Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 30: Jwɛi ni Tsoɔ Lɛ

Biblia Mli Sane 30: Jwɛi ni Tsoɔ Lɛ

MOSE eba aahu kɛbashɛ Horeb gɔŋ lɛ he koni etao jwɛi eha etooi lɛ. Kɛkɛ ni ena jwɛi ko ni miitso, shi eshãaa!

Mose yɛ jwɛi ni miitso lɛ he

Mose susu he akɛ: ‘Enɛ yɛ naakpɛɛ. Matsi mabɛŋkɛ fioo koni mana lɛ jogbaŋŋ.’ Beni efee nakai lɛ, kɛkɛ ni gbee ko jɛ jwɛi lɛ mli wie akɛ: ‘Kaatsi obɛŋkɛ dɔŋŋ. Jiemɔ otokotai lɛ, ejaakɛ he ni odamɔ lɛ yɛ krɔŋkrɔŋ.’ Nyɔŋmɔ miiwie kɛmiitsɔ ŋwɛibɔfo ko nɔ, no hewɔ lɛ Mose tsĩ ehiɛ.

Kɛkɛ ni Nyɔŋmɔ kɛɛ: ‘Mina miwebii ni yɔɔ Mizraim lɛ amanehulu lɛ. No hewɔ lɛ maha amɛye amɛhe, ni bo matsu koni oyanyiɛ miwebii lɛ ahiɛ kɛjɛ Mizraim.’ Yehowa kɛ ewebii lɛ baaba Kanaan shikpɔŋ fɛfɛo lɛ nɔ.

Shi Mose kɛɛ: ‘Mijeee gbɔmɔ ko. Ni te mafee tɛŋŋ mafee enɛ hu? Ni ŋɔɔ lɛ akɛ mitee. Israelbii lɛ baabi mi akɛ, “Namɔ tsu bo?” Kɛkɛ lɛ mɛni makɛɛ?’

Nyɔŋmɔ ha hetoo akɛ: ‘Nɛkɛ ji bɔ ni obaakɛɛ: “YEHOWA, Abraham Nyɔŋmɔ lɛ, Isak Nyɔŋmɔ lɛ kɛ Yakob Nyɔŋmɔ lɛ tsu mi nyɛŋɔɔ nɛɛ.”’ Ni Yehowa kɛfata he akɛ: ‘Enɛ ji migbɛi kɛmiiya naanɔ.’

Ni Mose wie akɛ: ‘Shi kɛji akɛ amɛheee mi amɛyeee akɛ bo otsu mi hu?’

Kɛkɛ ni Nyɔŋmɔ bi lɛ akɛ: ‘Mɛni yɔɔ odɛŋ lɛ?’

Ni Mose ha hetoo akɛ: ‘Tso.’

Nyɔŋmɔ kɛɛ lɛ akɛ: ‘Shɛ ofɔ shikpɔŋ.’ Ni beni Mose fee nakai lɛ, tso lɛ tsɔ onufu. Kɛkɛ ni Yehowa fee naakpɛɛ nɔ kroko etsɔɔ Mose. Ekɛɛ lɛ akɛ: ‘Okɛ onine ahɔ otade lɛ mli.’ Mose fee nakai, ni beni ejie enine lɛ, naa, eyɛ futaa tamɔ snoo! Nine lɛ tsɔ tamɔ nɔ ni eeye hela ko ni ehiii ni atsɛɔ lɛ kpiti lɛ. No sɛɛ lɛ Yehowa ha Mose hewalɛ koni efee naakpɛɛ nii ni ji etɛ. Yɛ naagbee lɛ ekɛɛ lɛ akɛ: ‘Kɛ ofee naakpɛɛ nii nɛɛ, Israelbii lɛ baahe aye akɛ mi mitsuo.’

Yɛ no sɛɛ lɛ Mose tee shia ni eyakɛɛ Yetro akɛ: ‘Ofainɛ ha maku misɛɛ ni maya miwekumɛi aŋɔɔ yɛ Mizraim ni mayakwɛ bɔ ni amɛyɔɔ.’ No hewɔ lɛ Yetro kɛ Mose ye shɛɛ, ni Mose je egbɛfãa ni kɛ lɛ yaa Mizraim lɛ shishi.

2 Mose 3:1-22; 4:1-20.



Sanebimɔi

  • Te atsɛ́ɔ gɔŋ ni onaa yɛ mfoniri lɛ mli lɛ tɛŋŋ?
  • Tsɔɔmɔ naakpɛɛ nii ni Mose na be ni ekɛ etooi lɛ tee gɔŋ lɛ nɔ lɛ.
  • Mɛni gbee ko kɛɛ kɛjɛ jwɛi ni tsoɔ lɛ mli, ni namɔ gbee ni?
  • Mɛni Mose kɛɛ be ni Nyɔŋmɔ kɛɛ lɛ akɛ ebaanyiɛ E-webii lɛ ahiɛ kɛshi Mizraim lɛ?
  • Mɛni Nyɔŋmɔ kɛɛ Mose akɛ ekɛɛ gbɔmɛi lɛ kɛji amɛbi lɛ mɔ ni tsu lɛ lɛ?
  • Te Mose aaafee tɛŋŋ etsɔɔ akɛ Nyɔŋmɔ ji mɔ ni tsu lɛ?

Sanebimɔi ni fata he

  • Kanemɔ 2 Mose 3:1-22.

    Yɛ mɛɛ gbɛ nɔ Mose niiashikpamɔ lɛ haa wɔnáa nɔmimaa akɛ, kɛji ákɛ wɔnuɔ he akɛ wɔhe esako kɛha teokrase nitsumɔ ko po lɛ, Yehowa baaye abua wɔ? (2 Mose 3:11, 13; 2 Kor. 3:5, 6)

  • Kanemɔ 2 Mose 4:1-20.

    Mɛɛ Mose subaŋ ko tsake yɛ be mli ni eye afii 40 yɛ Midian lɛ, ni mɛni mɛi ni taoɔ hegbɛi yɛ asafo lɛ mli lɛ baanyɛ akase kɛjɛ enɛ mli? (2 Mose 2:11, 12; 4:10, 13; Mika 6:8; 1 Tim. 3:1, 6, 10)

    Kɛji ákɛ Yehowa tsɔ esafo lɛ nɔ ekã wɔ po lɛ, mɛɛ hekɛnɔfɔɔ Mose nɔkwɛmɔnɔ lɛ baanyɛ eha wɔná? (2 Mose 4:12-14; Lala 103:14; Heb. 12:4-11)