Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 53: Yefta Shiwoo Lɛ

Biblia Mli Sane 53: Yefta Shiwoo Lɛ
Yefta biyoo lɛ

ANI owo shi dã ni yɛ sɛɛ mli lɛ ona akɛ ewa waa kɛha bo akɛ oooye shiwoo lɛ nɔ? Nuu ni yɔɔ mfoniri nɛɛ mli lɛ fee nakai, ni no hewɔ ni enii efee mɔbɔ lɛ. Nuu nɛɛ ji Israel kojolɔ ekãalɔ ko ni atsɛɔ lɛ Yefta.

Yefta hi shi yɛ be ni Israelbii lɛ jaaa Yehowa dɔŋŋ lɛ mli. Amɛmiifee nibii ni ehiii lɛ ekoŋŋ. No hewɔ lɛ Yehowa ha Amonbii lɛ hao amɛ. Enɛ ha Israelbii lɛ bolɔ amɛtsɛ Yehowa akɛ: ‘Wɔfee esha wɔshio. Ofainɛ, heremɔ wɔyiwala!’

Yefta kɛ ehii lɛ

Gbɔmɛi lɛ shwa amɛhe yɛ nifɔjianii ni amɛfee lɛ hewɔ. Amɛja Yehowa ekoŋŋ ni amɛkɛtsɔɔ akɛ amɛshwa amɛhe. No hewɔ lɛ Yehowa ye ebua amɛ ekoŋŋ.

Gbɔmɛi lɛ hala Yefta ni ekɛ Amonbii gbɔmɛi gbohii lɛ ayawu. Yefta miitao waa ni Yehowa aye abua lɛ yɛ ta lɛ mli. No hewɔ lɛ ewo Yehowa shi akɛ: ‘Kɛ oha miye Amonbii lɛ anɔ kunim lɛ, no lɛ mikɛ mɔ klɛŋklɛŋ ni baaje kpo kɛjɛ mishia lɛ mli ni ekɛ mi abakpe yɛ misɛɛkuu mli yɛ mikunimyeli lɛ mli lɛ baaha bo.’

Yehowa bo Yefta shiwoo lɛ toi, ni eye ebua lɛ ni eye kunim. Beni Yefta ku esɛɛ kɛba shia lɛ, ani ole mɔ ni ji mɔ klɛŋklɛŋ ni je kpo ekɛ lɛ bakpe? Ebiyoo, ni ji ebi kome too pɛ lɛ. Yefta bo akɛ: ‘Oo, mibiyoo! Mɛɛ awerɛho sane okɛbaa minɔ nɛɛ. Shi miwo Yehowa shi, ni minyɛŋ magbala sɛɛ.’

Beni Yefta biyoo lɛ nu eshiwoo lɛ, klɛŋklɛŋ lɛ, lɛ hu eye awerɛho. Ejaakɛ no tsɔɔ akɛ ebaashi epapa kɛ enanemɛi fɛɛ. Shi ekɛ ewala bei abɔ ni eshwɛ lɛ fɛɛ baasɔmɔ Yehowa yɛ ekpee buu lɛ mli yɛ Shilo. No hewɔ lɛ ekɛɛ epapa akɛ: ‘Kɛ́ owo Yehowa shi lɛ, esa akɛ oye nɔ.’

No hewɔ lɛ, Yefta biyoo lɛ tee Shilo, ni ekɛ ewala gbii abɔ ni eshwɛ lɛ sɔmɔ Yehowa yɛ jɛmɛ yɛ ekpee buu lɛ mli. Yei ni yɔɔ Israel lɛ yaa jɛmɛ gbii ejwɛ yɛ afi mli ni amɛyasaraa lɛ, ni amɛkɛ lɛ naa miishɛɛ. Gbɔmɛi lɛ sumɔɔ Yefta biyoo lɛ ejaakɛ eji Yehowa sɔɔlɔ kpakpa waa.

Kojolɔi 10:6-18; 11:1-40.



Sanebimɔi

  • Namɔ ji Yefta, ni mɛɛ be mli ehi shi?
  • Yefta wo Yehowa shi yɛ mɛni he?
  • Mɛni hewɔ Yefta ye awerɛho be ni eyaye Amonbii lɛ anɔ kunim ni eku esɛɛ kɛba shia lɛ?
  • Mɛni Yefta biyoo lɛ kɛɛ beni enu epapa shiwoo lɛ?
  • Mɛni hewɔ gbɔmɛi lɛ sumɔɔ Yefta biyoo lɛ?

Sanebimɔi ni fata he

  • Kanemɔ Kojolɔi 10:6-18.

    Mɛɛ kɔkɔbɔɔ esa akɛ wɔbo toi yɛ sane ni tsɔɔ anɔkwa ni Israelbii lɛ yeee Yehowa lɛ mli? (Koj. 10:6, 15, 16; Rom. 15:4; Kpoj. 2:10)

  • Kanemɔ Kojolɔi 11:1-11, 29-40.

    Te wɔfeɔ tɛŋŋ wɔleɔ akɛ biyoo ni Yefta kɛha akɛ “shãa afɔle” lɛ etsɔɔɔ akɛ abaashã lɛ yɛ la mli tamɔ akɛ kooloo shãa afɔle lɛ? (Koj. 11:31; 3 Mose 16:24; 5 Mose 18:10, 12)

    Yefta kɛ ebiyoo lɛ ha akɛ afɔleshãa nɔ̃ yɛ mɛɛ gbɛ nɔ?

    Mɛni wɔbaanyɛ wɔkase kɛjɛ sú ni Yefta yɔɔ yɛ shiwoo ni ekɛha Yehowa lɛ he lɛ mli? (Koj. 11:35, 39; Jaj. 5:3, 4; Mat. 16:24)

    Yefta biyoo lɛ ji nɔkwɛmɔnɔ kpakpa kɛha Kristofoi oblahii kɛ oblayei yɛ be-fɛɛ sɔɔmɔ lɛ ni amɛbaatiu sɛɛ akɛ amɛnitsumɔ lɛ mli yɛ mɛɛ gbɛ nɔ? (Koj. 11:36; Mat. 6:33; Fil. 3:8)