Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 45: Yordan Faa lɛ Foo

Biblia Mli Sane 45: Yordan Faa lɛ Foo

KWƐMƆ! Israelbii lɛ miifo Yordan Faa lɛ! Shi nɛgbɛ nu lɛ yɔɔ? Akɛni nugbɔ nɛɔ babaoo yɛ nakai be lɛ mli yɛ afi lɛ mli hewɔ lɛ, minitii fioo ko ni eho nɛ lɛ, no mli lɛ faa lɛ eyi waa. Shi amrɔ nɛɛ, nu lɛ fɛɛ etã! Israelbii lɛ miifo mli kɛmiiya yɛ shikpɔŋ gbiŋ nɔ tamɔ amɛfee yɛ Ŋshɔ Tsuru lɛ mli lɛ! Nɛgbɛ nu lɛ fɛɛ etee? Nyɛhaa wɔkwɛa.

Israelbii lɛ miifo Yordan Faa lɛ

Beni be bashɛ kɛha Israelbii lɛ akɛ amɛfo Yordan Faa lɛ, nɔ ni Yehowa hã Yoshua kɛɛ gbɔmɛi lɛ nɛ: ‘Osɔfoi lɛ awo kpaŋmɔ adeka lɛ ni amɛnyiɛ wɔ hiɛgbɛ. Kɛ amɛkɛ amɛnaji mamɔ Yordan Faa lɛ mli nu lɛ mli lɛ, nu lɛ baakpa hoo.’

No hewɔ lɛ osɔfoi lɛ wo kpaŋmɔ adeka lɛ, ni amɛtere kɛnyiɛ gbɔmɛi lɛ ahiɛ. Beni amɛshɛ Yordan naa lɛ, osɔfoi lɛ kɛ amɛnaji mamɔ nu lɛ mli. Eeho waa ni emli kwɔ waa hu. Shi beni amɛnaji sa nu lɛ mli pɛ kɛkɛ ni nu lɛ kpa hoo! Naakpɛɛ nii nɛ! Yehowa ha nu lɛ wa damɔ shi yɛ yiteŋgbɛ. No hewɔ lɛ, etsɛɛɛ kɛkɛ ni nu lɛ fɛɛ tã yɛ faa lɛ mli!

Osɔfoi ni tere kpaŋmɔ adeka lɛ yadamɔ faa ni egbi nɛɛ teŋ tuuŋtu. Ani oona amɛ yɛ mfoniri lɛ mli? Yɛ be mli ni amɛdamɔ jɛmɛ lɛ, Israelbii lɛ fɛɛ nyiɛ kɛfo Yordan Faa lɛ yɛ shikpɔŋ gbiŋ nɔ!

Beni mɔ fɛɛ mɔ efo kɛtee esɛɛ lɛ, Yehowa ha Yoshua kɛɛ hii 12 ni he wa akɛ: ‘Nyɛyaa faa lɛ mli yɛ he ni osɔfoi ni tere kpaŋmɔ adeka lɛ damɔ lɛ. Nyɛhalaa tɛi 12, ni nyɛbua naa nyɛshwiea shi yɛ he ni nyɛbaato nyɔɔŋ nɛɛŋ lɛ. Kɛkɛ lɛ, wɔsɛɛ ko kɛ nyɛbii lɛ bi nɔ ni tɛi nɛɛ damɔ shi kɛha lɛ, nyɛkɛa amɛ akɛ nui lɛ wa ni ekpa hoo beni Yehowa kpaŋmɔ adeka lɛ foɔ Yordan lɛ. Nɛkɛ tɛi nɛɛ baakai nyɛ yɛ naakpɛɛ nii nɛɛ he!’ Ni Yoshua hole tɛi 12 emamɔ he ni osɔfoi lɛ damɔ yɛ faa lɛ mli lɛ.

Yoshua

Yɛ naagbee lɛ Yoshua kɛɛ osɔfoi ni tere kpaŋmɔ adeka lɛ akɛ: ‘Nyɛjea Yordan mli.’ Ní amɛfee nakai nɔŋŋ pɛ kɛkɛ ni faa lɛ bɔi hoo ekoŋŋ.

Yoshua 3:1-17; 4:1-18.



Sanebimɔi

  • Mɛɛ naakpɛɛ nii Yehowa fee koni Israelbii lɛ anyɛ afo Yordan Faa lɛ?
  • Mɛɛ hemɔkɛyeli nifeemɔ esa akɛ Israelbii lɛ ajie lɛ kpo amɛtsɔɔ koni no aha amɛfo Yordan Faa lɛ?
  • Mɛni hewɔ Yehowa kɛɛ Yoshua akɛ ehala tɛi agboi 12 yɛ faa lɛ mli lɛ?
  • Be ni osɔfoi lɛ je Yordan mli nɔŋŋ lɛ, mɛni ba?

Sanebimɔi ni fata he

  • Kanemɔ Yoshua 3:1-17.

    Taakɛ sane nɛɛ tsɔɔ lɛ, mɛni esa akɛ wɔfee koni Yehowa ajɔɔ wɔ ni eye ebua wɔ? (Yosh. 3:13, 15; Abɛi 3:5; Yak. 2:22, 26)

    Be mli ni Israelbii lɛ fo Yordan Faa lɛ kɛtee Shiwoo Shikpɔŋ lɛ nɔ lɛ, no mli lɛ te faa lɛ yɔɔ tɛŋŋ, ni te ewoɔ Yehowa gbɛi lɛ hiɛ nyam ehaa tɛŋŋ? (Yosh. 3:15; 4:18; Lala 66:5-7)

  • Kanemɔ Yoshua 4:1-18.

    Mɛɛ yiŋtoo he nii tɛi 12 ni akɔlɔ yɛ Yordan ni akɛyamamɔ shi yɛ Gilgal lɛ tsu? (Yosh. 4:4-7)