Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 37: Buu Kɛha Jamɔ

Biblia Mli Sane 37: Buu Kɛha Jamɔ

ANI ole nɔ ni tsũ nɛɛ ji? Eji buu pɔtɛɛ ko ni akɛjaa Yehowa. Atsɛɔ lɛ hu akɛ kpee buu. Gbɔmɛi lɛ ma amɛgbe naa beni amɛshi Mizraim lɛ sɛɛ afi. Ani ole mɔ ni kɛ jwɛŋmɔ lɛ ba akɛ ama?

Kpee buu lɛ

Yehowa kɛ jwɛŋmɔ lɛ ha. Beni Mose yɔɔ Sinai Gɔŋ lɛ nɔ lɛ, Yehowa tsɔɔ lɛ bɔ ni ema lɛ eha. Ekɛɛ lɛ koni ama lɛ bɔ ni abaanyɛ ajie lɛ ekomekome ekoŋŋ. Yɛ nɛkɛ gbɛ nɔ lɛ, abaanyɛ akɛ ehe nibii lɛ fɛɛ aya he kroko, ni asaa ama yɛ jɛmɛ ekoŋŋ. No hewɔ lɛ kɛ Israelbii lɛ fã kɛjɛ he kome kɛtee he kroko yɛ ŋa lɛ nɔ lɛ, amɛtereɔ buu lɛ kɛyaa.

Kɛ okwɛ tsũ bibioo ni yɔɔ buu lɛ naagbee gbɛ lɛ mli lɛ, obaana adeka ko. Atsɛɔ lɛ akɛ kpaŋmɔ adeka. Eyɛ ŋwɛibɔfoi aloo kerubim enyɔ ni akɛ shika fee yɛ ekoji enyɔ lɛ fɛɛ nɔ. Nyɔŋmɔ saa eŋma Kitai Nyɔŋma lɛ ekoŋŋ yɛ tɛi tɛtrɛbii enyɔ nɔ, ejaakɛ Mose ejwara klɛŋklɛŋ nɔ lɛ. Ni akɛ tɛi nɛɛ toɔ kpaŋmɔ adeka lɛ mli. Agbɛnɛ hu, akɛ kpulu ni mana yɔɔ mli toɔ adeka lɛ mli. Ani okaiɔ nɔ ni mana ji?

Mose nyɛmi nuu Aaron ji mɔ ni Yehowa hala lɛ akɛ efee osɔfonukpa. Enyiɛɔ gbɔmɛi lɛ ahiɛ ni amɛjaa Yehowa. Ni osɔfoi ji ebihii lɛ hu.

Agbɛnɛ kwɛmɔ buu lɛ tsũ wulu lɛ hu. Edalɛ tamɔ tsũ bibioo lɛ dalɛ toi enyɔ. Ani oona adeka bibioo lɛ kɛ lasu ni faa kɛjɛɔ mli kɛyaa ŋwɛi lɛ? Afɔleshãa latɛ lɛ nɛ, ni biɛ ji he ni osɔfoi lɛ shãa nɔ ko ni jeɔ ŋma waa ni atsɛɔ lɛ tsofa-kɛ-ŋma lɛ yɛ. Kɛkɛ lɛ kanetso ni hiɛ kanei kpawo lɛ hu yɛ jɛmɛ. Ni nɔ ni ji etɛ ni yɔɔ tsũ lɛ mli ji okpɔlɔ. Akɛ abolooi 12 shwieɔ nɔ.

Akɛ kã loo tsɛŋsi agbo ko ema kpee buu lɛ kpo lɛ nɔ, ni akɛ nu ewo mli. Osɔfoi lɛ kɛfɔflɔ amɛhe. Agbɛnɛ afɔleshãa latɛ agbo lɛ hu yɛ jɛmɛ. Biɛ nɛɛ akɛ kooloi ni agbe amɛ lɛ baa ni akɛbashãa afɔle ahaa Yehowa yɛ. Buu lɛ ma ŋsara lɛ teŋ tuuŋtu, ni Israelbii lɛ yɛ amɛbuui amli kɛbɔle ehe fɛɛ.

2 Mose 25:8-40; 26:1-37; 27:1-8; 28:1; 30:1-10, 17-21; 34:1, 2; Hebribii 9:1-5.



Sanebimɔi

  • Te atsɛ́ɔ tsũ ni yɔɔ mfoniri lɛ mli lɛ tɛŋŋ, ni mɛni atsuɔ yɛ jɛmɛ?
  • Mɛni hewɔ Yehowa kɛɛ Mose akɛ efee buu lɛ bɔ ni abaanyɛ afamɔ yɛ gbɛ ni waaa nɔ lɛ?
  • Mɛɛ adeka ma tsũ bibioo lɛ mli yɛ buu lɛ naagbee gbɛ lɛ, ni mɛni yɔɔ adeka lɛ mli?
  • Namɔ Yehowa hala koni efee osɔfonukpa, ni mɛni osɔfonukpa lɛ feɔ?
  • Tsĩi nibii etɛ ni yɔɔ tsũ agbo lɛ mli lɛ agbɛi atã.
  • Mɛɛ nibii enyɔ yɔɔ kpeebuu lɛ kpo lɛ nɔ, ni mɛni akɛfeɔ?

Sanebimɔi ni fata he

  • Kanemɔ 2 Mose 25:8-40; 26:1-37; 27:1-8; kɛ 28:1.

    Kerubim ni yɔɔ “odase adeka lɛ” nɔ lɛ damɔ shi kɛha mɛni? (2 Mose 25:20, 22; 4 Mose 7:89; 2 Maŋ. 19:15)

  • Kanemɔ 2 Mose 30:1-10, 17-21; 34:1, 2; kɛ Hebribii 9:1-5.

    Mɛni hewɔ Yehowa ma bɔ ni ehe hiaa ni osɔfoi ni sɔmɔɔ yɛ kpeebuu lɛ mli lɛ ahe atse lɛ nɔ mi lɛ, ni te esa akɛ enɛ asa wɔhe aha tɛŋŋ ŋmɛnɛ? (2 Mose 30:18-21; 40:30, 31; Heb. 10:22)

    Yɛ mɛɛ gbɛ nɔ bɔfo Paulo tsɔɔ yɛ akɛ kpeebuu lɛ kɛ Mla kpaŋmɔ lɛ be eho yɛ be mli ni eŋma ewolo lɛ eyaha Hebri Kristofoi lɛ? (Heb. 9:1, 9; 10:1)