Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 32: Haomɔi 10 Lɛ

Biblia Mli Sane 32: Haomɔi 10 Lɛ

KWƐMƆ mfonirii lɛ. Eko fɛɛ eko tsɔɔ haomɔ ni Yehowa kɛba Mizraim nɔ lɛ. Yɛ klɛŋklɛŋ mfoniri lɛ mli lɛ obaana ni Aaron kɛ etso lɛ miitswa Nilo Faa lɛ. Ní efee nakai lɛ, nu ni yɔɔ faa lɛ mli lɛ tsɔ lá. Looi lɛ gboi, ni faa lɛ bɔi shaa.

Haomɔi ni ba Mizraimbii lɛ anɔ

No sɛɛ lɛ, Yehowa ha kɔkɔdenei jɛ Nilo Faa lɛ mli kɛba. Amɛyɛ he fɛɛ he—yɛ flɔnɔi amli, yɛ abolooshãa nibii amli, yɛ mɛi asaatsei anɔ—yɛ he fɛɛ he. Ní kɔkɔdenei lɛ gboi lɛ, Mizraimbii lɛ bua amɛnaa kuikui, ni eha shikpɔŋ lɛ nɔ fɛɛ je fũ.

Kɛkɛ ni Aaron kɛ etso lɛ tswa shikpɔŋ lɛ, ni shikpɔŋ mulu lɛ fɛɛ tsɔ tɔŋtɔŋi. Amɛfilikiɔ ni amɛtsɛ̃ɔ mɔ waa. Tɔŋtɔŋi lɛ ji haomɔ ni ji etɛ ni ba Mizraim shikpɔŋ lɛ nɔ.

Haomɔi ni eshwɛ lɛ ye Mizraimbii lɛ pɛ awui, ní Israelbii lɛ fataaa he. Nɔ ni ji ejwɛ lɛ ji ofɔii babaoo ni ba Mizraimbii lɛ fɛɛ ashiai amli lɛ. Haomɔ ni ji enumɔ lɛ ba kooloi anɔ. Mizraimbii lɛ atsinai kɛ amɛtooi babaoo gboi.

Yɛ no sɛɛ lɛ, Mose kɛ Aaron loo lamulu ni amɛkɛshwã kɔɔyɔɔ lɛ mli. Ni etsɔ asanei ni fũu yɛ gbɔmɛi kɛ kooloi fɛɛ ahe. Enɛ ji haomɔ ni ji ekpaa lɛ.

Yɛ no sɛɛ lɛ, Mose wo enine nɔ kɛtee ŋwɛi, ni Yehowa ha nugbɔshiimɔi kɛ nyɔŋmɔŋtɛi ba. No ji nyɔŋmɔŋtɛi ni naa wa fe fɛɛ ni eba Mizraim nɔ pɛŋ dã.

Haomɔ ni ji kpaanyɔ lɛ ji baalabii babaoo ko ni ba. Baalabii ni fa babaoo tamɔ nakai bako dã, ni eko hu baaa nakai dɔŋŋ. Amɛye nɔ fɛɛ nɔ ni nyɔŋmɔŋtɛi lɛ fiteee lɛ.

Haomɔ ni ji nɛɛhu lɛ ji duŋ kpii ko ni wo. Duŋ lɛ ha shikpɔŋ lɛ nɔ fɛɛ gbii etɛ sɔŋŋ, shi Israelbii lɛ na la yɛ he ni amɛyɔɔ lɛ.

Yɛ naagbee lɛ, Nyɔŋmɔ kɛɛ ewebii lɛ ni amɛgbe abotia bi loo gwantɛŋ bi ni amɛkɛ elá lɛ akpa amɛ shinaatsei lɛ ahe. Kɛkɛ ni Nyɔŋmɔ bɔfo batsɔ Mizraim kɛho. Beni bɔfo lɛ na lá lɛ, egbeee mɔ ko mɔ ko yɛ nakai shia lɛ mli. Shi yɛ shiai ni enaaa lá yɛ amɛshinaai lɛ ahe lɛ, Nyɔŋmɔ bɔfo lɛ gbe gbɔmɛi kɛ kooloi lɛ akromɔbii fɛɛ. Enɛ ji haomɔ ni ji 10 lɛ.

Yɛ naagbee haomɔ nɛɛ sɛɛ lɛ, Farao kɛɛ Israelbii lɛ akɛ amɛya. Nyɔŋmɔ webii lɛ fɛɛ efee klalo akɛ amɛbaaya, ni nakai gbɛkɛ lɛ nɔŋŋ lɛ, amɛje amɛgbɛfãa kɛmiijɛ Mizraim lɛ shishi.

2 Mose yitsei 7 kɛyashi 12.



Sanebimɔi

  • Kwɛmɔ mfonirii ni yɔɔ biɛ lɛ ni otsɔɔ klɛŋklɛŋ haomɔi etɛ ni Yehowa kɛba Mizraim nɔ lɛ mli.
  • Mɛni ji srɔtofeemɔ ni yɔɔ klɛŋklɛŋ haomɔi etɛ lɛ kɛ haomɔi ni eshwɛ lɛ teŋ?
  • Mɛni ji haomɔi ni ji ejwɛ, enumɔ, kɛ ekpaa lɛ?
  • Tsɔɔmɔ haomɔi ni ji kpawo, kpaanyɔ kɛ nɛɛhu lɛ mli.
  • Mɛni Yehowa kɛɛ Israelbii lɛ akɛ amɛfee dani haomɔ ni ji nyɔŋma lɛ aba?
  • Mɛni ji haomɔ ni ji nyɔŋma lɛ, ni mɛni ba yɛ no sɛɛ?

Sanebimɔi ni fata he

  • Kanemɔ 2 Mose 7:19-8:23.

    Eyɛ mli akɛ Mizraim ŋkunyaayelɔi lɛ nyɛ amɛfee klɛŋklɛŋ haomɔi enyɔ ni Yehowa kɛba lɛ eko moŋ, shi anyɛ amɛnɔ ni amɛkpɛlɛ mɛni nɔ yɛ haomɔ ni ji etɛ lɛ sɛɛ? (2 Mose 8:18, 19; Mat. 12:24-28)

    Mɛɛ gbɛ nɔ haomɔ ni ji ejwɛ lɛ feɔ nyɛmɔ ni Yehowa yɔɔ ni ekɛaabu ewebii ahe lɛ he nɔkwɛmɔnɔ yɛ, ni te enɛ ni Nyɔŋmɔ webii le lɛ haa amɛnuɔ he amɛhaa tɛŋŋ yɛ “amanehulu kpeteŋkpele” ni agba afɔ shi ni kã amɛhiɛ lɛ he? (2 Mose 8:22, 23; Kpoj. 7:13, 14; 2 Kron. 16:9)

  • Kanemɔ 2 Mose 8:24; 9:3, 6, 10, 11, 14, 16, 23-25; kɛ 10:13-15, 21-23.

    Mɛɛ kui enyɔ Haomɔi Nyɔŋma lɛ ha abale amɛ, ni te enɛ saa bɔ ni wɔsusuɔ nakai kui enyɔ lɛ ahe lɛ he ŋmɛnɛ ehaa tɛŋŋ? (2 Mose 8:10, 18, 19; 9:14)

    Yɛ mɛɛ gbɛ nɔ 2 Mose 9:16 yeɔ ebuaa wɔ koni wɔnu nɔ hewɔ ni Yehowa eŋmɛ Satan gbɛ koni ehi shi kɛbashi ŋmɛnɛ lɛ shishi? (Rom. 9:21, 22)

  • Kanemɔ 2 Mose 12:21-32.

    Yɛ mɛɛ gbɛ nɔ Hehoo lɛ ha yiwalaheremɔ fee nɔ ni mɛi babaoo nine baanyɛ ashɛ nɔ, ni Hehoo lɛ kɔɔ mɛni he? (2 Mose 12:21-23; Yoh. 1:29; Rom. 5:18, 19, 21; 1 Kor. 5:7)

Ekrokromɛi Hu Nɛ

Nyɔŋmɔ Tsu Mose Kɛtee Ejipt

Mose kɛ Aaron ná ekãa ni amɛkɛ Farao, hewalɔ lɛ wie. Ŋɔɔ nifeemɔ nɛɛ eko koni nyɛfee ekome kɛkase akɛ weku.