Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 52: Gideon kɛ Ehii 300 Lɛ

Biblia Mli Sane 52: Gideon kɛ Ehii 300 Lɛ

ANI oona nɔ ni yaa nɔ yɛ biɛ lɛ? Israel hii tabilɔi sɔŋŋ nɛ. Hii ni ekula shi lɛ miinu nu. Kojolɔ Gideon ji nuu ni damɔ amɛmasɛi kpaakpa lɛ. Eekwɛ bɔ ni amɛfeɔ amɛnuɔ nu lɛ.

Kwɛmɔ gbɛi srɔtoi anɔ ni hii lɛ tsɔɔ amɛnuɔ nu lɛ jogbaŋŋ. Mɛi komɛi emamɔ amɛhiɛaŋ shi kɛwo nu lɛ mli tɔ̃ɔ. Shi amɛteŋ mɔ kome kɛ enine tsɔɔ nu lɛ ni enuɔ, koni enyɛ ena nɔ ni yaa nɔ yɛ ehewɔ fɛɛ kɛkpe. Enɛ he miihia, ejaakɛ Yehowa kɛɛ Gideon akɛ ehala hii ni kwɛɔ nii beni amɛnuɔ nu lɛ pɛ. Mɛi ni eshwɛ lɛ, Nyɔŋmɔ kɛɛ eha amɛya shia. Nyɛhaa wɔkwɛa nɔ hewɔ.

Israelbii lɛ ebote haomɔ babaoo mli ekoŋŋ. Nɔ hewɔ ji akɛ, amɛbooo Yehowa toi. Midianbii lɛ ena hewalɛ yɛ amɛnɔ ni amɛmiiye amɛ awui. No hewɔ lɛ Israelbii lɛ bolɔ amɛtsɛ Yehowa koni eye ebua amɛ, ni Yehowa bo amɛbolɔmɔ lɛ toi.

Yehowa kɛɛ Gideon koni ehala asraafoi, no hewɔ lɛ Gideon bua hii tabilɔi 32,000 naa. Shi tabilɔi ni baa amɛkɛ Israelbii lɛ abawu lɛ ayifalɛ ji 135,000. Ni kɛlɛ Yehowa kɛɛ Gideon akɛ: ‘Mɛi ni ohala lɛ ayi fa tsɔ̃.’ Mɛni hewɔ Yehowa kɛɛ nakai lɛ?

Nɔ hewɔ ji akɛ, kɛ Israelbii lɛ ye kunim lɛ amɛbaasusu akɛ amɛ diɛŋtsɛ amɛhewalɛ naa amɛye kunim lɛ yɛ. Amɛbaasusu akɛ Yehowa yelikɛbuamɔ he ehiaaa amɛ ni amɛkɛye kunim lɛ. No hewɔ lɛ Yehowa kɛɛ Gideon akɛ: ‘Kɛɛmɔ hii ni sheɔ gbeyei lɛ fɛɛ ni amɛku amɛsɛɛ amɛya shia.’ Ní Gideon kɛɛ amɛ nɛkɛ lɛ, ehii tabilɔi lɛ ateŋ mɛi 22,000 tee shia. Enɛ ha eshwɛ lɛ kɛ hii 10,000 pɛ ni baawu ashi asraafoi 135,000 lɛ fɛɛ.

Gideon miika ehii lɛ

Shi, bo toi! Yehowa kɛɛ akɛ: ‘Hii ni ohiɛ lɛ ayi fa tsɔ̃ lolo.’ No hewɔ lɛ ekɛɛ Gideon ni eha hii lɛ ayanu nu yɛ nɛkɛ faa nɛɛ mli koni eha hii lɛ ateŋ mɛi fɛɛ ni kɛ amɛhiɛ baabumɔ nu lɛ mli ni amɛnu lɛ aku amɛsɛɛ amɛya shia. Yehowa wo lɛ shi akɛ: ‘Maha oye kunim kɛ hii 300 ni kwɛɔ nii beni amɛnuɔ nu lɛ.’

Be bashɛ ni akɛbaawu ta lɛ. Gideon ja ehii 300 lɛ amli efee amɛ kui etɛ. Ni eha amɛ fɛɛ tɛtɛrɛmantɛrɛi kɛ kpuji ni kɔtii hɔlɔ mli. Beni eshɛ nyɔɔŋ teŋ lɛ, amɛ fɛɛ amɛbua amɛhe naa yɛ amɛ henyɛlɔi lɛ aŋsara lɛ he kɛkpe. Kɛkɛ ni, yɛ be kome mli lɛ, amɛkpã amɛ tɛtɛrɛmantɛrɛi lɛ ni amɛjwara amɛkpuji lɛ ni amɛbolɔ waa amɛkɛɛ: ‘Yehowa kɛ Gideon klante!’ Ní asraafoi henyɛlɔi lɛ ahiɛ tsɛ̃ lɛ, amɛyiŋ futu amɛ, ni amɛshe gbeyei. Amɛ fɛɛ amɛbɔi foijee, ni Israelbii lɛ ye kunim yɛ ta lɛ mli.

Kojolɔi yitsei 6 kɛyashi 8.



Sanebimɔi

  • Te fee tɛŋŋ ni Israelbii lɛ bote haomɔ babaoo mli lɛ, ni mɛni hewɔ?
  • Mɛni hewɔ Yehowa kɛɛ Gideon akɛ asraafoi ni ehala lɛ ayi fa tsɔ̃ lɛ?
  • Mɛi enyiɛ eshwɛ beni Gideon kɛɛ hii ni sheɔ gbeyei lɛ akɛ amɛku amɛsɛɛ amɛya shia lɛ?
  • Kwɛmɔ mfoniri lɛ, ni otsɔɔ bɔ ni Yehowa fee etse Gideon asraafoi lɛ ayifalɛ lɛ nɔ kɛbashɛ hii 300 pɛ lɛ mli.
  • Te Gideon to ehii 300 lɛ ahe gbɛjianɔ eha tɛŋŋ, ni mɛɛ gbɛ nɔ Israel tsɔ eye kunim yɛ ta lɛ mli?

Sanebimɔi ni fata he

  • Kanemɔ Kojolɔi 6:36-40.

    Gideon ná nɔmimaa yɛ Yehowa suɔmɔnaa nii he yɛ mɛɛ gbɛ nɔ?

    Te wɔɔfee tɛŋŋ wɔle Yehowa suɔmɔnaa nii ŋmɛnɛ? (Abɛi 2:3-6; Mat. 7:7-11; 2 Tim. 3:16, 17)

  • Kanemɔ Kojolɔi 7:1-25.

    Mɛni wɔbaanyɛ wɔkase kɛjɛ hii 300 ni hiɛ yɔɔ amɛhe nɔ lɛ anɔkwɛmɔnɔ lɛ mli, kɛ́ wɔkɛ amɛ to mɛi ni hiɛ kãaa shi lɛ anɔ̃ lɛ he lɛ? (Koj. 7:3, 6; Rom. 13:11, 12; Efe. 5:15-17)

    Taakɛ mɛi 300 lɛ kase nii kɛtsɔ amɛhiŋmɛii ni amɛkɛkwɛ Gideon lɛ nɔ lɛ, mɛɛ gbɛ nɔ wɔ hu wɔɔtsɔ wɔkase nii kɛtsɔ wɔhiŋmɛii ni wɔkɛaakwɛ Yesu Kristo ni ji Gideon Kpeteŋkpele lɛ nɔ? (Koj. 7:17; Mat. 11:29, 30; 28:19, 20; 1 Pet. 2:21)

    Mɛɛ gbɛ nɔ Kojolɔi 7:21 lɛ yeɔ ebuaa wɔ koni wɔkɛ miishɛɛ asɔmɔ yɛ he fɛɛ he ni akɛaaha wɔ yɛ Yehowa asafo lɛ mli lɛ? (1 Kor. 4:2; 12:14-18; Yak. 4:10)

  • Kanemɔ Kojolɔi 8:1-3.

    Be mli ni wɔtsuɔ béi ni kã wɔkɛ nyɛmi nuu loo nyɛmi yoo ko teŋ lɛ he nii lɛ, mɛni wɔbaanyɛ wɔkase kɛjɛ gbɛ nɔ ni Gideon tsɔ esaa béi ni kã ekɛ Efraimbii lɛ ateŋ lɛ mli? (Abɛi 15:1; Mat. 5:23, 24; Luka 9:48)