Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 54: Nuu ni He Wa Fe Fɛɛ

Biblia Mli Sane 54: Nuu ni He Wa Fe Fɛɛ

ANI ole nuu ni he wa fe fɛɛ ni ehi shi pɛŋ lɛ gbɛi? Lɛ ji kojolɔ ni atsɛɔ lɛ Samson lɛ. Yehowa ji mɔ ni haa Samson ehewalɛ lɛ. Beni afɔko Samson po lɛ, Yehowa kɛɛ emami akɛ: ‘Etsɛŋ ni obaaná binuu. Lɛ ebaanyiɛ hiɛ ni ebaahere Israelbii lɛ ayiwala kɛjɛ Filistibii lɛ adɛŋ.’

Samson kɛ jata miinɔ

Filistibii lɛ ji gbɔmɛi gbohii ni yɔɔ Kanaan shikpɔŋ lɛ nɔ lɛ. Amɛyɛ hii ni wuɔ ta babaoo, ni amɛhao Israelbii lɛ waa. Gbi ko, beni Samson nyiɛ gbɛ kɛmiiya he ni Filistibii lɛ yɔɔ lɛ, jata agbo ko wo foi kɛ bolɔmɔ ni ekɛ lɛ abakpe. Shi Samson gbe jata lɛ kɛ enine folo pɛ. Egbe Filistibii gbɔmɛi fɔji lɛ ateŋ mɛi ohai abɔ hu.

Yɛ sɛɛ mli lɛ Samson baná suɔmɔ kɛha oblayoo ko ni atsɛɔ lɛ Delila lɛ. Filistibii ahiɛnyiɛlɔi lɛ wo Delila shi akɛ amɛteŋ mɔ fɛɛ mɔ baaha lɛ jwiɛtɛi kukuji 1,100 kɛ́ etsɔɔ amɛ nɔ ni haa Samson he waa waa lɛ. Delila miitao shika nɛɛ fɛɛ. Ejeee Samson, aloo Nyɔŋmɔ webii lɛ anɔkwa naanyo. No hewɔ lɛ etee nɔ ebi Samson nɔ ni haa ni ehe waa waa lɛ.

Delila kɛ Samson

Yɛ naagbee lɛ, Delila ha Samson tsɔɔ lɛ nɔ ni ji teemɔŋ sane yɛ ehewalɛ lɛ he lɛ. Ekɛɛ lɛ akɛ: ‘Akuko miyitsɔi dã. Kɛjɛ be mli ni afɔ mi lɛ, Nyɔŋmɔ hala mi akɛ etsulɔ krɛdɛɛ ko ni atsɛɔ lɛ akɛ Nazirnyo. Kɛ aku miyitsɔi lɛ, mibalaaje mihewalɛ lɛ.’

Ojogbaŋŋ, beni Delila nu enɛ lɛ, eha Samson wɔ yɛ eshwuɔ nɔ. Ni eha nuu ko ba ni ebaku eyitsɔi lɛ fɛɛ. Beni Samson hiɛ tsɛ̃ lɛ, ena akɛ elaaje ehewalɛ lɛ. Ni Filistibii lɛ ba ni amɛbamɔ lɛ kɛtee. Amɛfãmɔ ehiŋmɛii enyɔ lɛ fɛɛ, ni amɛfee lɛ amɛnyɔŋ.

Samson miikumɔ akulashiŋi lɛ eeshwie shi

Gbi ko lɛ Filistibii lɛ ŋmɛ niyeli okpɔlɔ wulu ko ni amɛkɛbaaja amɛ nyɔŋmɔ Dagon, ni amɛyajie Samson kɛjɛ tsũ lɛ mli koni amɛye ehe fɛo. Yɛ nakai be lɛ mli lɛ, Samson yitsɔi lɛ etsa ekoŋŋ. Samson kɛɛ gbekɛ ni hiɛ enine mli ni ekɛ lɛ yaa lɛ akɛ: ‘Ha ni matara akulashiŋi ni tsũ lɛ ma nɔ lɛ ahe makwɛ.’ Kɛkɛ ni Samson sɔle eha Yehowa koni eha lɛ hewalɛ, ni emɔ akulashiŋi lɛ amli. Ni ebo waa akɛ: ‘Ha mi kɛ Filistibii lɛ agbo.’ Filistibii 3,000 yɔɔ nakai okpɔlɔŋmɛɛ lɛ shishi, ni beni Samson dɔ emli kɛ ehewalɛ fɛɛ kɛtsi akulashiŋi lɛ, tsũ lɛ kumɔ eshwie shi ni egbe nɛkɛ gbɔmɛi fɔji nɛɛ fɛɛ.

Kojolɔi yitsei 13 kɛyashi 16.



Sanebimɔi

  • Te atsɛ́ɔ nuu ni he wa fe fɛɛ ni ehi shi pɛŋ lɛ tɛŋŋ, ni namɔ ha lɛ ehewalɛ lɛ?
  • Taakɛ onaa yɛ mfoniri lɛ mli lɛ, gbi ko lɛ, mɛni Samson fee jata agbo ko?
  • Mɛɛ teemɔŋ sane ko Samson kɛɔ Delila yɛ mfoniri lɛ mli lɛ, ni mɛɛ gbɛ nɔ enɛ ha Filistibii lɛ bamɔ lɛ kɛtee?
  • Te fee tɛŋŋ ni Samson nyɛ egbe ehenyɛlɔi Filistibii 3,000 lɛ yɛ gbi nɔ ni egbo lɛ?

Sanebimɔi ni fata he

  • Kanemɔ Kojolɔi 13:1-14.

    Manoa kɛ eŋa fee nɔkwɛmɔnɔ kpakpa efɔ shi kɛha fɔlɔi yɛ amɛbii lɛ atsɔsemɔ mli yɛ mɛɛ gbɛ nɔ? (Koj. 13:8; Lala 127:3; Efe. 6:4)

  • Kanemɔ Kojolɔi 14:5-9 kɛ 15:9-16.

    Mɛni ji nɔ ni Samson he saji ni kɔɔ jata ni egbe, taŋkpeei heei ni akɛfimɔ lɛ lɛ ní etserɛ mli, kɛ teji kadaa ni ekɛgbe hii 1,000 lɛ ahe lɛ jieɔ lɛ kpo yɛ bɔ ni Yehowa mumɔ krɔŋkrɔŋ lɛ tsuɔ nii ehaa lɛ he?

    Mumɔ krɔŋkrɔŋ lɛ yeɔ ebuaa wɔ ŋmɛnɛ yɛ mɛɛ gbɛ nɔ? (Koj. 14:6; 15:14; Zak. 4:6; Bɔf. 4:31)

  • Kanemɔ Kojolɔi 16:18-31.

    Te naanyobɔɔ fɔŋ ná Samson nɔ hewalɛ eha tɛŋŋ, ni mɛni wɔbaanyɛ wɔkase kɛjɛ enɛ mli? (Koj. 16:18, 19; 1 Kor. 15:33)

Ekrokromɛi Hu Nɛ

Samson he sane

Kanemɔ koni ona nɔ ni hã Samson he wa nakai lɛ.