Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 47: Julɔ ko yɛ Israel

Biblia Mli Sane 47: Julɔ ko yɛ Israel
Akan kɛ nibii ni eju lɛ miito

KWƐMƆ nɔ ni nuu nɛɛ fuɔ yɛ ebuu lɛ mli lɛ! Atade fɛfɛo ko, kɛ shika antɛle kɛ jwiɛtɛi kukuji komɛi. Ehala kɛjɛ Yeriko maŋ lɛ mli. Shi kulɛ mɛni esa akɛ akɛ nibii ni yɔɔ Yeriko lɛ afee? Ani okaiɔ?

Kulɛ esa akɛ akpata fɛɛ hiɛ, ni akɛ shika kɛ jwiɛtɛi lɛ ayaha yɛ Yehowa kpee buu lɛ mli nitoohe lɛ. No hewɔ lɛ, gbɔmɛi nɛɛ booo Nyɔŋmɔ toi. Amɛju nibii ni ji Nyɔŋmɔ nɔ. Atsɛɔ nuu lɛ akɛ Akan, ni mɛi ni fata ehe lɛ ji eweku lɛ mli bii. Nyɛhaa wɔkwɛa nɔ ni ba.

Beni Akan ju nibii nɛɛ sɛɛ lɛ, Yoshua tsu hii komɛi ni amɛkɛ Ai maŋ lɛ ayawu. Shi aye amɛnɔ kunim yɛ ta lɛ mli. Agbe mɛi komɛi, ni mɛi ni eshwɛ lɛ jo foi. Enɛ dɔ Yoshua waa diɛŋtsɛ. Ekã shikpɔŋ ni ekɛ ehiɛ bu shi ni esɔle ebi Yehowa akɛ: ‘Mɛni hewɔ ni oha enɛ ba wɔ nɔ?’

Yehowa ha lɛ hetoo akɛ: ‘Tee shi! Israel efee esha. Amɛkɔlɔ nibii ni esa akɛ akpata hiɛ aloo akɛba Yehowa kpee buu lɛ mli lɛ ekomɛi amɛha amɛhe. Amɛju atade fɛfɛo ko ni amɛkɛto amɛha amɛhe. Mijɔŋ nyɛ ja nyɛkpata nibii lɛ kɛ mɔ ni kɔlɔ lɛ fɛɛ hiɛ dã.’ Yehowa kɛɛ Yoshua akɛ ebaatsɔɔ lɛ mɔ ni nɛkɛ gbɔmɔ fɔŋ nɛɛ ji.

No hewɔ lɛ Yoshua bua gbɔmɛi lɛ fɛɛ naa kɛkpe, ni Yehowa jie gbɔmɔ fɔŋ lɛ, Akan. Akan kɛɛ akɛ: ‘Mifee esha. Mina atade fɛfɛo ko, kɛ shika antɛle ko kɛ jwiɛtɛi kukuji komɛi. Miitao eko waa no hewɔ lɛ mikɔlɔ. Nyɛbaana ni mifu yɛ mibuu lɛ mli.’

Beni ana nibii lɛ ni akɛbaha Yoshua lɛ, ekɛɛ Akan akɛ: ‘Mɛni hewɔ ni okɛ haomɔ eba wɔ nɔ nɛkɛ? No hewɔ lɛ agbɛnɛ Yehowa kɛ haomɔ baaba onɔ!’ Kɛkɛ ni gbɔmɛi lɛ fɛɛ tswia Akan kɛ eweku lɛ fɛɛ tɛi ni amɛgboi. Ani enɛ etsɔɔɔ akɛ esaaa akɛ wɔkɔlɔɔ nibii ni jeee wɔ nɔ ni?

Yɛ no sɛɛ lɛ Israel tee ni ekɛ Ai yawu ta ekoŋŋ. Agbɛnɛ Yehowa ye ebua ewebii lɛ, ni amɛye kunim yɛ ta lɛ mli.

Yoshua 7:1-26; 8:1-29.



Sanebimɔi

  • Mɛɛ nuu kɛ nibii ni ekɔlɔ kɛjɛ Yeriko lɛ toɔ bu mli yɛ mfoniri lɛ mli lɛ, ni namɛi yeɔ buaa lɛ lɛ?
  • Mɛni hewɔ hiɛdɔɔ yɔɔ Akan kɛ eweku lɛ nifeemɔ lɛ he waa lɛ?
  • Be mli ni Yoshua bi Yehowa nɔ hewɔ ni aye Israelbii lɛ anɔ yɛ ta ni awu yɛ Ai lɛ mli lɛ, mɛni Yehowa kɛɛ?
  • Be mli ni akɛ Akan kɛ eweku lɛ ba Yoshua ŋɔɔ lɛ, mɛni afee amɛ?
  • Mɛɛ nɔ ko ni he hiaa kojomɔ ni akɛba Akan nɔ lɛ tsɔɔ wɔ?

Sanebimɔi ni fata he

  • Kanemɔ Yoshua 7:1-26.

    Mɛni Yoshua sɔlemɔ lɛ tsɔɔ yɛ wekukpaa ni kã ekɛ e-Bɔlɔ lɛ teŋ lɛ he? (Yosh. 7:7-9; Lala 119:145; 1 Yoh. 5:14)

    Mɛni Akan nɔkwɛmɔnɔ lɛ tsɔɔ, ni enɛ ji kɔkɔbɔɔ kɛha wɔ yɛ mɛɛ gbɛ nɔ? (Yosh. 7:11, 14, 15; Abɛi 15:3; 1 Tim. 5:24; Heb. 4:13)

  • Kanemɔ Yoshua 8:1-29.

    Ákɛ aŋkroaŋkroi lɛ, mɛɛ Kristofoi asafo lɛ he sɔ̃ kã wɔnɔ ŋmɛnɛ? (Yosh. 7:13; 3 Mose 5:1; Abɛi 28:13)