Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 55: Gbekɛ Nuu Bibioo ko Sɔmɔ Nyɔŋmɔ

Biblia Mli Sane 55: Gbekɛ Nuu Bibioo ko Sɔmɔ Nyɔŋmɔ

GBEKƐ nuu nɛɛ he yɛ fɛo waa, aloo jeee nakai? Egbɛi ji Samuel. Ni nuu ni kɛ enine efɔ̃ Samuel yiteŋ lɛ ji Israel osɔfonukpa Eli. Samuel papa Elkana kɛ emami Hana ji mɛi ni kɛ Samuel baa abaha Eli lɛ.

Samuel miiba osɔfonukpa Eli ŋɔɔ

Samuel eye aaafee afii ejwɛ loo afii enumɔ pɛ. Shi ekɛ Eli kɛ osɔfoi krokomɛi lɛ baahi Yehowa kpee buu lɛ mli yɛ biɛ. Mɛni hewɔ ni Elkana kɛ Hana kɛ gbekɛ ni edako, tamɔ Samuel eba ni ebasɔmɔ Yehowa yɛ kpee buu lɛ mli lɛ? Ha wɔkwɛ.

Afii fioo ko dani be nɛɛ shɛ lɛ, Hana ye awerɛho waa. Nɔ hewɔ ji akɛ, enyɛɛɛ efɔ bi, ni eetao bi waa diɛŋtsɛ. No hewɔ lɛ, gbi ko beni Hana tee Yehowa kpee buu lɛ mli lɛ, esɔle akɛ: ‘Oo Yehowa, kaaha ohiɛ miikpa minɔ! Kɛ oha mi binuu lɛ, miiwo bo shi akɛ mikɛ lɛ baaha bo koni esɔmɔ bo ewala gbii abɔ fɛɛ.’

Yehowa ha Hana sɔlemɔ lɛ hetoo, ni nyɔji fioo sɛɛ lɛ, efɔ Samuel. Hana sumɔɔ ebinuu fioo lɛ sane waa, ni ebɔi lɛ Yehowa he nii tsɔɔmɔ beni eji gbekɛ bibioo po lɛ. Ekɛɛ ewu akɛ: ‘Kɛ Samuel da bɔ ni sa ni mitse lɛ fufɔ nɔŋŋ lɛ, mikɛ lɛ baaya kpee buu lɛ mli koni eyasɔmɔ Yehowa yɛ jɛmɛ.’

No ji nɔ ni wɔnaa ni Hana kɛ Elkana feɔ yɛ mfoniri lɛ mli lɛ. Ni akɛni Samuel fɔlɔi etsɔɔ lɛ nii jogbaŋŋ hewɔ lɛ, eŋɔɔ enaa waa akɛ ebaanyɛ esɔmɔ Yehowa yɛ Yehowa buu nɛɛ mli. Daa afi lɛ, Hana kɛ Elkana baa ni amɛbajáa yɛ nɛkɛ buu krɛdɛɛ nɛɛ mli, ni amɛbasaraa amɛbinuu lɛ. Ni daa afi lɛ, Hana kɛ atade yuu ni lɛ diɛŋtsɛ ekpɛ lɛ bahaa Samuel.

Beni afii lɛ hoɔ kɛyaa lɛ, Samuel tee nɔ esɔmɔ yɛ Yehowa kpee buu lɛ mli, ni Yehowa kɛ maŋbii lɛ fɛɛ sumɔɔ esane waa. Shi osɔfonukpa Eli bihii lɛ, Hofni kɛ Pinehas jeee gbɔmɛi kpakpai. Amɛfeɔ nibii fɔji pii, ni amɛhaa mɛi krokomɛi hu gboɔ Yehowa nɔ toi. Esa akɛ kulɛ Eli ajie amɛ koni amɛkaye osɔfoi dɔŋŋ, shi efeee nakai.

Obalanyo Samuel haaa nibii fɔji ni afeɔ yɛ kpee buu lɛ mli lɛ eko aha ekpa Yehowa sɔɔmɔ. Shi akɛni mɛi fioo ko pɛ sumɔɔ Yehowa waa diɛŋtsɛ hewɔ lɛ, Yehowa kɛ adesa diɛŋtsɛ ko wie étsɛ naakpa. Beni Samuel da fioo lɛ, naa nɔ ni ba:

Samuel ewɔ yɛ kpee buu lɛ mli ni gbee ko tsĩɛ lɛ. Ehere nɔ akɛ: ‘Naa mi.’ Ni ete shi ni ejo foi kɛtee Eli ŋɔɔ, ni ekɛɛ lɛ akɛ: ‘Otsɛ mi, naa mi.’

Shi Eli ha lɛ hetoo akɛ: ‘Mitsɛko bo; yaa ni oyakã shi ni owɔ.’ No hewɔ lɛ Samuel ku esɛɛ ni eyakã shi ni ewɔ.

Kɛkɛ ni gbee lɛ tsɛ lɛ nɔ ni ji shii enyɔ nɔ: ‘Samuel!’ No hewɔ lɛ Samuel te shi ni ejo foi kɛtee Eli ŋɔɔ. Ekɛɛ lɛ akɛ: ‘Otsɛ mi, naa mi.’ Shi Eli ha lɛ hetoo akɛ: ‘Mitsɛko bo mibi. Yaa ni oyakã shi.’ No hewɔ lɛ Samuel ku esɛɛ eyakã shi.

Gbee lɛ tsɛ lɛ nɔ ni ji shii etɛ nɔ akɛ ‘Samuel!’ No hewɔ lɛ Samuel jo foi kɛtee Eli ŋɔɔ. Ekɛɛ lɛ akɛ: ‘Naa mi, ejaakɛ agbɛnɛ bo ji mɔ ni tsɛɔ mi lɛ.’ Agbɛnɛ Eli na ele akɛ Yehowa ji mɔ ni tsɛɔ lɛ lɛ. No hewɔ lɛ ekɛɛ Samuel akɛ: ‘Yaa ni oyakã shi ekoŋŋ, ni kɛ etsɛ bo ekoŋŋ lɛ, kɛɛmɔ akɛ: “Wiemɔ, Yehowa, shi otsulɔ miibo toi.”’

Nɛkɛ ji bɔ ni Samuel kɛɛ beni Yehowa tsɛ lɛ ekoŋŋ lɛ. Ni Yehowa kɛɛ Samuel akɛ ebaagbala Eli kɛ ebihii lɛ atoi. Yɛ sɛɛ mli lɛ Hofni kɛ Pinehas gboi yɛ ta ni amɛkɛ Filistibii lɛ wu lɛ mli, ni beni Eli nu nɔ ni eba lɛ he lɛ, ekpa egbee shi ni eku ekuɛ ni lɛ hu egbo. No hewɔ lɛ Yehowa wiemɔ lɛ ba mli anɔkwale.

Samuel bada, ni ebatsɔ Israel naagbee kojolɔ. Beni eda lɛ, maŋbii lɛ bakɛɛ lɛ akɛ: ‘Wó maŋtsɛ oha wɔ koni eye wɔ nɔ.’ Samuel sumɔɔɔ akɛ efeɔ enɛ, ejaakɛ yɛ anɔkwale mli lɛ Yehowa ji amɛ maŋtsɛ. Shi Yehowa kɛɛ lɛ akɛ ebo nɔ ni maŋbii lɛ kɛɔ lɛ toi.

1 Samuel 1:1-28; 2:11-36; 4:16-18; 8:4-9.



Sanebimɔi

  • Te atsɛ́ɔ gbekɛ nuu bibioo ni yɔɔ mfoniri lɛ mli lɛ tɛŋŋ, ni namɛi fata ehe lɛ?
  • Mɛni he Hana sɔle yɛ be ko be ni etee Yehowa kpeebuu lɛ mli lɛ, ni te Yehowa ha lɛ hetoo eha tɛŋŋ?
  • Afii enyiɛ Samuel eye beni aŋɔ lɛ kɛtee ní eyasɔmɔ yɛ Yehowa kpeebuu lɛ mli lɛ, ni daa afi lɛ mɛni emami feɔ ehaa lɛ?
  • Te atsɛ́ɔ Eli bihii lɛ tɛŋŋ, ni mɛɛ gbɔmɛi nɛkɛ amɛji?
  • Mɛɛ gbɛ nɔ Yehowa tsɔ etsɛ́ Samuel, ni mɛɛ shɛɛ sane E-kɛha lɛ?
  • Mɛni Samuel batsɔ be ni ebada lɛ, ni mɛni ba be ni egbɔ lɛ?

Sanebimɔi ni fata he

  • Kanemɔ 1 Samuel 1:1-28.

    Mɛɛ nɔkwɛmɔnɔ kpakpa Elkana fee efɔ shi eha wekuyitsei yɛ bɔ ni anyiɛɔ hiɛ yɛ anɔkwa jamɔ nifeemɔi amli lɛ mli? (1 Sam. 1:3, 21; Mat. 6:33; Fil. 1:10)

    Mɛni wɔbaanyɛ wɔkase kɛjɛ Hana nɔkwɛmɔnɔ ni efee yɛ bɔ ni atsuɔ naagba ni mli wa waa he nii ahaa lɛ mli? (1 Sam. 1:10, 11; Lala 55:23; Rom. 12:12)

  • Kanemɔ 1 Samuel 2:11-36.

    Yɛ mɛɛ gbɛ nɔ Eli kɛ bulɛ ha ebihii lɛ fe Yehowa, ni enɛ baanyɛ efee kɔkɔbɔɔ kɛha wɔ yɛ mɛɛ gbɛ nɔ? (1 Sam. 2:22-24, 27, 29; 5 Mose 21:18-21; Mat. 10:36, 37)

  • Kanemɔ 1 Samuel 4:16-18.

    Mɛɛ oshara saji srɔtoi ejwɛ akɛjɛ ta lɛ naa kɛba, ni te esa Eli he eha tɛŋŋ?

  • Kanemɔ 1 Samuel 8:4-9.

    Israel tɔ̃ Yehowa nɔ waa yɛ mɛɛ gbɛ nɔ, ni te wɔɔfee tɛŋŋ wɔkɛ anɔkwayeli afi e-Maŋtsɛyeli lɛ sɛɛ ŋmɛnɛ? (1 Sam. 8:5, 7; Yoh. 17:16; Yak. 4:4)

Ekrokromɛi Hu Nɛ

Samuel Tee nɔ Efee Nɔ ni Ja

Te ooofee tɛŋŋ okase Samuel ni ofee nibii ni ja kɛ́ mɛi krokomɛi miifee nibii gbohii po?

‘Etee nɔ Eda yɛ Yehowa Hiɛ’

Mɛɛ nɔ ko ni efɔɔɔ kaa ba yɛ Samuel shihilɛ mli be ni eji gbekɛ lɛ? Be ni eyɔɔ sɔlemɔwe lɛ, mɛni ye ebua lɛ kɛwaje ehemɔkɛyeli lɛ?