Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 44: Rahab Kɛ Maŋ Shikpálɔi lɛ To

Biblia Mli Sane 44: Rahab Kɛ Maŋ Shikpálɔi lɛ To

HII nɛɛ ebote haomɔ mli. Esa akɛ amɛjo foi, kɛ jeee nakai lɛ abaagbe amɛ. Israelbii maŋ shikpálɔi ji amɛ, ni yoo ni yeɔ ebuaa amɛ lɛ ji Rahab. Rahab shia yɛ Yeriko maŋ lɛ gbogboi lɛ anɔ, ni jɛmɛ eyɔɔ. Nyɛhaa wɔtaoa nɔ hewɔ ni hii nɛɛ ebote haomɔ mli lɛ.

Israelbii lɛ efee klalo akɛ amɛbaafo Yordan Faa lɛ kɛya Kanaan shikpɔŋ lɛ nɔ. Shi dani amɛbaafee nakai lɛ, Yoshua tsu maŋ shikpálɔi enyɔ. Ekɛɛ amɛ akɛ: ‘Nyɛyaa ni nyɛyakwɛa shikpɔŋ lɛ kɛ Yeriko maŋ lɛ.’

Rahab kɛ Israelbii maŋ shikpálɔi enyɔ

Beni maŋ shikpálɔi lɛ ba Yeriko lɛ, amɛtee Rahab shia lɛ. Shi mɔ ko yakɛɛ Yeriko maŋtsɛ lɛ akɛ: ‘Israelbii enyɔ komɛi ba biɛ gbɛkɛ nɛɛ koni amɛbakpá shikpɔŋ lɛ shi.’ Beni enu nɛkɛ sane nɛɛ lɛ, maŋtsɛ lɛ tsu mɛi kɛtee Rahab ŋɔɔ ni amɛkɛɛ lɛ akɛ: ‘Jiemɔ hii lɛ ni ba oŋɔɔ lɛ kɛba!’ Shi Rahab kɛ maŋ shikpálɔi lɛ eyato etsũ lɛ yiteŋ. No hewɔ lɛ ekɛɛ akɛ: ‘Hii komɛi ba miŋɔɔ, shi mileee he ni amɛjɛ. Ni amɛshi beni je ena lɛ, dani aŋamɔ maŋ lɛ agboi lɛ. Kɛji nyɛtiu amɛ mramra lɛ, nyɛbaanina amɛ!’ No hewɔ lɛ gbɔmɛi lɛ tiu amɛ kɛ foi.

Beni gbɔmɛi lɛ shi lɛ, Rahab kwɔ oya kɛtee tsũ lɛ yiteŋ. Ekɛɛ maŋ shikpálɔi lɛ akɛ: ‘Mile akɛ Yehowa kɛ shikpɔŋ nɛɛ baaha nyɛ. Wɔnu bɔ ni eha Ŋshɔ Tsuru lɛ gbi beni nyɛshi Mizraim lɛ, kɛ bɔ ni nyɛgbe Sihon kɛ Og maŋtsɛmɛi lɛ. Ni amrɔ nɛɛ mifee nyɛ ejurɔ, no hewɔ lɛ, nyɛfainɛ, nyɛwoa mi shi akɛ nyɛbaana mi mɔbɔ. Nyɛherea mipapa kɛ mimami, kɛ minyɛmimɛi hii kɛ minyɛmimɛi yei lɛ ayiwala.’

Maŋ shikpálɔi lɛ wo lɛ shi akɛ amɛbaafee nakai, shi esa akɛ Rahab afee nɔ ko. Maŋ shikpálɔi lɛ kɛɛ: ‘Okɛ taŋkpee tsuru nɛɛ afi osamfɛlɛ lɛ naa, ni obua owekumɛi lɛ fɛɛ anaa ofata ohe yɛ oshia lɛ. Ni kɛ wɔ fɛɛ wɔku wɔsɛɛ kɛba ni wɔbaŋɔ Yeriko lɛ, wɔbaana nɛkɛ taŋkpee nɛɛ yɛ osamfɛlɛ lɛ naa, ni wɔgbeŋ mɔ ko mɔ ko yɛ oshia lɛ.’ Beni maŋ shikpálɔi lɛ ku amɛsɛɛ amɛtee Yoshua ŋɔɔ lɛ, amɛgba lɛ nɔ fɛɛ nɔ ni ba lɛ.

Yoshua 2:1-24; Hebribii 11:31.



Sanebimɔi

  • Nɛgbɛ Rahab hi?
  • Namɛi ji hii enyɔ ni yɔɔ mfoniri lɛ mli lɛ, ni mɛni hewɔ amɛyɔɔ Yeriko lɛ?
  • Mɛni Yeriko maŋtsɛ lɛ fã Rahab koni efee, ni mɛɛ hetoo ekɛha?
  • Mɛɛ gbɛ nɔ Rahab tsɔ eye ebua hii enyɔ lɛ, ni mɛni ebi ni amɛfee amɛha lɛ?
  • Mɛɛ shiwoo maŋ shikpálɔi enyɔ lɛ kɛha Rahab?

Sanebimɔi ni fata he

  • Kanemɔ Yoshua 2:1-24.

    Mɛɛ gbɛ nɔ Yehowa shiwoo ni aŋma yɛ 2 Mose 23:28 lɛ tsɔ eba mli be ni Israelbii lɛ kɛ Yeriko wu ta lɛ? (Yosh. 2:9-11)

  • Kanemɔ Hebribii 11:31.

    Te Rahab nɔkwɛmɔnɔ lɛ maa bɔ ni hemɔkɛyeli he hiaa lɛ nɔ mi ehaa tɛŋŋ? (Rom. 1:17; Heb. 10:39; Yak. 2:25)

Ekrokomɛi Hu Nɛ

Tsɔɔmɔ Obii lɛ Anii

Rahab He Yehowa Eye

Kasemɔ bɔ ni fee ni abaa Rahab kɛ eweku lɛ fɛɛ yi beni akpata Yeriko maŋ lɛ hiɛ lɛ.

BUU-MƆƆ

‘Ajɛ Rahab Nitsumɔi Amli Abu lɛ Bem’

Mɛɛ gbɛ nɔ Rahab sane lɛ haa wɔnaa akɛ, wɔteŋ mɔ kome flo po bɛ ni Yehowa susuuu ehe? Mɛni wɔbaanyɛ wɔkase kɛjɛ ehemɔkɛyeli lɛ mli?