Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 28: Bɔ ni Afee Ahere Abifao Mose Yiwala

Biblia Mli Sane 28: Bɔ ni Afee Ahere Abifao Mose Yiwala

KWƐMƆ abifao bibioo ni foɔ ni hiɛ awula lɛ wao mli lɛ. Mose nɛ. Ani ole mɔ ni awula fɛfɛo lɛ ji? Mizraim maŋtsɛ biyoo ni, Farao diɛŋtsɛ biyoo.

Farao biyoo lɛ ena Mose

Mose mami kɛ ebi lɛ to aahu kɛyashi ená nyɔji etɛ, ejaakɛ esumɔɔɔ ni Mizraimbii lɛ agbe lɛ. Shi ele akɛ abaanyɛ ana Mose, no hewɔ lɛ nɔ ni efee ni ekɛhere eyiwala nɛ.

Esaa kɛntɛŋ ko mli jogbaŋŋ koni nu akabote mli. Kɛkɛ ni ekɛ Mose fɔ̃ mli, ni ekɛ kɛntɛŋ lɛ yama jwɛi kakadaji ni yɔɔ Nilo Faa lɛ toi lɛ ateŋ. Akɛɛ Mose nyɛmi yoo Miriam ni eyadamɔ he ko ni bɛŋkɛ koni ekwɛ nɔ ni baaba.

Etsɛɛɛ ni Farao biyoo lɛ ba Nilo Faa lɛ naa koni ebaju ehe. Trukaa ni ena kɛntɛŋ lɛ yɛ jwɛi kakadaji lɛ ateŋ. Kɛkɛ ni ekɛɛ eweyei lɛ ateŋ mɔ kome akɛ: ‘Yaawo nakai kɛntɛŋ lɛ obaha mi.’ Beni maŋtsɛ biyoo lɛ gbele kɛntɛŋ lɛ naa lɛ, mɛɛ gbekɛ nuu fɛfɛo ko ena nɛkɛ! Abifao Mose miifo, ni enii fee maŋtsɛ biyoo lɛ mɔbɔ. Esumɔɔɔ ni agbe lɛ.

Kɛkɛ ni Miriam ba jɛmɛ. Obaanyɛ ona lɛ yɛ mfoniri lɛ mli. Miriam bi Farao biyoo lɛ akɛ: ‘Ani miya ni miyatsɛ Israel yoo ko kɛba koni ekwɛ abifao lɛ eha bo?’

Maŋtsɛ biyoo lɛ kɛɛ lɛ akɛ: ‘Ofainɛ feemɔ nakai.’

No hewɔ lɛ Miriam jo foi oya ni eyakɛɛ emami. Beni Mose mami ba maŋtsɛ biyoo lɛ ŋɔɔ lɛ, maŋtsɛ biyoo lɛ kɛɛ lɛ akɛ: ‘Ŋɔɔ nɛkɛ abifao nɛɛ ni oyakwɛ lɛ oha mi, ni mawo bo nyɔmɔ.’

No hewɔ lɛ Mose mami kwɛ lɛ diɛŋtsɛ ebi lɛ. Yɛ sɛɛ mli beni Mose da saŋŋ lɛ, ekɛ lɛ yaha Farao biyoo lɛ, ni eŋɔ lɛ akɛ lɛ diɛŋtsɛ ebinuu. Nɛkɛ gbɛ nɔ tsɔ ni Mose bada yɛ Farao shia lɛ.

2 Mose 2:1-10.



Sanebimɔi

  • Namɔ ji abifao ni yɔɔ mfoniri lɛ mli lɛ, ni namɔ wao mli ehiɛ lɛ?
  • Mɛni Mose mami fee koni ekɛhere eyiwala ni akagbe lɛ?
  • Namɔ ji gbekɛ yoo fioo ni yɔɔ mfoniri lɛ mli lɛ, ni mɛni efee?
  • Be ni Farao biyoo lɛ na abifao lɛ, mɛni Miriam kɛɛ lɛ?
  • Mɛni maŋtsɛ biyoo lɛ kɛɛ Mose mami?

Sanebimɔ ni fata he

  • Kanemɔ 2 Mose 2:1-10.

    Mɛɛ hegbɛ Mose mami ná koni etsɔse ebi lɛ ni etsɔɔ Mose nii yɛ egbekɛbiiashi, ni mɛɛ nɔkwɛmɔnɔ enɛ feɔ kɛhaa fɔlɔi ŋmɛnɛ? (2 Mose 2:9, 10; 5 Mose 6:6-9; Abɛi 22:6; Efe. 6:4; 2 Tim. 3:15)

Ekrokromɛi Hu Nɛ

NIFEEMƆI KƐHÃ WEKU JAMƆ

Mose Da yɛ Egipt

Mɛni wɔbaanyɛ wɔkase yɛ Mose he be ni eyɔɔ Egipt ni edako lɛ? Ŋɔɔ nifeemɔi nɛɛ ni nyɛkɛfee weku jamɔ.