Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 41: Akɔɔble Onufu Lɛ

Biblia Mli Sane 41: Akɔɔble Onufu Lɛ
Mose kɛ akɔɔble onufu lɛ

ANI enɛ tamɔ onufu diɛŋtsɛ ni akɛbala tso he? Dabi ejeee nakai. Akɔɔble akɛfee onufu lɛ. Yehowa kɛɛ Mose akɛ ekɛtsotsoro tso lɛ nɔ ni gbɔmɛi lɛ anyɛ akwɛ koni amɛhiɛ akãmɔ. Shi onufui krokomɛi ni nyiɛ shikpɔŋ lɛ, onufui diɛŋtsɛ ji amɛ. Ámɛkɔ̃mɔ gbɔmɛi lɛ ni ámɛha hela emɔmɔ amɛ. Ani ole nɔ hewɔ?

Nɔ hewɔ ji akɛ, Israelbii lɛ ewie eshi Nyɔŋmɔ kɛ Mose. Amɛwie akɛ: ‘Mɛni hewɔ ni okɛ wɔ ejɛ Mizraim kɛba ŋa nɛɛ nɔ koni wɔbagboi yɛ biɛ lɛ? Nu loo niyenii ko kwraa bɛ biɛ. Ni wɔnyɛŋ wɔye nɛkɛ mana nɛɛ dɔŋŋ.’

Shi mana ji niyenii ni hi waa diɛŋtsɛ. Yehowa tsɔ naakpɛɛ gbɛ nɔ ekɛha amɛ. Ni etsɔ naakpɛɛ gbɛ nɔ eha amɛ nu hu. Shi gbɔmɛi lɛ edaaa Nyɔŋmɔ shi yɛ gbɛ ni etsɔ nɔ ekwɛ amɛ lɛ hewɔ. No hewɔ lɛ Yehowa ha onufui ni ebɔɔ yɔɔ amɛmli nɛɛ ba ni ekɛgbala Israelbii lɛ atoi. Onufui lɛ kɔ̃mɔ amɛ, ni amɛteŋ mɛi babaoo gboi.

Israelbii ni onufui ekɔ̃mɔ amɛ

Yɛ naagbee lɛ, gbɔmɛi lɛ ba Mose ŋɔɔ ni amɛbakɛɛ lɛ akɛ: ‘Wɔfee esha, ejaakɛ wɔwie wɔshi Yehowa kɛ bo fɛɛ. Ofainɛ sɔlemɔ ni okpa Yehowa fai ni ejie nɛkɛ onufui nɛɛ kɛya.’

No hewɔ lɛ, Mose sɔle eha gbɔmɛi lɛ. Ni Yehowa kɛɛ Mose koni efee nɛkɛ akɔɔble onufu nɛɛ. Ekɛɛ akɛtsotsoro tso nɔ, koni mɔ fɛɛ mɔ ni eko ekɔ̃ lɛ lɛ akwɛ. Mose fee bɔ ni Nyɔŋmɔ kɛɛ lɛ pɛpɛɛpɛ. Ni mɛi ni onufui lɛ kɔ̃mɔɔ amɛ lɛ kwɛɔ akɔɔble onufu lɛ ni amɛnaa hewalɛ ekoŋŋ.

Nikasemɔ ko yɛ ni wɔbaakase kɛjɛ enɛ mli. Yɛ gbɛ ko nɔ lɛ, wɔ fɛɛ wɔtamɔ Israelbii ni onufui lɛ ekɔ̃mɔ amɛ lɛ. Wɔ fɛɛ wɔyɛ shihilɛ ko ni gbele yɔɔ mli lɛ mli. Bo lɛ, kwɛmɔ ohe, ni obaana akɛ gbɔmɛi gbɔlɔɔ, ni helai mɔmɔɔ amɛ, ni amɛgboiɔ. Nɔ hewɔ ji akɛ, klɛŋklɛŋ nuu kɛ yoo, Adam kɛ Hawa tsi amɛhe kɛjɛ Yehowa he, ni amɛbii ji wɔ fɛɛ. Shi Yehowa etsɔɔ gbɛ ni wɔbaatsɔ nɔ wɔhi shi kɛya naanɔ.

Yehowa tsu e-Bi Yesu Kristo kɛba shikpɔŋ lɛ nɔ. Asɛŋ Yesu yɛ tso nɔ, ejaakɛ mɛi pii susu akɛ eji gbɔmɔ fɔŋ. Shi Yehowa kɛ Yesu hã koni ebahere wɔyiwala. Kɛji wɔkwɛ lɛ gbɛ, ni wɔnyiɛ esɛɛ lɛ, no lɛ wɔbaana naanɔ wala. Shi wɔbaakase enɛ he saji babaoo yɛ sɛɛ mli.

4 Mose 21:4-9; Yohane 3:14, 15.



Sanebimɔi

  • Mɛni ebala tso lɛ he yɛ mfoniri lɛ mli lɛ, ni mɛni hewɔ Yehowa kɛɛ Mose akɛ ekɛtsotsoro jɛmɛ lɛ?
  • Te gbɔmɛi lɛ ahiɛ esɔɔɔ nibii fɛɛ ni Nyɔŋmɔ efee eha amɛ lɛ tɛŋŋ?
  • Be mli ni Yehowa ha onufui kɔmɔ gbɔmɛi lɛ ni ekɛgbala amɛtoi lɛ, mɛni amɛkɛɛ Mose afee?
  • Mɛni hewɔ Yehowa kɛɛ Mose afee akɔɔble onufu lɛ?
  • Mɛni wɔbaanyɛ wɔkase kɛjɛ sane nɛɛ mli?

Sanebimɔi ni fata he

  • Kanemɔ 4 Mose 21:4-9.

    Mɛɛ kɔkɔbɔɔ huhuuhu ni Israelbii lɛ wie amɛshi nibii ni Yehowa toɔ he gbɛjianɔ ehaa amɛ lɛ kɛhaa wɔ? (4 Mose 21:5, 6; Rom. 2:4)

    Te Israelbii lɛ kɛ akɔɔble onufu lɛ tsu nii yɛ afii ohai abɔ ni nyiɛ sɛɛ lɛ mli lɛ amɛha tɛŋŋ, ni mɛni Maŋtsɛ Hezekia fee? (4 Mose 21:9; 2 Maŋ. 18:1-4)

  • Kanemɔ Yohane 3:14, 15.

    Akɔɔble onufu lɛ ni akɛtsotsoro tso he lɛ feɔ Yesu Kristo sɛŋmɔ lɛ he mfoniri jogbaŋŋ yɛ mɛɛ gbɛ nɔ? (Gal. 3:13; 1 Pet. 2:24)