Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 31: Mose kɛ Aaron Yana Farao

Biblia Mli Sane 31: Mose kɛ Aaron Yana Farao

BENI Mose ku esɛɛ kɛtee Mizraim lɛ, egba naakpɛɛ nibii lɛ fɛɛ etsɔɔ enyɛmi nuu Aaron. Ni beni Mose kɛ Aaron fee naakpɛɛ nibii nɛɛ amɛtsɔɔ Israelbii lɛ, gbɔmɛi lɛ fɛɛ he amɛye akɛ Yehowa kɛ amɛ yɛ.

Kɛkɛ ni Mose kɛ Aaron tee koni amɛyana Farao. Amɛkɛɛ lɛ akɛ: ‘Yehowa, Israel Nyɔŋmɔ lɛ kɛɛ, “Ha miwebii lɛ aya ŋa lɛ nɔ gbii etɛ, ni amɛyaja mi yɛ jɛmɛ.”’ Shi Farao ha hetoo akɛ: ‘Miheee Yehowa miyeee. Ni mihaŋ Israel aya.’

Farao mli fu, ejaakɛ gbɔmɛi lɛ miisumɔ ni amɛkpa nitsumɔ ni amɛyaja Yehowa. No hewɔ lɛ enyɛ amɛnɔ koni amɛtsu nii waa po fe nakai. Israelbii lɛ kɛɛ akɛ Mose ji mɔ ni ha eba lɛ nakai, ni enɛ dɔ Mose waa. Shi Yehowa kɛɛ lɛ akɛ ekahao. Yehowa kɛɛ: ‘Maha Farao aŋmɛ miwebii lɛ agbɛ ni amɛya.’

Mose kɛ Aaron damɔ Farao hiɛ

Mose kɛ Aaron tee amɛyana Farao ekoŋŋ. Amɛfee naakpɛɛ nii ko yɛ enɛ mli. Aaron shɛ etso lɛ efɔ shikpɔŋ, ni etsɔ onufu agbo ko. Shi Farao nilelɔi lɛ hu shɛrɛ amɛtsei lɛ amɛshwie shikpɔŋ, ni etsɔmɔ onufui. Shi kwɛmɔ! Aaron onufu lɛ miimi nilelɔi lɛ onufui lɛ. Shi fɛɛ sɛɛ lɛ Farao haaa Israelbii lɛ aya.

No hewɔ lɛ be shɛ ni Yehowa baagbala Farao toi. Ani ole bɔ ni efee enɛ eha? Kɛtsɔ haomɔi, loo amanehului 10 ni ekɛba Mizraim nɔ lɛ nɔ.

Yɛ haomɔi babaoo lɛ sɛɛ lɛ, Farao tsu ni ayatsɛ Mose kɛba, kɛkɛ ni ekɛɛ lɛ akɛ: ‘Ha ni haomɔi lɛ sɛɛ afo, koni maha Israel aya.’ Shi kɛ haomɔi lɛ kpa lɛ, kɛkɛ lɛ Farao etsake ejwɛŋmɔ. Ehaaa Israelbii lɛ aya. Shi, yɛ naagbee lɛ, yɛ haomɔ ni ji 10 lɛ sɛɛ lɛ, Farao ha Israelbii lɛ tee.

Ani ole haomɔi 10 lɛ eko fɛɛ eko?

2 Mose 4:27-31; 5:1-23; 6:1-13, 26-30; 7:1-13.



Sanebimɔi

  • Mɛɛ hewalɛ naakpɛɛ nii ni Mose kɛ Aaron fee lɛ ná yɛ Israelbii lɛ anɔ?
  • Mɛni Mose kɛ Aaron kɛɛ Farao, ni mɛɛ hetoo Farao kɛha?
  • Taakɛ onaa yɛ mfoniri lɛ mli lɛ, mɛni ba be mli ni Aaron shɛ́ etso lɛ efɔ̃ shikpɔŋ lɛ?
  • Mɛɛ gbɛ nɔ Yehowa tsɔ etsɔɔ Farao nɔ ko naa, ni mɛni Farao fee yɛ enɛ he?
  • Mɛni ba yɛ haomɔ ni ji nyɔŋma lɛ sɛɛ?

Sanebimɔi ni fata he

  • Kanemɔ 2 Mose 4:27-31 kɛ 5:1-23.

    Mɛni Farao tsɔɔ be mli ni ekɛɛ akɛ: “Mileee Yehowa” lɛ? (2 Mose 5:2; 1 Sam. 2:12; Rom. 1:21)

  • Kanemɔ 2 Mose 6:1-13, 26-30.

    Mɛɛ shishinumɔ naa Yehowa haaa Abraham, Isak, kɛ Yakob ale lɛ lɛ? (2 Mose 3:13, 14; 6:3; 1 Mose 12:8)

    Te wɔnuɔ he wɔhaa tɛŋŋ be mli ni Mose kɛɛ akɛ ehe esako kɛha nitsumɔ lɛ, ní yɛ fɛɛ sɛɛ lɛ Yehowa tee nɔ ekɛ lɛ tsu nii lɛ? (2 Mose 6:12, 30; Luka 21:13-15)

  • Kanemɔ 2 Mose 7:1-13.

    Mɛɛ okadi Mose kɛ Aaron to kɛha Nyɔŋmɔ tsuji ni yɔɔ ŋmɛnɛ lɛ be ni amɛkɛ ekãa jaje Yehowa kojomɔi lɛ amɛtsɔɔ Farao lɛ? (2 Mose 7:2, 3, 6; Bɔf. 4:29-31)

    Mɛɛ gbɛ nɔ Yehowa tsɔ ejie ehewalɛ ni fe Mizraim nyɔŋmɔi lɛ anɔ̃ lɛ kpo etsɔɔ? (2 Mose 7:12; 1 Kron. 29:12)

Ekrokomɛi Hu Nɛ

BIBLIA MLI SAJI AHE MFONIRII

Nyɔŋmɔ Tsu Mose Kɛtee Ejipt

Mɛni hewɔ Farao booo Mose kɛ Aaron toi lɛ? Mɛɛ toigbalamɔ akɛba Farao nɔ?