Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 35: Yehowa Kɛ Emlai Hã

Biblia Mli Sane 35: Yehowa Kɛ Emlai Hã

AAAFEE nyɔji enyɔ sɛɛ, yɛ be mli ni amɛshi Mizraim sɛɛ lɛ, Israelbii lɛ bashɛ Sinai Gɔŋ ni egbɛi kroko ji Horeb lɛ he. Biɛ ji he ni Yehowa jɛ ni ekɛ Mose wie kɛjɛ jwɛi ni tsoɔ lɛ mli lɛ. Gbɔmɛi lɛ bua amɛhe naa yɛ biɛ ni amɛhi shi be fioo ko.

Mose kwɔ kɛtee gɔŋ lɛ yiteŋ beni gbɔmɛi lɛ mɛɔ yɛ shishigbɛ lɛ. Beni eyɔɔ gɔŋ lɛ yiteŋ lɛ, Yehowa kɛɛ Mose akɛ Eetao ni Israelbii lɛ abo Lɛ toi koni amɛtsɔ E-mɛi krɛdɛɛ ko. Beni Mose kpeleke shi kɛba lɛ, ekɛɛ Israelbii lɛ nɔ ni Yehowa ekɛɛ lɛ. Ni gbɔmɛi lɛ kɛɛ akɛ amɛbaabo Yehowa toi, ejaakɛ amɛmiitao ni amɛtsɔmɔ ewebii.

Agbɛnɛ Yehowa fee naakpɛɛ nɔ ko. Eha lasu bɔi fãa kɛjɛ gɔŋ lɛ yiteŋ, ni eha anu nugbɔshiimɔi wuji hu. Agbɛnɛ ekɛ gbɔmɛi lɛ hu wie akɛ: ‘Mi ji Yehowa nyɛ-Nyɔŋmɔ ni jie nyɛ kɛjɛ Mizraim shikpɔŋ lɛ nɔ lɛ.’ Kɛkɛ ni ewo kita akɛ: ‘Nyɛkajaa nyɔŋmɔi krokomɛi, ja mi pɛ.’

Tɛi tɛtrɛbii enyɔ

Nyɔŋmɔ kɛ kitai aloo mlai krokomɛi nɛɛhu fata he kɛha Israelbii lɛ. Gbɔmɛi lɛ she gbeyei waa diɛŋtsɛ. Amɛkɛɛ Mose akɛ: ‘Bo okɛ wɔ awie, ejaakɛ wɔmiishe gbeyei akɛ kɛ Nyɔŋmɔ kɛ wɔ wie lɛ, wɔbaagboi.’

Yɛ sɛɛ mli lɛ, Yehowa kɛɛ Mose akɛ: ‘Kwɔɔ kɛba miŋɔɔ yɛ gɔŋ lɛ nɔ. Maha bo tɛi tɛtrɛbii enyɔ ni miŋma mlai ni mitaoɔ ni gbɔmɛi lɛ aye nɔ lɛ yɛ nɔ.’ No hewɔ lɛ Mose kwɔ kɛtee gɔŋ lɛ nɔ ekoŋŋ. Ehi jɛmɛ nyɔɔŋnyɔɔŋ kɛ shwaneshwane gbii 40.

Nyɔŋmɔ yɛ mlai babaoo kɛha ewebii lɛ. Mose ŋmala nɛkɛ mlai nɛɛ fɛɛ eshwie shi. Nyɔŋmɔ kɛ tɛi tɛtrɛbii enyɔ hu ha Mose. Nyɔŋmɔ diɛŋtsɛ eŋmala mlai 10 ni ekɛ gbɔmɛi lɛ wie lɛ yɛ amɛnɔ. Atsɛɔ amɛ akɛ Kitai Nyɔŋma.

Mose damɔ Sinai Gɔŋ nɔ

Kitai Nyɔŋma lɛ ji mlai ni he hiaa waa. Shi nakai nɔŋŋ ji mlai krokomɛi babaoo ni Nyɔŋmɔ kɛha Israelbii lɛ hu. Mlai nɛɛ ateŋ ekome ji: ‘Esa akɛ osumɔ Yehowa o-Nyɔŋmɔ lɛ kɛ otsui muu fɛɛ, kɛ ojwɛŋmɔ fɛɛ, kɛ osusuma fɛɛ kɛ ohewalɛ fɛɛ.’ Ekroko hu ji: ‘Esa akɛ osumɔ onaanyo tamɔ bo diɛŋtsɛ ohe.’ Nyɔŋmɔ Bi, Yesu Kristo kɛɛ akɛ mlai nɛɛ ji mlai ni Yehowa kɛha ewebii ni ji Israelbii lɛ ateŋ ewuji enyɔ fe fɛɛ. Yɛ sɛɛ mli lɛ, wɔbaakase Nyɔŋmɔ Bi lɛ kɛ etsɔɔmɔi lɛ ahe saji babaoo.

2 Mose 19:1-25; 20:1-21; 24:12-18; 31:18; 5 Mose 6:4-6; 3 Mose 19:18; Mateo 22:36-40.



Sanebimɔi

  • Be mli ni Israelbii lɛ shi Mizraim sɛɛ mli aaafee nyɔji enyɔ lɛ, nɛgbɛ amɛyabɔ ŋsara yɛ?
  • Mɛni Yehowa kɛɛ eesumɔ ni gbɔmɛi lɛ afee, ni mɛɛ hetoo amɛha?
  • Mɛni hewɔ Yehowa kɛ tɛi tɛtrɛbii enyɔ ha Mose lɛ?
  • Yɛ Kitai Nyɔŋma lɛ sɛɛ lɛ, mɛɛ mlai krokomɛi hu Yehowa kɛha Israelbii lɛ?
  • Mɛɛ mlai enyɔ Yesu Kristo kɛɛ akɛ nomɛi ji nɔ ni fe fɛɛ lɛ?

Sanebimɔi ni fata he

  • Kanemɔ 2 Mose 19:1-25; 20:1-21; 24:12-18; kɛ 31:18.

    Mɛɛ gbɛ nɔ wiemɔi ni aŋmala ashwie shi yɛ 2 Mose 19:8 lɛ yeɔ ebuaa wɔ ni wɔnuɔ nɔ ni Kristofoi ahenɔjɔɔmɔ ni afeɔ lɛ tsɔɔ lɛ shishi? (Mat. 16:24; 1 Pet. 4:1-3)

  • Kanemɔ 5 Mose 6:4-6; 3 Mose 19:18; kɛ Mateo 22:36-40.

    Mɛɛ gbɛ nɔ Kristofoi tsɔɔ amɛjieɔ suɔmɔ ni amɛyɔɔ kɛha Nyɔŋmɔ kɛ naanyo lɛ kpo? (Mar. 6:34; Bɔf. 4:20; Rom. 15:2)