Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 50: Yei Ekãalɔi Enyɔ

Biblia Mli Sane 50: Yei Ekãalɔi Enyɔ

KƐJI akɛ Israelbii lɛ bote haomɔ mli lɛ, amɛtsɛɔ Yehowa. Yehowa haa amɛ hetoo ni ehaa amɛ hiɛnyiɛlɔi ni yɔɔ ekãa. Biblia lɛ tsɛɔ nɛkɛ hiɛnyiɛlɔi nɛɛ akɛ kojolɔi. Yoshua ji klɛŋklɛŋ kojolɔ, ni kojolɔi ni nyiɛ esɛɛ kɛba lɛ ekomɛi agbɛi ji Otniel, Ehud kɛ Shamgar. Shi mɛi ni ye amɛbua Israel lɛ ateŋ mɛi enyɔ lɛ yei ni, ni atsɛɔ amɛ Debora kɛ Yael.

Debora kɛ Barak miiwie

Debora lɛ, gbalɔyoo ji lɛ. Yehowa kɛ wɔsɛɛ be he sane haa lɛ, ni lɛ ekɛɔ maŋbii lɛ nɔ ni Yehowa kɛɔ lɛ. Kojolɔ hu ji Debora. Etaa tɛŋ ko shishi yɛ maŋ lɛ gɔŋ ko nɔ, ni gbɔmɛi lɛ baa eŋɔɔ ni amɛbataoɔ yelikɛbuamɔ kɛhaa amɛnaagbai lɛ.

Nakai beaŋ lɛ, Yabin ji Kanaanbii amaŋtsɛ. Eyɛ ta shwiilii 900. Esraafoi lɛ ahe wa waa, no hewɔ lɛ enɛ nyɛ Israelbii lɛ pii anɔ ni amɛtsɔmɔ nyɔji amɛha Yabin. Maŋtsɛ Yabin asraafoi atsɛ lɛ gbɛi ji Sisera.

Gbi ko lɛ Debora tsu ni ayatsɛ Kojolɔ Barak abaha lɛ, ni ekɛɛ lɛ akɛ: ‘Yehowa kɛɛ: “Halamɔ hii 10,000 ni onyiɛ amɛhiɛ kɛya Tabor Gɔŋ lɛ nɔ. Makpala Sisera kɛba oŋɔɔ yɛ jɛmɛ. Ni maha oye lɛ kɛ etai lɛ fɛɛ nɔ kunim.”’

Barak kɛɛ Debora akɛ: ‘Maya kɛji akɛ bo hu obaafata mihe kɛya.’ Debora kɛ lɛ tee, shi ekɛɛ Barak akɛ: ‘Kɛ wɔye kunim lɛ, akɛ yijiemɔ lɛ haŋ bo, ejaakɛ Yehowa baajie Sisera awo yoo dɛŋ.’ Ni nɛkɛ ji bɔ ni eba lɛ.

Barak kpeleke shi kɛjɛ Tabor Gɔŋ lɛ nɔ koni ekɛ Sisera asraafoi lɛ ayakpe. Amrɔ nɔŋŋ kɛkɛ ni Yehowa ha nu afua ko ba, ni henyɛlɔi lɛ asraafoi lɛ babaoo mii nu. Shi Sisera yi shi kɛjɛ eshwiili lɛ mli ni ejo foi.

Barak, Yael, kɛ Sisera

Yɛ be fioo ko sɛɛ lɛ, Sisera ba Yael buu lɛ he. Yoo lɛ fɔ̃ lɛ nine kɛba mli, ni eha lɛ fufɔ. Enɛ ha wɔ bɔi lɛ yeli, ni etsɛɛɛ pɛ kɛkɛ ni ewɔ vii. Kɛkɛ ni Yael kɔ shiŋmlitso ni eka ewo nuu gbonyo nɛɛ yitsoŋ kɛmɔ shikpɔŋ. Yɛ sɛɛ mli beni Barak ba lɛ, eyatsɔɔ lɛ Sisera ni eka shi ni egbo! No hewɔ lɛ obaana akɛ nɔ ni Debora wie lɛ eba mli anɔkwale.

Yɛ naagbee lɛ, agbe Maŋtsɛ Yabin hu, ni Israelbii lɛ ná toiŋjɔlɛ ekoŋŋ yɛ be fioo ko mli.

Kojolɔi 2:14-22; 4:1-24; 5:1-31.



Sanebimɔi

  • Namɛi ji kojolɔi lɛ, ni te atsɛ́ɔ amɛteŋ mɛi komɛi tɛŋŋ?
  • Mɛɛ hegbɛ krɛdɛɛ Debora yɔɔ, ni mɛni fata enɛ he?
  • Be mli ni Maŋtsɛ Yabin kɛ etatsɛnukpa Sisera wo Israelbii lɛ ahe gbeyei lɛ, mɛɛ Yehowa wiemɔ Debora kɛha Kojolɔ Barak, ni namɔ ekɛɛ akɛ yijiemɔ lɛ baaha?
  • Mɛɛ gbɛ nɔ Yael tsɔɔ yɛ akɛ eji yoo ni yɔɔ ekãa?
  • Be mli ni Maŋtsɛ Yabin gbo lɛ, mɛni ba?

Sanebimɔi ni fata he

  • Kanemɔ Kojolɔi 2:14-22.

    Te fee tɛŋŋ ni Israelbii lɛ ha Yehowa mli fu amɛ, ni mɛni wɔkaseɔ kɛjɛɔ enɛ mli? (Koj. 2:20; Abɛi 3:1, 2; Ezek. 18:21-23)

  • Kanemɔ Kojolɔi 4:1-24.

    Mɛɛ nibii ni kɔɔ hemɔkɛyeli kɛ ekãafeemɔ he Kristofoi yei ni yɔɔ ŋmɛnɛ lɛ baanyɛ akase kɛjɛ Debora kɛ Yael nɔkwɛmɔnɔ lɛ mli? (Koj. 4:4, 8, 9, 14, 21, 22; Abɛi 31:30; 1 Kor. 16:13)

  • Kanemɔ Kojolɔi 5:1-31.

    Mɛɛ gbɛ nɔ abaanyɛ akɛ Barak kɛ Debora kunimyeli lala lɛ atsu nii akɛ sɔlemɔ yɛ Harmagedon ta ni baa lɛ he? (Koj. 5:3, 31; 1 Kron. 16:8-10; Kpoj. 7:9, 10; 16:16; 19:19-21)