Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 34: Niyenii Hee Ko

Biblia Mli Sane 34: Niyenii Hee Ko

ANI obaanyɛ otsɔɔ nɔ ni gbɔmɛi lɛ halaa yɛ shikpɔŋ lɛ? Etamɔ bɔ́ ni enɛ eshwie shi ni ewa. Eyɛɔ futaa, ni eyɛ fɛtɛfɛtɛ hu. Shi jeee bɔ́ ni ewa ni; nɔ ko ni ayeɔ ni.

Israelbii ni miiloo mana

Aaafee nyɔŋ kome pɛ nɛ ní Israelbii lɛ shi Mizraim. Amɛyɛ ŋa lɛ nɔ. Niyenii fioo ko pɛ nyɛɔ ekwɛ̃ɔ yɛ biɛ, no hewɔ lɛ gbɔmɛi lɛ bɔi huhuuhu wiemɔ akɛ: ‘Wɔná ni kulɛ Yehowa gbe wɔ yɛ Mizraim moŋ. Kɛ hoo kwraa lɛ, wɔná niyenii fɛɛ ni wɔtao lɛ eko yɛ jɛmɛ.’

No hewɔ lɛ Yehowa kɛɛ akɛ: ‘Maha niyenii anɛ kɛjɛ ŋwɛi ashwie shi.’ Ni nakai ji bɔ ni Yehowa fee. Enɔ jetsɛremɔ beni Israelbii lɛ na akɛ nii futaa nɛɛ jwere shi lɛ, amɛbɔi amɛhe bimɔ akɛ: ‘Mɛni nɛ?’

Mose kɛɛ akɛ: ‘Niyenii ni Yehowa eha koni nyɛye lɛ nɛ.’ Ni gbɔmɛi lɛ tsɛ lɛ MANA. Eŋɔɔmɔ tamɔ tatale ni akɛ wo fee.

Mose kɛɛ gbɔmɛi lɛ akɛ: ‘Mɔ fɛɛ mɔ aloo bɔ ni ekome ebaanyɛ eye pɛ.’ No hewɔ lɛ daa leebi lɛ, nɛkɛ ji bɔ ni amɛfeɔ. Kɛkɛ lɛ, kɛ hulu lɛ naa wa lɛ, mana ni eshwɛ yɛ shikpɔŋ lɛ sereɔ.

Mose kɛɛ kɛfata he hu akɛ: ‘Mɔ ko akashwɛ mana lɛ eko ni je tsɛre nɔ.’ Shi gbɔmɛi lɛ ateŋ mɛi komɛi booo lɛ toi. Ani ole nɔ ni ba? Beni je tsɛre lɛ, mana ni amɛshwɛ lɛ fɛɛ ewo gɔgɔmi, ni esha!

Shi kɛlɛ, otsi lɛ mli gbi kome yɛ ni Yehowa kɛɛ gbɔmɛi lɛ akɛ nakai gbi lɛ nɔ lɛ amɛbua mana lɛ toi enyɔ naa. Gbi ni ji ekpaa lɛ nɛ. Ni Yehowa kɛɛ amɛ koni amɛshwɛ eko amɛha enɔ jetsɛremɔ, ejaakɛ ehaŋ eko anɛ yɛ gbi ni ji kpawo lɛ nɔ. Kɛ amɛshwɛ mana lɛ eko kɛha gbi ni ji kpawo lɛ, ewooo gɔgɔmi ni eshaaa hu! Naakpɛɛ nii kroko hu nɛ!

Yehowa kɛ mana lɛ Israelbii lɛ yɛ afii abɔ ni amɛkɛhi ŋa lɛ nɔ lɛ fɛɛ mli.

2 Mose 16:1-36; 4 Mose 11:7-9; Yoshua 5:10-12.



Sanebimɔi

  • Yɛ mfoniri lɛ mli lɛ, mɛni gbɔmɛi lɛ halaa yɛ shikpɔŋ lɛ, ni te atsɛ́ɔ lɛ tɛŋŋ?
  • Mɛɛ famɔ Mose kɛha gbɔmɛi lɛ yɛ mana lɛ halamɔ he?
  • Mɛni Yehowa kɛɛ gbɔmɛi lɛ akɛ amɛfee yɛ gbi ni ji ekpaa lɛ nɔ, ni mɛni hewɔ?
  • Mɛɛ naakpɛɛ nii Yehowa feɔ kɛ́ akɛ mana lɛ eko to kɛha gbi ni ji kpawo lɛ?
  • Bei enyiɛ Yehowa kɛ mana lɛ̀ gbɔmɛi lɛ?

Sanebimɔi ni fata he

  • Kanemɔ 2 Mose 16:1-36 kɛ 4 Mose 11:7-9.

    Mɛni 2 Mose 16:8 tsɔɔ yɛ bɔ ni ehe hiaa ni wɔkɛ bulɛ aha mɛi ni atsɔ teokrase nɔ ahala amɛ yɛ Kristofoi asafo lɛ mli lɛ he? (Heb. 13:17)

    Mɛɛ gbɛ nɔ atsɔ akai Israelbii lɛ daa gbi yɛ ŋa lɛ nɔ, yɛ bɔ ni esa akɛ amɛkɛ amɛhe afɔ Yehowa nɔ lɛ he? (2 Mose 16:14-16, 35; 5 Mose 8:2, 3)

    Te Yesu kɛ okadifeemɔ shishinumɔ tsɔɔ mana lɛ mli eha tɛŋŋ, ni nɛkɛ “aboloo ni jɛ ŋwɛi” nɛɛ he baa sɛɛnamɔ kɛhaa wɔ yɛ mɛɛ gbɛ nɔ? (Yoh. 6:31-35, 40)

  • Kanemɔ Yoshua 5:10-12.

    Afii enyiɛ Israelbii lɛ kɛye mana, enɛ ka amɛ yɛ mɛɛ gbɛ nɔ, ni mɛni wɔbaanyɛ wɔkase kɛjɛ sane nɛɛ mli? (2 Mose 16:35; 4 Mose 11:4-6; 1 Kor. 10:10, 11)