛ klante, kɛ akpɔlɔ kɛ tsɛŋ, shi mi lɛ miiba oŋɔɔ yɛ Yehowa Zebaot gbɛi amli. Ŋmɛnɛ gbi nɛɛ Yehowa aaajieo awo midɛŋ, ni magbeo.’

Kɛkɛ ni David jo foi kɛbɛŋkɛ Goliat. Ni ekɔ fɔbitɛi lɛ ekome kɛjɛ ekotoku lɛ mli, ni ekɛwo ekromia lɛ mli, ni ekɛ ehewalɛ fɛɛ fɔ̃. Fɔbitɛ lɛ tee trɔmɔɔ kɛyatswa Goliat hiɛnaa, ni egbee shi ni egbo! Beni Filistibii lɛ na akɛ amɛ tatsɛ lɛ egbee shi lɛ, amɛ fɛɛ amɛtsɔ amɛhe ni amɛjo foi. Ni Israelbii lɛ jo foi kɛnyiɛ amɛsɛɛ ni amɛye amɛnɔ kunim yɛ ta lɛ mli.

1 Samuel 17:1-54.



Sanebimɔi

  • Goliat ye Israel asraafoi lɛ ahe fɛo yɛ mɛni he?
  • Te Goliat da agbo ha tɛŋŋ, ni mɛni Maŋtsɛ Saul wo shi akɛ ekɛbaaha nuu ni baagbe Goliat lɛ?
  • Mɛni David wie be ni Saul kɛɛ lɛ akɛ enyɛŋ ekɛ Goliat awu akɛni David ji gbekɛ kɛkɛ hewɔ lɛ?
  • David jie hekɛnɔfɔɔ ni eyɔɔ yɛ Yehowa mli lɛ kpo yɛ hetoo ni eha Goliat lɛ mli yɛ mɛɛ gbɛ nɔ?
  • Taakɛ onaa yɛ mfoniri lɛ mli lɛ, mɛni David kɛgbe Goliat, ni mɛni Filistibii lɛ fee yɛ enɛ sɛɛ?

Sanebimɔi ni fata he

  • Kanemɔ 1 Samuel 17:1-54.

    Mɛni ji nɔ titri hewɔ ni David sheee gbeyei lɛ, ni te wɔɔfee tɛŋŋ wɔná ekãa ni eyɔɔ lɛ eko? (1 Sam. 17:37, 45; Efe. 6:10, 11)

    Mɛni hewɔ esa akɛ Kristofoi akpoo akaŋshii mumɔ ni tamɔ Goliat nɔ̃ lɛ be mli ni amɛkɛ amɛhe woɔ shwɛmɔi loo hiɛtserɛjiemɔi amli lɛ? (1 Sam. 17:8; Gal. 5:26; 1 Tim. 4:8)

    David wiemɔi lɛ tsɔɔ akɛ eyɛ hemɔkɛyeli akɛ Nyɔŋmɔ baafi esɛɛ yɛ mɛɛ gbɛ nɔ? (1 Sam. 17:45-47; 2 Kron. 20:15)

    Mɛɛ gbɛ nɔ sane nɛɛ tsɔɔ yɛ akɛ nɔmɔ lɛ jeee tawuu folo ko kɛkɛ ni kã asraafoi akui enyɔ ateŋ, shi moŋ eji ta diɛŋtsɛ ni kã apasa nyɔŋmɔi kɛ anɔkwa Nyɔŋmɔ ni ji Yehowa lɛ teŋ? (1 Sam. 17:43, 46, 47)

    Shwɛɛnii ni afɔ amɛ mu lɛ kaseɔ David nɔkwɛmɔnɔ ni kɔɔ he ní akɛaafɔ Yehowa nɔ lɛ he yɛ mɛɛ gbɛ nɔ? (1 Sam. 17:37; Yer. 1:17-19; Kpoj. 12:17)

Ekrokromɛi Hu Nɛ

David Sheee Gbeyei

Kanemɔ Biblia mli sane ni yɔɔ miishɛɛ nɛɛ koni ole nɔ ni ha David fee ekãa waa lɛ.