Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 48: Gibeonbii ni Le Nii Lɛ

Biblia Mli Sane 48: Gibeonbii ni Le Nii Lɛ

AGBƐNƐ maji ni yɔɔ Kanaan lɛ ateŋ babaoo esaa amɛhe akɛ amɛkɛ Israel baawu ta. Amɛsusuɔ akɛ amɛbaanyɛ amɛye kunim. Shi mɛi ni yɔɔ Gibeon maŋ ni bɛŋkɛ jɛmɛ lɛ mli lɛ susuuu nakai. Amɛheɔ amɛyeɔ akɛ Nyɔŋmɔ miiye kɛmiibua Israelbii lɛ, ni amɛsumɔɔɔ ni amɛkɛ Nyɔŋmɔ awu ta. No hewɔ lɛ ani ole nɔ ni Gibeonbii lɛ fee?

Amɛkpɛ amɛyiŋ akɛ amɛbaafee amɛhe tamɔ mɛi ni jɛ he ko ni jɛkɛ waa. No hewɔ lɛ hii lɛ ekomɛi wo atadei ni etserɛ waa kɛ tokotai ni amɛ shishi eye. Amɛfimɔ jatsui amɛwo kotokui ni etserɛ mli ni amɛkɛtere amɛtejii lɛ, ni amɛkɔlɔ abolooi ni egbĩgbĩi ni efufuui hu. Ni amɛtee Yoshua ŋɔɔ ni amɛyakɛɛ lɛ akɛ: ‘Shɔŋŋ he ko wɔjɛ wɔbaa nɛɛ, ejaakɛ wɔnu Yehowa, nyɛ Nyɔŋmɔ kpeteŋkpele lɛ he. Wɔnu nibii fɛɛ ni efee eha nyɛ yɛ Mizraim lɛ he. No hewɔ lɛ wɔ onukpai lɛ kɛɛ wɔtao niyenii ni wɔfã gbɛ ni wɔbakɛɛ bo akɛ: “Otsuji ji wɔ. Kã wɔ kita akɛ okɛ wɔ wuŋ ta.” Obaana akɛ wɔ atadei lɛ fɛɛ etserɛ yɛ gbɛ kakadaŋŋ lɛ hewɔ, ni wɔ abolooi lɛ fɛɛ efuu ni egbĩ hu.’

Yoshua kɛ hiɛnyiɛlɔi krokomɛi lɛ fɛɛ he Gibeonbii lɛ amɛye. No hewɔ lɛ amɛkã amɛ kita akɛ amɛkɛ amɛ wuŋ ta. Shi gbii etɛ sɛɛ pɛ kɛkɛ ni amɛná amɛle akɛ he ni Gibeonbii lɛ yɔɔ lɛ bɛŋkɛ kpaakpa.

Yoshua bi amɛ akɛ: ‘Mɛni hewɔ nyɛkɛɛ wɔ akɛ nyɛjɛ shɔŋŋ kɛba lɛ?’

Gibeonbii lɛ ha hetoo akɛ: ‘Wɔfee nakai ejaakɛ akɛɛ wɔ akɛ Yehowa nyɛ Nyɔŋmɔ lɛ ewo nyɛ shi akɛ ekɛ Kanaan shikpɔŋ nɛɛ fɛɛ baaha nyɛ. No hewɔ lɛ wɔmiishe gbeyei akɛ nyɛbaagbe wɔ.’ Shi Israelbii lɛ ye amɛshiwoo lɛ nɔ, ni amɛgbeee Gibeonbii lɛ. Shi moŋ, amɛfee amɛ amɛtsuji.

Yerusalem maŋtsɛ lɛ mli fu waa ejaakɛ Gibeonbii lɛ kɛ Israelbii lɛ efee toiŋjɔlɛ kpaŋmɔ. No hewɔ lɛ ekɛɛ maŋtsɛmɛi krokomɛi ejwɛ akɛ: ‘Nyɛbawaa mi ni mikɛ Gibeon awua ta.’ Ni nɛkɛ ji bɔ ni maŋtsɛmɛi enumɔ nɛɛ fee. Ani nilelɔi ji Gibeonbii lɛ akɛni amɛkɛ Israel efee toiŋjɔlɛ kpaŋmɔ lɛ hewɔ, ni no eha maŋtsɛmɛi nɛɛ baa amɛkɛ amɛ abawu ta lɛ? Wɔbaakwɛ.

Yoshua 9:1-27; 10:1-5.

Yoshua kɛ Gibeonbii lɛ


Sanebimɔi

  • Mɛɛ srɔtofeemɔ yɔɔ Gibeonbii lɛ kɛ maji ni bɛŋkɛ Kanaan lɛ ateŋ?
  • Taakɛ atɛŋ yɛ mfoniri lɛ mli lɛ, mɛni Gibeonbii lɛ fee, ni mɛni hewɔ?
  • Mɛɛ shiwoo Yoshua kɛ Israelbii lɛ kɛha Gibeonbii lɛ, shi gbii etɛ sɛɛ lɛ mɛni amɛna?
  • Be mli ni maji krokomɛi lɛ anɔ maŋtsɛmɛi lɛ nu akɛ Gibeonbii lɛ kɛ Israel eyafee toiŋjɔlɛ kpaŋmɔ lɛ, mɛni ba?

Sanebimɔi ni fata he

  • Kanemɔ Yoshua 9:1-27.

    Akɛni Yehowa kɛɛ Israel maŋ lɛ akɛ ‘amɛfite shikpɔŋ lɛ nɔ bii fɛɛ’ hewɔ lɛ, mɛɛ sui Gibeonbii lɛ ahiɛ ni ekpataaa lɛ maa nɔ mi? (Yosh. 9:22, 24; Mat. 9:13; Bɔf. 10:34, 35; 2 Pet. 3:9)

    Akɛni Yoshua ye kpaŋmɔ ni ekɛ Gibeonbii lɛ fee lɛ nɔ hewɔ lɛ, mɛɛ nɔkwɛmɔnɔ kpakpa efee kɛha Kristofoi ŋmɛnɛ? (Yosh. 9:18, 19; Mat. 5:37; Efe. 4:25)

  • Kanemɔ Yoshua 10:1-5.

    Mɛɛ gbɛ nɔ asafo babaoo lɛ tsɔɔ amɛkaseɔ Gibeonbii lɛ ŋmɛnɛ, ni mɛni no haa afeɔ amɛ? (Yosh. 10:4; Zak. 8:23; Mat. 25:35-40; Kpoj. 12:17)