Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 51: Rut kɛ Naomi

Biblia Mli Sane 51: Rut kɛ Naomi

OBAANA wolo ko ni atsɛɔ lɛ Rut yɛ Biblia lɛ mli. Eji sane ko ni kɔɔ weku ko ni hi shi beni Israel yɔɔ kojolɔi lɛ he. Rut ji oblayoo ko ni jɛ Moab shikpɔŋ lɛ nɔ; efataaa Nyɔŋmɔ maŋ ni ji Israel he. Shi beni Rut kase anɔkwa Nyɔŋmɔ Yehowa he sane lɛ, ebasumɔ esane waa diɛŋtsɛ. Naomi ji yoo onukpa ko ni ye ebua Rut, ni ekase Yehowa he nii.

Israel yoo ji Naomi. Lɛ kɛ ewu kɛ amɛbihii enyɔ fã kɛtee Moab shikpɔŋ lɛ nɔ yɛ be mli ni anaaa niyenii yɛ Israel lɛ. Kɛkɛ ni gbi ko lɛ Naomi wu bagbo. Yɛ sɛɛ mli lɛ Naomi bihii enyɔ lɛ kɛ Moab oblayei enyɔ ni atsɛɔ amɛ Rut kɛ Orpa bote gbalashihilɛ mli. Shi aaafee afii 10 sɛɛ lɛ, Naomi bihii enyɔ lɛ hu bagboi. Kwɛ bɔ ni Naomi kɛ oblayei enyɔ lɛ anii baafee mɔbɔ aha! Agbɛnɛ mɛni Naomi baafee?

Gbi ko lɛ Naomi kpɛ eyiŋ akɛ ebaafã gbɛ kakadaŋŋ lɛ ekoŋŋ kɛku esɛɛ kɛya ewebii aŋɔɔ. Rut kɛ Orpa miitao ni amɛkɛ lɛ ahi shi, no hewɔ lɛ amɛkɛ lɛ yi mli kɛmiiya. Shi beni amɛfã gbɛ kɛtee fioo yɛ gbɛ lɛ nɔ lɛ, Naomi tsɔ ehiɛ eha oblayei lɛ ni ekɛɛ amɛ akɛ: ‘Nyɛkua nyɛsɛɛ kɛyaa shia ni nyɛkɛ nyɛmamimɛi ayahi shi.’

Naomi shɔ oblayei lɛ anaa ni ekɛ amɛ ye shɛɛ. Kɛkɛ ni amɛbɔi yaafo, ejaakɛ amɛsumɔɔ Naomi sane waa diɛŋtsɛ. Amɛkɛɛ lɛ akɛ: ‘Dabi! Wɔkɛ bo baaya omaŋbii lɛ aŋɔɔ.’ Shi Naomi ha amɛ hetoo akɛ: ‘Nyɛkua nyɛsɛɛ, mibiyei. Ebaahi eha nyɛ yɛ shia.’ No hewɔ lɛ Orpa ku esɛɛ ni eyiŋ kɛtee shia. Shi Rut ekuuu esɛɛ.

Naomi tsɔ ehiɛ ni ekɛɛ lɛ akɛ: ‘Orpa etee. Bo hu okɛ lɛ aya shia.’ Shi Rut ha lɛ hetoo akɛ: ‘Kaabɔ mɔdɛŋ ni oshwie mi ni oha mishi bo! Ha ni mikɛ bo aya. He ni obaaya lɛ, jɛmɛ maya, ni he ni obaahi lɛ, jɛmɛ mi hu mahi. Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ. He ni obaagbo yɛ lɛ, jɛmɛ magbo yɛ, ni jɛmɛ ji he ni abaafu mi yɛ.’ Beni Rut kɛɛ lɛ nɛkɛ sɛɛ lɛ, Naomi ebɔɔɔ mɔdɛŋ dɔŋŋ akɛ ebaaha eya shia.

Yɛ naagbee lɛ yei enyɔ lɛ yashɛ Israel. Biɛ ji he ni amɛyahi kwraa. Amrɔ nɔŋŋ kɛkɛ ni Rut bɔi nitsumɔ yɛ ŋmɔ mli, ejaakɛ nakai be lɛ ji be ni akɛkpaa akoko. Nuu ko ni atsɛɔ lɛ Boaz ŋmɛ lɛ gbɛ koni ebabua akoko naa yɛ eŋmɔ mli. Ani ole mɔ ni ji Boaz mami? Lɛ ji Rahab ni jɛ Yeriko maŋ lɛ mli lɛ.

Gbi ko lɛ Boaz kɛɛ Rut akɛ: ‘Minu ohe saji fɛɛ, kɛ bɔ ni ojie mɔbɔnalɛ kpo otsɔɔ Naomi lɛ. Mile bɔ ni oshi opapa kɛ omami kɛ bo diɛŋtsɛ omaŋ ni oba koni obahi maŋ kɛ gbɔmɛi ni oleee amɛ lɛ ateŋ. Yehowa afee bo ejurɔ!’

Rut ha lɛ hetoo akɛ: ‘Mihiɛ eba nyam yɛ ohiɛ, minuŋtsɔ. Oshɛje mimii, ni okɛ oweyoo ewie yɛ mlihilɛ mli.’ Boaz miisumɔ Rut sane naakpa, no hewɔ lɛ etsɛɛɛ kwraa ni amɛbote gbalashihilɛ mli. Kwɛ bɔ ni enɛ ha Naomi na miishɛɛ waa eha! Shi Naomi na miishɛɛ kɛteke nɔ beni Rut kɛ Boaz fɔ amɛkromɔ binuu ni atsɛɔ lɛ Obed lɛ. Yɛ sɛɛ mli lɛ Obed batsɔ David, mɔ ni wɔbaakase ehe saji babaoo yɛ sɛɛ mli lɛ nii.

Rut kɛ Naomi

Biblia mli wolo ni ji Rut.



Sanebimɔi

  • Te fee tɛŋŋ ni Naomi bahi Moab shikpɔŋ lɛ nɔ?
  • Namɛi ji Rut kɛ Orpa?
  • Be ni Naomi kɛɛ Rut kɛ Orpa akɛ amɛku amɛsɛɛ kɛya amɛmaŋbii lɛ aŋɔɔ lɛ, te amɛhere nɔ amɛha tɛŋŋ?
  • Namɔ ji Boaz, ni eye ebua Rut kɛ Naomi yɛ mɛɛ gbɛ nɔ?
  • Te atsɛ́ɔ bi ní Boaz kɛ Rut fɔ lɛ tɛŋŋ, ni mɛni hewɔ esa akɛ wɔkai lɛ lɛ?

Sanebimɔi ni fata he

  • Kanemɔ Rut 1:1-17.

    Mɛɛ anɔkwa suɔmɔ he miishɛjemɔ wiemɔi Rut wie? (Rut 1:16, 17)

    Sú ni Rut jie lɛ kpo lɛ tamɔ nɔ ni “tooi krokomɛi” lɛ jieɔ lɛ kpo amɛtsɔɔ mɛi ni afɔ amɛ mu ni yɔɔ shikpɔŋ nɔ ŋmɛnɛ lɛ pɛpɛɛpɛ yɛ mɛɛ gbɛ nɔ? (Yoh. 10:16; Zak. 8:23)

  • Kanemɔ Rut 2:1-23.

    Rut fee nɔkwɛmɔnɔ kpakpa kɛha oblayei ni yɔɔ ŋmɛnɛ lɛ yɛ mɛɛ gbɛ nɔ? (Rut 2:17, 18; Abɛi 23:22; 31:15)

  • Kanemɔ Rut 3:5-13.

    Te Boaz bu suɔmɔ ni Rut yɔɔ akɛ ekɛ lɛ baabote gbalashihilɛ mli moŋ fe nɔ ni ekɛ oblanyo aaahi shi lɛ eha tɛŋŋ?

    Mɛni Rut subaŋ lɛ tsɔɔ wɔ yɛ anɔkwa suɔmɔ he? (Rut 3:10; 1 Kor. 13:4, 5)

  • Kanemɔ Rut 4:7-17.

    Kristofoi hii ni yɔɔ ŋmɛnɛ lɛ baanyɛ afee amɛnii tamɔ Boaz yɛ mɛɛ gbɛ nɔ? (Rut 4:9, 10; 1 Tim. 3:1, 12, 13; 5:8)

Ekrokromɛi Hu Nɛ

Rut Ji Naanyo Anɔkwafo

Eyɛ mli akɛ Rut jeee Israelnyo moŋ, shi esuɔmɔ ni tsakeee lɛ sa Nyɔŋmɔ hiɛ ni ajɔɔ lɛ.