Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 57: Nyɔŋmɔ Hala David

Biblia Mli Sane 57: Nyɔŋmɔ Hala David
David miikpɔ̃ toobi

ANI oona nɔ ni eba lɛ? Gbekɛ nuu lɛ ehere toobi bibioo nɛɛ yiwala kɛjɛ oshishibrishi lɛ dɛŋ. Oshishibrishi lɛ ba ni ebamɔ toobi lɛ ni ekɛmiiya ni eyaye lɛ. Shi gbekɛ nuu lɛ jo foi kɛnyiɛ amɛsɛɛ, ni ehe toobi lɛ kɛjɛ oshishibrishi lɛ daaŋ. Ni beni oshishibrishi lɛ te shi edamɔ shi lɛ, gbekɛ nuu lɛ mɔ oshishibrishi lɛ ni egbe lɛ! Yɛ be kroko hu mli lɛ ehere etooi lɛ ekome yiwala kɛjɛ jata ko dɛŋ. Ani ejeee gbekɛ nuu ekãalɔ? Ani ole mɔ ni eji?

Obalanyo David ni. Betlehem maŋ lɛ mli eyɔɔ. Enii ji Obed, Rut kɛ Boaz binuu lɛ. Ani okaiɔ amɛ? Ni David papa ji Ishai. David ji mɔ ni kwɛɔ epapa tooi lɛ. Afɔ David beni Yehowa hala Saul akɛ maŋtsɛ lɛ sɛɛ afii 10.

Be bashɛ ni Yehowa kɛɛ Samuel akɛ: ‘Ŋɔɔ mu krɛdɛɛ ko ni oya Ishai shia lɛ yɛ Betlehem. Mihala ebihii lɛ ekome koni ebaye maŋtsɛ.’ Beni Samuel na Ishai bii lɛ ateŋ onukpa ni ji Eliab lɛ, ekɛɛ akɛ: ‘Eka shi faŋŋ akɛ mɔnɛ ji mɔ ni Yehowa ehala lɛ lɛ.’ Shi Yehowa kɛɛ lɛ akɛ: ‘Kaakwɛ bɔ ni ekwɔ gojoo ni ehe yɔɔ fɛo lɛ. Mihalako lɛ akɛ ebaye maŋtsɛ.’

No hewɔ lɛ Ishai tsɛ ebinuu Abinadab ni ekɛ lɛ ba Samuel ŋɔɔ. Shi Samuel kɛɛ lɛ akɛ: ‘Dabi, Yehowa halako lɛ hu.’ Yɛ esɛɛ lɛ, Ishai kɛ ebinuu Shama hu ba. Samuel kɛɛ lɛ akɛ: ‘Dabi, Yehowa halako lɛ hu.’ Ni Ishai kɛ ebihii kpawo ba Samuel ŋɔɔ, shi Yehowa halaaa amɛteŋ mɔ ko mɔ ko. Samuel bi lɛ akɛ: ‘Gbekɛbii hii lɛ fɛɛ nɛ?’

Ishai kɛɛ lɛ akɛ: ‘Eshwɛ amɛteŋ gbekɛ fe fɛɛ lɛ. Shi ekɛ tooi lɛ eje kpo ni eekwɛ amɛ.’ Beni akɛ David ba lɛ, Samuel na akɛ eji gbekɛ nuu ni he yɔɔ fɛo waa diɛŋtsɛ. Ni Yehowa kɛɛ akɛ: ‘Mɔ lɛ nɛ. Okɛ mu lɛ afɔ lɛ.’ Ni Samuel fee nakai. Be baashɛ ni David baaye Israel nɔ maŋtsɛ.

1 Samuel 17:34, 35; 16:1-13.



Sanebimɔi

  • Te atsɛ́ɔ gbekɛ nuu ni yɔɔ mfoniri lɛ mli lɛ tɛŋŋ, ni te wɔfeɔ tɛŋŋ wɔleɔ akɛ eji ekãalɔ?
  • Nɛgbɛ David hi shi yɛ, ni te atsɛ́ɔ epapa kɛ enii tɛŋŋ?
  • Mɛni hewɔ Yehowa kɛɛ Samuel akɛ eya Ishai shia yɛ Betlehem lɛ?
  • Mɛni ba be ni Ishai kɛ ebihii kpawo lɛ ba Samuel ŋɔɔ lɛ?
  • Be ni akɛ David ba lɛ, mɛni Yehowa kɛɛ Samuel?

Sanebimɔi ni fata he

  • Kanemɔ 1 Samuel 17:34, 35.

    Saji nɛɛ maa nɔ mi akɛ David ji ekãalɔ, ni ekɛ ehe fɔɔ Yehowa nɔ yɛ mɛɛ gbɛ nɔ? (1 Sam. 17:37)

  • Kanemɔ 1 Samuel 16:1-14.

    Mɛɛ gbɛ nɔ Yehowa wiemɔi ni yɔɔ 1 Samuel 16:7 lɛ yeɔ ebuaa wɔ ni wɔkafee mɛi ni kwɛɔ mɛi ahiɛaŋ, koni wɔkpoo jwɛŋmɔ fɔŋ ni aaaná yɛ bɔ ni mɔ ko ji yɛ kponɔgbɛ lɛ hewɔ? (Bɔf. 10:34, 35; 1 Tim. 2:4)

    Mɛɛ gbɛ nɔ Saul nɔkwɛmɔnɔ lɛ tsɔɔ yɛ akɛ kɛ́ Yehowa jie emumɔ krɔŋkrɔŋ lɛ kɛjɛ mɔ ko nɔ lɛ, mumɔ fɔŋ ko loo mligbɛ kanyamɔi kɛha efɔŋfeemɔ bayeɔ najiaŋ? (1 Sam. 16:14; Mat. 12:43-45; Gal. 5:16)

Ekrokromɛi Hu Nɛ

David He Sane

Ekolɛ ole David kɛ Goliat he sane, shi saji krokomɛi yɛ ni obaakase yɛ David he.