Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 39: Aaron Tso lɛ Gbá Afoforo

Biblia Mli Sane 39: Aaron Tso lɛ Gbá Afoforo

KWƐMƆ fɔfɔii kɛ ŋmɛi ni etsu ni kwɛ̃ɔ yɛ tso nɛɛ nɔ lɛ. Aaron tso lɛ nɛ. Fɔfɔii kɛ tso yibii ni etsu nɛɛ kwɛ̃ yɛ Aaron tso lɛ nɔ yɛ jenamɔ kome pɛ mli! Nyɛhaa wɔkwɛa nɔ hewɔ.

Mose kɛ tso ni egbá afoforo lɛ miiha Aaron

Afii babaoo nɛ ni Israelbii lɛ ekpa shi aahu yɛ ŋa lɛ nɔ. No hewɔ lɛ gbɔmɛi lɛ ekomɛi susuɔ akɛ esaaa akɛ Mose nyiɛɔ amɛhiɛ dɔŋŋ, aloo ni Aaron baafee osɔfonukpa hu. Mɛi ni susuɔ nɛkɛ lɛ ateŋ mɔ kome ji Kora, ni nakai hu ji Datan, Abiram kɛ maŋ lɛ mli onukpai 250 hu. Amɛ fɛɛ amɛba Mose ŋɔɔ ni amɛbakɛɛ lɛ akɛ: ‘Mɛni hewɔ ni owóɔ ohe nɔ yɛ wɔ mɛi ni eshwɛ lɛ anɔ nɛkɛ?’

Mose kɛɛ Kora kɛ esɛɛnyiɛlɔi lɛ akɛ: ‘Wɔ leebi lɛ, nyɛkɔlɔa ŋɛsui kɛbaa, ni nyɛkɛ tsofa-kɛ-ŋma awoa mli. Nyɛkɛbaa Yehowa kpee buu lɛ mli. Wɔbaana mɔ ni Yehowa baahala lɛ.’

Enɔ jetsɛremɔ lɛ, Kora kɛ esɛɛnyiɛlɔi 250 lɛ ba kpee buu lɛ mli. Mɛi babaoo ba koni amɛbafi nɛkɛ hii nɛɛ asɛɛ. Yehowa mli fu waa. Mose kɛɛ: ‘Nyɛjea nɛkɛ gbɔmɛi fɔji nɛɛ abuui lɛ ahe. Nyɛkataa amɛ nɔ ko nɔ ko he.’ Gbɔmɛi lɛ bo toi, ni amɛtsi amɛhe kɛjɛ Kora, kɛ Datan kɛ Abiram buui lɛ ahe.

Kɛkɛ ni Mose kɛɛ: ‘Enɛ nyɛkɛaale mɔ ni Yehowa ehala lɛ. Shikpɔŋ lɛ baagbá ni ebaami nɛkɛ gbɔmɛi nɛɛ fɛɛ.’

Ní Mose gbe ewiemɔ lɛ naa pɛ kɛkɛ ni shikpɔŋ lɛ mli gba. Kora buu lɛ kɛ enibii fɛɛ kɛ Datan kɛ Abiram kɛ mɛi fɛɛ ni fata amɛhe lɛ bote shikpɔŋ lɛ, ni shikpɔŋ lɛ naa ŋa ewo amɛyi. Beni gbɔmɛi lɛ nu mɛi ni ebote shikpɔŋ lɛ abolɔmɔ lɛ, amɛbolɔ akɛ: ‘Nyɛjoa foi! Ekolɛ shikpɔŋ lɛ baami wɔ hu!’

Kora kɛ esɛɛnyiɛlɔi 250 lɛ yɛ kpee buu lɛ masɛi lolo. No hewɔ lɛ Yehowa ha la jɛ ŋwɛi, ni ebashã amɛ fɛɛ wɛlɛŋŋ. Ni Yehowa kɛɛ Aaron binuu Eleazar koni eloo nɛkɛ gbɔmɛi ni egboi nɛɛ aŋɛsui lɛ ni ekɛfee nɔhaanɔ fɛtɛfɛtɛ ko kɛha afɔleshãa latɛ lɛ. Nɛkɛ afɔleshãa latɛ nɛɛ nɔhaanɔ lɛ baafee kɔkɔbɔɔ nɔ ko kɛha Israelbii lɛ akɛ, yɛ Aaron kɛ ebihii lɛ asɛɛ lɛ, esaaa akɛ mɔ ko mɔ ko yeɔ osɔfo ehaa Yehowa.

Shi Yehowa miisumɔ ni eha efee faŋŋ akɛ Aaron kɛ ebihii lɛ ji mɛi ni ehala akɛ amɛfee osɔfoi amɛha lɛ. No hewɔ lɛ, ekɛɛ Mose akɛ: ‘Ha ni Israel akutso fɛɛ akutso hiɛnyiɛlɔ kɛ edɛhiɛmɔ tso aba. Ha ni Aaron kɛ etso lɛ aba, kɛha Levi akutso lɛ. Okɛ dɛhiɛmɔ tsei nɛɛ fɛɛ ayashwie kpaŋmɔ adeka lɛ hiɛ yɛ kpee buu lɛ mli. Nuu ni mihala lɛ akɛ osɔfo lɛ tso baagbá afoforo.’

Beni Mose yakwɛ enɔ jetsɛremɔ lɛ, naa, Aaron tso lɛ egbá afoforo nɛɛ ni ewo ŋmɛi ni etsu yɛ enɔ hu! No hewɔ lɛ agbɛnɛ, ona nɔ hewɔ ni Yehowa ha Aaron tso lɛ gbá afoforo lɛ?

4 Mose 16:1-49; 17:1-11; 26:10.



Sanebimɔi

  • Namɛi te shi wo hegbɛ ni Mose kɛ Aaron yɔɔ lɛ, ni mɛni amɛkɛɛ Mose?
  • Mɛni Mose kɛɛ Kora kɛ esɛɛnyiɛlɔi 250 lɛ akɛ amɛfee?
  • Mɛni Mose kɛɛ gbɔmɛi lɛ, ni mɛni ba be ni ekpa wiemɔ nɔŋŋ lɛ?
  • Mɛni ba Kora kɛ esɛɛnyiɛlɔi 250 lɛ anɔ?
  • Mɛni Eleazar ni ji Aaron binuu lɛ, kɛ mɛi ni gboi lɛ aŋɛsui lɛ fee, ni mɛni hewɔ?
  • Mɛni hewɔ Yehowa ha Aaron tso lɛ gbá afoforo lɛ? (Kwɛmɔ mfoniri lɛ.)

Sanebimɔi ni fata he

  • Kanemɔ 4 Mose 16:1-17:14.

    Mɛni Kora kɛ esɛɛnyiɛlɔi lɛ fee, ni mɛni hewɔ eji atua ni atseɔ ashiɔ Yehowa lɛ? (4 Mose 16:9, 10, 18; 3 Mose 10:1, 2; Abɛi 11:2)

    Mɛɛ jwɛŋmɔ ni ejaaa Kora kɛ “asafo lɛ mli onukpai” 250 lɛ ná? (4 Mose 16:1-3; Abɛi 15:33; Yes. 49:7)

  • Kanemɔ 4 Mose 17:16-26 kɛ 26:10.

    Mɛni Aaron tso lɛ ni gbá afoforo lɛ tsɔɔ, ni mɛni hewɔ Yehowa fã ni akɛto kpaŋmɔ adeka lɛ mli lɛ? (4 Mose 17:20, 23, 25)

    Mɛɛ nii ni he hiaa wɔbaanyɛ wɔkase kɛjɛ Aaron tso lɛ he okadi lɛ mli? (4 Mose 17:25; Bɔf. 20:28; Fil. 2:14; Heb. 13:17)

Ekrokromɛi Hu Nɛ

Aaron He Sane

Mɛni hewɔ ahãaa eya shiwoo shikpɔŋ lɛ nɔ lɛ?