Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 56: Saul—Israel Klɛŋklɛŋ Maŋtsɛ

Biblia Mli Sane 56: Saul—Israel Klɛŋklɛŋ Maŋtsɛ
Samuel miifɔ Saul mu akɛ maŋtsɛ

KWƐMƆ Samuel ni miifɔse mu kɛmiishwie nuu lɛ yiteŋ lɛ. Nɛkɛ ji bɔ ni amɛfeɔ mɔ ko koni amɛkɛtsɔɔ akɛ ahala lɛ akɛ maŋtsɛ. Yehowa kɛɛ Samuel ni efɔse mu lɛ eshwie Saul yiteŋ. Eji mu krɛdɛɛ ko ni jeɔ ŋma waa diɛŋtsɛ.

Saul susuuu akɛ esa jogbaŋŋ akɛ awo lɛ maŋtsɛ. Ekɛɛ Samuel akɛ: ‘Benyamin akutso lɛ, ni ji akutso bibioo fe fɛɛ lɛ mli mijɛ. Mɛni hewɔ ni okɛɔ akɛ mafee maŋtsɛ lɛ?’ Yehowa sumɔɔ Saul sane ejaakɛ ekwaaa efeee ehe mɔ agbo kɛ mɔ ni he hiaa. No hewɔ ni E-hala lɛ akɛ maŋtsɛ lɛ.

Shi Saul jeee ohiafo aloo gbɔmɔ bibioo. Ejɛ weku ni amɛyɔɔ shika waa mli, ni ehe yɛ fɛo waa, ni nuu kakadaŋŋ hu ji lɛ. Ekɛ fe mɔ fɛɛ mɔ ni yɔɔ Israel lɛ kɛ nɔ ni miihe ashɛ ninetalɔ kome! Saul joɔ foi waa hu, ni eji nuu ni he wa. Eŋɔɔ gbɔmɛi lɛ anaa akɛ Yehowa ehala Saul akɛ maŋtsɛ. Amɛ fɛɛ amɛbolɔ akɛ: ‘Maŋtsɛ lɛ yi ana wala!’

Israel henyɛlɔi lɛ ahe wa tamɔ tsutsu lɛ. Amɛkã he amɛmiihao Israelbii lɛ waa lolo. Beni awo Saul maŋtsɛ lɛ sɛɛ etsɛɛɛ nɔŋŋ lɛ, Amonbii lɛ ba ní amɛkɛ amɛ abawu ta. Shi Saul bua tai babaoo anaa, ni eye Amonbii lɛ anɔ kunim. Enɛ ha gbɔmɛi lɛ ná miishɛɛ waa akɛ awo Saul maŋtsɛ.

Beni afii lɛ hoɔ kɛyaa lɛ, Saul nyiɛ Israelbii lɛ ahiɛ ni amɛye amɛhenyɛlɔi lɛ anɔ kunim babaoo. Saul yɛ binuu ekãalɔ ko hu ni atsɛɔ lɛ Yonatan. Ni Yonatan ye ebua Israel ni amɛye tai pii amli kunim. Filistibii lɛ ji Israelbii lɛ ahenyɛlɔi ni fe fɛɛ. Gbi ko lɛ, Filistibii akpei akpei abɔ ba ni amɛkɛ Israelbii abawu ta.

Samuel kɛɛ Saul ni emɛ kɛyashi beni ebaaba ebashã afɔle, aloo ni ekɛ nikeenii aha Yehowa. Shi Samuel tsɛ waa dani eba. Saul miishe gbeyei akɛ Filistibii lɛ baaje ta lɛ shishi, no hewɔ lɛ etee nɔ ni lɛ diɛŋtsɛ eshã afɔle lɛ. Yɛ naagbee beni Samuel ba lɛ, ekɛɛ Saul akɛ efee ehe mɔ ni booo wiemɔ toi. Samuel kɛɛ akɛ: ‘Yehowa baahala mɔ kroko koni ebafee maŋtsɛ yɛ Israel.’

Yɛ sɛɛ mli lɛ Saul booo wiemɔ toi ekoŋŋ. No hewɔ lɛ Samuel kɛɛ lɛ akɛ: ‘Ehi akɛ ooobo Yehowa toi moŋ fe ni okɛ too ni ewo fɔ fe fɛɛ aaashã afɔle oha lɛ. Akɛni obooo Yehowa toi hewɔ lɛ, Yehowa haŋ oya nɔ oye Israel nɔ maŋtsɛ dɔŋŋ.’

Wɔbaanyɛ wɔkase nɔ kpakpa ko kɛjɛ enɛ mli. Etsɔɔ wɔ bɔ ni ehe hiaa waa akɛ wɔya nɔ wɔbo Yehowa toi daa gbi. Agbɛnɛ hu, etsɔɔ akɛ gbɔmɔ kpakpa, tamɔ bɔ ni Saul ji tsutsu lɛ, baanyɛ atsake etsɔ gbɔmɔ fɔŋ. Wɔsumɔɔɔ ni wɔtsɔmɔ gbɔmɛi fɔji, aloo jeee nakai?

1 Samuel yitsei 9 kɛyashi 11;13:5-14; 14:47-52; 15:1-35; 2 Samuel 1:23.



Sanebimɔi

  • Mɛni Samuel feɔ yɛ mfoniri lɛ mli lɛ, ni mɛni hewɔ?
  • Mɛni hewɔ Yehowa sumɔɔ Saul sane waa lɛ, ni mɛɛ nuu nɛkɛ eji?
  • Te atsɛ́ɔ Saul binuu lɛ tɛŋŋ, ni mɛni ebinuu lɛ fee?
  • Mɛni hewɔ Saul diɛŋtsɛ shã afɔle lɛ moŋ fe nɔ ni eeemɛ ni Samuel aba ni ebashã lɛ?
  • Mɛɛ nibii wɔbaanyɛ wɔkase kɛjɛ saji ni kɔɔ Saul he lɛ amli?

Sanebimɔi ni fata he

  • Kanemɔ 1 Samuel 9:15-21 kɛ 10:17-27.

    Mɛɛ gbɛ nɔ Saul heshibaa sú lɛ ye ebua lɛ ni etsi ehe kɛjɛ oyaiyeli ni ekɛaatɔ owele he be ni hii komɛi wie wiemɔi ni bulɛ bɛ mli yɛ ehe lɛ? (1 Sam. 9:21; 10:21, 22, 27; Abɛi 17:27)

  • Kanemɔ 1 Samuel 13:5-14.

    Mɛɛ esha Saul fee yɛ Gilgal? (1 Sam. 10:8; 13:8, 9, 13)

  • Kanemɔ 1 Samuel 15:1-35.

    Mɛɛ esha ni hiɛdɔɔ yɔɔ mli Saul fee yɛ ekɛ Amalekbii amaŋtsɛ Agag sane lɛ mli? (1 Sam. 15:2, 3, 8, 9, 22)

    Saul bɔ mɔdɛŋ koni ejie enaa ní ekɛ enifeemɔ lɛ he sɔ̃yeli lɛ afɔ̃ mɛi krokomɛi anɔ yɛ mɛɛ gbɛ nɔ? (1 Sam. 15:24)

    Mɛɛ kɔkɔbɔɔ esa akɛ wɔbo toi ŋmɛnɛ be ni awoɔ wɔ ŋaa lɛ? (1 Sam. 15:19-21; Lala 141:5; Abɛi 9:8, 9; 11:2)