Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 40: Mose kɛ Etso lɛ Tswa Tɛsaa Lɛ

Biblia Mli Sane 40: Mose kɛ Etso lɛ Tswa Tɛsaa Lɛ

AFII lɛ baho, eko nyiɛ eko sɛɛ—afii 10, afii 20, afii 30, afii 39! Ni Israelbii lɛ kã he amɛyɛ ŋa lɛ nɔ lolo. Shi afii nɛɛ amli fɛɛ lɛ, Yehowa kwɛɔ ewebii lɛ anɔ. Ekɛ mana lɛɔ amɛ. Ekɛ atatu nyiɛɔ amɛhiɛ yɛ shwane mli, ni gbɛkɛ lɛ ekɛ la nyiɛɔ amɛhiɛ. Ni afii babaoo nɛɛ mli fɛɛ lɛ, amɛtadei lɛ tsɛrɛɛɛ ni amɛnaji hu waaa amɛhe.

Agbɛnɛ afi ni ji 40 kɛjɛ be mli ni amɛshi Mizraim lɛ mli nyɔŋ ni ji klɛŋklɛŋ nɔ lɛ nɛ. Israelbii lɛ ebabua amɛhe naa ekoŋŋ yɛ Kadesh. Biɛ ji he ni amɛyɔɔ ni atsu maŋ shikpálɔi 12 lɛ koni amɛyasara Kanaan shikpɔŋ lɛ nɔ aaafee afii 40 ni eho nɛ lɛ. Mose nyɛmi yoo Miriam gbo yɛ Kadesh. Ni tamɔ bɔ ni eba lɛ yɛ be ko ni eho lɛ, sane ba yɛ biɛ ekoŋŋ.

Gbɔmɛi lɛ naaa nu ko nu ko. No hewɔ lɛ amɛwie huhuuhu amɛwo Mose akɛ: ‘Wɔna ni kulɛ wɔgboi. Mɛni hewɔ ni nyɛjie wɔ kɛjɛ Mizraim kɛba biɛ nɛɛ ni ehiii nɔ ko dumɔ nɛɛ? Niyenii, loo agbami tso, loo wein tso, loo akutu tso ko bɛ biɛ. Nu ni anuɔ tete po bɛ.’

Mose kɛ etso lɛ tswa tɛsaa Lɛ

Beni Mose kɛ Aaron tee kpee buu lɛ mli ni amɛyasɔle lɛ, Yehowa kɛɛ Mose akɛ: ‘Buamɔ gbɔmɛi lɛ anaa. No sɛɛ lɛ okɛ nakai tɛsaa ni yɔɔ jɛmɛ lɛ awie yɛ amɛ fɛɛ amɛhiɛ. Nu pii baajɛ mli aba kɛha gbɔmɛi lɛ kɛ amɛkooloi lɛ fɛɛ.’

No hewɔ lɛ Mose bua gbɔmɛi lɛ anaa, ni ekɛɛ amɛ akɛ: ‘Nyɛboa toi, nyɛ mɛi ni nyɛkɛ nyɛhiɛ efɔɔɔ Nyɔŋmɔ nɔ! Ani Aaron kɛ mi baanyɛ ni wɔna nu kɛjɛ nɛkɛ tɛsaa nɛɛ mli wɔha nyɛ?’ Kɛkɛ ni Mose kɛ etso lɛ tswa tɛsaa lɛ shii enyɔ, ni nu babaoo tue kɛjɛ tɛsaa lɛ mli eshwie shi. Aná nu ni fa pii kɛha gbɔmɛi lɛ kɛ kooloi lɛ fɛɛ.

Shi Yehowa mli fu Mose kɛ Aaron. Ani ole nɔ hewɔ? Nɔ hewɔ ji akɛ, Mose kɛ Aaron kɛɛ akɛ amɛ ji mɛi ni baajie nu lɛ kɛjɛ tɛsaa lɛ mli. Shi Yehowa ji mɔ diɛŋtsɛ ni fee. Ni akɛni Mose kɛ Aaron ewieee anɔkwale yɛ enɛ he hewɔ lɛ, Yehowa kɛɛ akɛ ebaagbala amɛtoi. Ekɛɛ akɛ: ‘Nyɛnyiɛŋ miwebii lɛ ahiɛ kɛyaŋ Kanaan.’

Etsɛɛɛ kɛkɛ ni Israelbii lɛ shi Kadesh. No sɛɛ be fioo lɛ, amɛbashɛ Hor Gɔŋ lɛ he. Gɔŋ lɛ yiteŋ biɛ ji he ni Aaron gbo yɛ. Beni egbo lɛ no mli lɛ eye afii 123. Israelbii lɛ ye awerɛho waa, ni gbɔmɛi lɛ fɛɛ kɛ gbii 30 sɔŋŋ fó Aaron. Ebinuu Eleazar baye esɛɛ akɛ osɔfonukpa kɛha Israel maŋ lɛ.

4 Mose 20:1-13, 22-29; 5 Mose 29:5.



Sanebimɔi

  • Mɛɛ gbɛ nɔ Yehowa tsɔ ekwɛ Israelbii lɛ anɔ be mli ni amɛyɔɔ ŋa lɛ nɔ lɛ?
  • Mɛɛ huhuuhu Israelbii lɛ wie be ni amɛbɔ ŋsara yɛ Kadesh lɛ?
  • Mɛɛ gbɛ nɔ Yehowa tsɔ eha gbɔmɛi lɛ kɛ amɛ kooloi lɛ ná nu?
  • Namɔ kɛ nine tsɔɔ ehe yɛ mfoniri lɛ mli lɛ, ni mɛni hewɔ efeɔ nakai lɛ?
  • Mɛni hewɔ Yehowa mli fu Mose kɛ Aaron lɛ, ni te egbala amɛtoi eha tɛŋŋ?
  • Mɛni ba yɛ Hor Gɔŋ lɛ he, ni namɔ batsɔ Israel osɔfonukpa?

Sanebimɔi ni fata he

  • Kanemɔ 4 Mose 20:1-13, 22-29 kɛ 5 Mose 29:4.

    Mɛni wɔkaseɔ kɛjɛɔ gbɛ nɔ ni Yehowa tsɔ ekwɛ Israelbii lɛ anɔ yɛ ŋa lɛ nɔ lɛ mli? (5 Mose 29:4; Mat. 6:31; Heb. 13:5; Yak. 1:17)

    Te Yehowa bu ehiɛ nyam ni Mose kɛ Aaron wooo yɛ Israelbii lɛ ahiɛ lɛ eha tɛŋŋ? (4 Mose 20:12; 1 Kor. 10:12; Kpoj. 4:11)

    Mɛni wɔbaanyɛ wɔkase yɛ bɔ ni Mose fee enii eha yɛ tsɔsemɔ ni Yehowa kɛha lɛ lɛ he lɛ mli? (4 Mose 12:3; 20:12, 27, 28; 5 Mose 32:4; Heb. 12:7-11)

Ekrokromɛi Hu Nɛ

Mose He Sane

Ani ole akɛ Mose ji mɔ klɛŋklɛŋ ni Biblia lɛ wie ehe akɛ efee naakpɛɛnii? Ŋɔɔ Biblia mɛi ahe sane nɛɛ koni ole nibii krokomɛi.

FEBRUARY 2013 Mose—Nɔ ni Wɔkaseɔ Kɛjɛɔ Edɛŋ

Susumɔ sui kpakpai ni Mose jie lɛ kpo lɛ amli etɛ, kɛ nɔ ni wɔbaanyɛ wɔkase kɛjɛ enɔkwɛmɔnɔ lɛ mli lɛ ahe.