Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 46: Yeriko Gbogboi Lɛ

Biblia Mli Sane 46: Yeriko Gbogboi Lɛ

MƐNI eha nɛkɛ Yeriko gbogboi nɛɛ kumɔɔ eshwieɔ shi lɛ? Etamɔ nɔ ni atswa okpɛlɛm agbo ko kɛtswa amɛ. Shi yɛ nakai be lɛ mli lɛ amɛbɛ okpɛlɛmii; amɛbɛ tui po. Eji naakpɛɛ nɔ kroko hu ni Yehowa fee! Nyɛhaa wɔkasea bɔ ni eba lɛ eha.

Yeriko gbogboi lɛ miikumɔ

Bo nɔ ni Yehowa kɛɛ Yoshua lɛ toi: ‘Bo kɛ otabilɔi lɛ fɛɛ, nyɛbɔlea maŋ lɛ he kɛkpea. Nyɛbɔlea he gbii ekpaa, shikome daa gbi. Nyɛwoa kpaŋmɔ adeka lɛ ni nyɛhiɛa. Osɔfoi kpawo anyiɛ kpaŋmɔ adeka lɛ hiɛ ni amɛkpã amɛ tɛtɛrɛmaŋtɛrɛi lɛ.

‘Yɛ gbi ni ji kpawo lɛ nɔ lɛ, nyɛnyiɛa kɛbɔlea maŋ lɛ he shii kpawo. No sɛɛ lɛ, nyɛkpãa tɛtɛrɛmaŋtɛrɛi lɛ waa, ni maŋ muu lɛ fɛɛ abɔ oshe wulu. Ni maŋ lɛ gbogboi lɛ aaagbee shi shwɛtɛɛ!’

Yoshua kɛ gbɔmɛi lɛ fee bɔ ni Yehowa kɛɛ amɛ lɛ pɛpɛɛpɛ. Beni amɛnyiɛɔ kɛbɔleɔ lɛ, mɔ fɛɛ mɔ efee diŋŋ. Mɔ ko etswaaa esɛŋ. Nɔ pɛ ni anuɔ ji tɛtɛrɛmaŋtɛrɛi lɛ kɛ amɛnajiashi gbɛɛmɔ lɛ. Nyɔŋmɔ webii lɛ ahenyɛlɔi ni yɔɔ Yeriko lɛ atsui baafã. Ani oona taŋkpee tsuru lɛ ni tsotsoro samfɛlɛ lɛ naa lɛ? Namɔ samfɛlɛ ni? Hɛɛ, Rahab efee nɔ ni maŋ shikpálɔi enyɔ lɛ kɛɛ efee lɛ pɛpɛɛpɛ. Ewekumɛi fɛɛ fata ehe yɛ jɛmɛ amɛmiikwɛ nɔ ni yaa nɔ lɛ.

Yoshua

Yɛ naagbee, yɛ gbi ni ji kpawo lɛ nɔ, beni amɛnyiɛ kɛbɔle maŋ lɛ shii kpawo sɛɛ lɛ, tɛtɛrɛmaŋtɛrɛi lɛ gbɛɛ, tabilɔi lɛ bɔ oshe, ni gbogboi lɛ kumɔ shwie shi. Ni Yoshua kɛɛ: ‘Nyɛgbea maŋ lɛ mli mɔ fɛɛ mɔ, ni nyɛshãa maŋ lɛ. Nyɛshãa nɔ fɛɛ nɔ. Nyɛbaa jwiɛtɛi, shika, akɔɔble kɛ dade lɛ pɛ ayi, ni nyɛkɛbaa Yehowa buu lɛ mli nitoohe lɛ.’

Yoshua kɛɛ maŋ shikpálɔi enyɔ lɛ akɛ: ‘Nyɛyaa Rahab shia lɛ, ni nyɛyaŋɔa lɛ kɛ ewekumɛi fɛɛ kɛjea kpo kɛbaa.’ Abaa Rahab kɛ ewekumɛi lɛ fɛɛ yi, tamɔ bɔ ni maŋ shikpálɔi lɛ wo lɛ shi lɛ pɛpɛɛpɛ.

Yoshua 6:1-25.



Sanebimɔi

  • Mɛni Yehowa kɛɛ tabilɔi lɛ kɛ osɔfoi lɛ akɛ amɛkɛ gbii ekpaa afee?
  • Mɛni akɛɛ hii lɛ afee yɛ gbi kpawo lɛ nɔ?
  • Mɛni onaa ni Yeriko gbogboi lɛ feɔ yɛ mfoniri lɛ mli lɛ?
  • Mɛni hewɔ kpãa tsuru tsotsoro samfɛlɛ lɛ naa lɛ?
  • Mɛni Yoshua kɛɛ tabilɔi lɛ akɛ amɛfee maŋbii lɛ, ni jwiɛtɛi, shika, akɔɔble, kɛ dade lɛ hu?
  • Mɛni akɛɛ maŋ shikpálɔi enyɔ lɛ afee?

Sanebimɔi ni fata he

  • Kanemɔ Yoshua 6:1-25.

    Te nyiɛmɔ ni Israelbii lɛ nyiɛ kɛbɔle Yeriko yɛ gbi ni ji kpawo lɛ nɔ lɛ tamɔ Yehowa Odasefoi ashiɛmɔ nitsumɔ yɛ naagbee gbii nɛɛ amli lɛ eha tɛŋŋ? (Yosh. 6:15, 16; Yes. 60:22; Mat. 24:14; 1 Kor. 9:16)

    Mɛɛ gbɛ nɔ gbalɛ ni aŋma yɛ Yoshua 6:26 lɛ ba mli yɛ aaafee afii 500 sɛɛ, ni mɛni enɛ tsɔɔ wɔ yɛ Yehowa wiemɔ lɛ he? (1 Maŋ. 16:34; Yes. 55:11)

Ekrokromɛi Hu Nɛ

Rahab kɛ Gbɛtsɔɔmɔi Tsu Nii

Abaa weku kome yi be ni Yeriko gbogboi lɛ gbee shi shwɛtɛɛ lɛ.