Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 43: Yoshua Batsɔ Hiɛnyiɛlɔ

Biblia Mli Sane 43: Yoshua Batsɔ Hiɛnyiɛlɔ

MOSE miitao ni ekɛ Israelbii lɛ aya Kanaan. No hewɔ lɛ ekpa fai akɛ: ‘Yehowa, ha ni mafo Yordan Faa lɛ ni mayana shikpɔŋ kpakpa lɛ.’ Shi Yehowa kɛɛ: ‘Efa! Okɛ mi akawie nɛkɛ sane nɛɛ he dɔŋŋ!’ Ani ole nɔ hewɔ ni Yehowa kɛɛ nakai lɛ?

Ejɛ nɔ ni ba beni Mose kɛ etso lɛ tswa tɛsaa lɛ hewɔ. Kaimɔ akɛ lɛ kɛ Aaron wooo Yehowa hiɛ nyam. Amɛkɛɛɛ gbɔmɛi lɛ akɛ Yehowa ji mɔ ni haa nu lɛ jɛɔ tɛsaa lɛ mli lɛ. Enɛ hewɔ lɛ Yehowa kɛɛ ehaŋ ni amɛya Kanaan shikpɔŋ lɛ nɔ.

No hewɔ lɛ nyɔji fioo mli yɛ Aaron gbele sɛɛ lɛ, Yehowa kɛɛ Mose akɛ: ‘Ŋɔɔ Yoshua, ni okɛ lɛ ayadamɔ osɔfo Eleazar kɛ asafo muu lɛ fɛɛ hiɛ. Kɛɛmɔ mɔ fɛɛ mɔ yɛ maŋbii lɛ fɛɛ ahiɛ akɛ Yoshua ji hiɛnyiɛlɔ hee lɛ.’ Ni Mose fee bɔ ni Yehowa ekɛɛ lɛ lɛ pɛpɛɛpɛ, taakɛ onaa yɛ mfoniri lɛ mli lɛ.

Mose miiha ale akɛ Yoshua ji hiɛnyiɛlɔ

Kɛkɛ ni Yehowa kɛɛ Yoshua akɛ: ‘Ohe awa, ni kaashe gbeyei. Bo obaanyiɛ Israelbii lɛ ahiɛ kɛya Kanaan shikpɔŋ ni miwo amɛ shi yɛ he lɛ nɔ, ni mikɛ bo yɛ.’

Sɛɛ mli lɛ, Yehowa kɛɛ Mose ni ekwɔ kɛya Nebo Gɔŋ ni nɔ kwɔ waa ni yɔɔ Moab shikpɔŋ lɛ nɔ lɛ nɔ. Kɛ Mose yadamɔ jɛmɛ lɛ ebaana Kanaan shikpɔŋ fɛfɛo ni yɔɔ Yordan Faa lɛ sɛɛ lɛ. Ni Yehowa kɛɛ lɛ akɛ: ‘Shikpɔŋ ni miwo shi akɛ mikɛbaaha Abraham, kɛ Isak kɛ Yakob bii lɛ nɛ. Miha ona, shi mihaŋ oya shikpɔŋ lɛ nɔ.’

Ni Mose gbo yɛ jɛmɛ yɛ Nebo Gɔŋ lɛ yiteŋ. Eye afii 120. No mli lɛ eyɛ hewalɛ lolo, ni ehiŋmɛii hu naa nii jogbaŋŋ. Gbɔmɛi lɛ ye awerɛho babaoo ni amɛfo waa yɛ Mose gbele lɛ hewɔ. Shi amɛna miishɛɛ akɛ amɛná Yoshua akɛ amɛhiɛnyiɛlɔ hee.

4 Mose 27:12-23; 5 Mose 3:23-29; 31:1-8, 14-23; 32:45-52; 34:1-12.



Sanebimɔi

  • Namɛi ji hii enyɔ ni kɛ Mose damɔ shi yɛ mfoniri lɛ mli lɛ?
  • Mɛni Yehowa kɛɛ Yoshua?
  • Mɛni hewɔ Mose kwɔ kɛtee Nebo Gɔŋ lɛ yiteŋ lɛ, ni mɛni Yehowa kɛɛ lɛ?
  • Afii enyiɛ Mose ye dani egbo?
  • Mɛni hewɔ gbɔmɛi lɛ ye awerɛho lɛ, shi mɛni hewɔ esa akɛ amɛná miishɛɛ?

Sanebimɔi ni fata he

  • Kanemɔ 4 Mose 27:12-23.

    Mɛɛ gbɛnaa nii ni tsii Yehowa kɛha Yoshua, ni mɛɛ gbɛ nɔ Yehowa tsɔɔ ekwɛɔ E-webii anɔ ŋmɛnɛ? (4 Mose 27:15-19; Bɔf. 20:28; Heb. 13:7)

  • Kanemɔ 5 Mose 3:23-29.

    Mɛni hewɔ Yehowa haaa Mose kɛ Aaron aya shiwoo shikpɔŋ lɛ nɔ lɛ, ni mɛni wɔbaanyɛ wɔkase kɛjɛ enɛ mli? (5 Mose 3:25-27; 4 Mose 20:12, 13)

  • Kanemɔ 5 Mose 31:1-8, 14-23.

    Mɛɛ gbɛ nɔ naagbee wiemɔ ni Mose kɛ Israel wie lɛ tsɔɔ akɛ ekɛ heshibaa kpɛlɛ tsɔsemɔ ni Yehowa kɛha lɛ lɛ nɔ? (5 Mose 31:6-8, 23)

  • Kanemɔ 5 Mose 32:45-52.

    Te esa akɛ Nyɔŋmɔ Wiemɔ lɛ asa wɔshihilɛi ahe eha tɛŋŋ? (5 Mose 32:47; 3 Mose 18:5; Heb. 4:12)

  • Kanemɔ 5 Mose 34:1-12.

    Eyɛ mli akɛ Mose kɛ ehiŋmɛi enaaa Yehowa moŋ, shi mɛni 5 Mose 34:10 lɛ tsɔɔ yɛ wekukpaa ni yɔɔ ekɛ Yehowa teŋ lɛ he? (2 Mose 33:11, 20; 4 Mose 12:8)

Ekrokromɛi Hu Nɛ

Yoshua He Sane

Te Yoshua kɛ etabilɔi lɛ fee tɛŋŋ amɛkumɔ Yeriko gbogboi lɛ? Printimɔ Biblia mli sane nɛɛ, koni okase Biblia mli gbɔmɔ ni sheee gbeyei nɛɛ he saji krokomɛi.