Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 26: Hiob Yeɔ Nyɔŋmɔ Anɔkwa

Biblia Mli Sane 26: Hiob Yeɔ Nyɔŋmɔ Anɔkwa

ANI nuu ni hela emɔ lɛ nɛɛ nii miifee bo mɔbɔ? Egbɛi ji Hiob, ni eŋa ji yoo lɛ. Ani ole nɔ ni ekɛɔ Hiob lɛ? ‘Loomɔ Nyɔŋmɔ koni ogbo.’ Nyɛhaa wɔkwɛa nɔ ni ha ekɛɛ nakai, kɛ nɔ hewɔ ni Hiob na amanehulu babaoo nakai lɛ.

Hiob ni asanei etsɛrɛ lɛ

Hiob ji nuu anɔkwafo ni bo Yehowa toi. Ehi Uz shikpɔŋ lɛ nɔ, yɛ he ko ni kɛ Kanaan jɛkɛɛɛ. Yehowa sumɔɔ Hiob sane waa diɛŋtsɛ, shi mɔ ko yɛ ni sumɔɔɔ esane. Ani ole nakai mɔ lɛ?

Lɛ ji Satan Abonsam. Kaimɔ akɛ, Satan ji ŋwɛibɔfo fɔŋ ni nyɛɔ Yehowa lɛ. Lɛ ji mɔ ni haaa Adam kɛ Hawa abo Yehowa toi lɛ, ni esusu akɛ ebaanyɛ efee ni mɔ ko mɔ ko akabo Yehowa toi. Shi ani enyɛ efee nakai? Dabi. Bo lɛ susumɔ hii kɛ yei anɔkwafoi babaoo ni wɔkase amɛhe sane lɛ ahe okwɛ. Amɛteŋ mɛi enyiɛ obaanyɛ otsĩ amɛgbɛi atã?

Yɛ sɛɛ mli beni Yakob kɛ Yosef gboi yɛ Mizraim lɛ, Hiob bafee gbɔmɔ ni yeɔ Yehowa anɔkwa fe mɔ fɛɛ mɔ yɛ shikpɔŋ nɔ. Yehowa miisumɔ ni Satan ale akɛ enyɛŋ eha mɔ fɛɛ mɔ afee efɔŋ, no hewɔ lɛ, ekɛɛ: ‘Kwɛmɔ Hiob. Kwɛ bɔ ni eyeɔ mi anɔkwa.’

Kɛkɛ ni Satan kɛɛ: ‘Eyeɔ bo anɔkwa, akɛni ojɔɔ lɛ ni eyɔɔ nibii kpakpai babaoo lɛ hewɔ. Shi kɛji akɛ ohe enɛɛmɛi fɛɛ yɛ edɛŋ lɛ, ebaalomɔ bo.’

No hewɔ lɛ Yehowa kɛɛ lɛ akɛ: ‘Yaa nɔ. Hemɔ fɛɛ yɛ edɛŋ. Feemɔ Hiob efɔŋ fɛɛ ni osumɔɔ. Wɔbaakwɛ akɛ ebaalomɔ mi lo. Kwɛmɔ ni ahi kɛkɛ koni okagbe lɛ.’

Klɛŋklɛŋ lɛ, Satan ha mɛi komɛi baju Hiob tsinai kɛ eyomai lɛ fɛɛ, ni amɛgbe etooi lɛ hu. Kɛkɛ ni etsɔ kɔɔyɔɔ ko ni tswaa waa nɔ egbe ebihii kɛ ebiyei 10 lɛ. No sɛɛ lɛ, Satan kɛ hela ni yɔɔ gbeyei nɛɛ tswa Hiob. Hiob piŋ babaoo. No hewɔ ni Hiob ŋa lɛ kɛɛ lɛ akɛ: ‘Loomɔ Nyɔŋmɔ koni ogbo’ lɛ. Shi Hiob efeŋ nakai. Agbɛnɛ hu, apasa nanemɛi etɛ ba ni amɛbakɛɛ lɛ akɛ efee efɔŋ ko. Shi Hiob tee nɔ eye anɔkwa.

Enɛ ha Yehowa mii shɛ ehe babaoo, ni yɛ sɛɛ mli lɛ ejɔɔ Hiob, taakɛ onaa yɛ mfoniri lɛ mli lɛ. Etsa ehela lɛ eha lɛ. Hiob fɔ bii fɛfɛji krokomɛi 10, ni etsinai kɛ etooi kɛ eyomai lɛ ayifalɛ lɛ bɔ he toi enyɔ fe bɔ ni eyɔɔ tsutsu lɛ.

Ani obaaye Yehowa anɔkwa yɛ bei fɛɛ mli tamɔ Hiob? Kɛ ofee nakai lɛ, Nyɔŋmɔ baajɔɔ bo hu. Obaanyɛ ohi shi kɛya naanɔ beni abaafee shikpɔŋ lɛ fɛɛ fɛfɛo tamɔ Eden abɔɔ lɛ.

Hiob 1:1-22; 2:1-13; 42:10-17.

Hiob kɛ eweku


Sanebimɔi

  • Namɔ ji Hiob?
  • Mɛni Satan bɔ mɔdɛŋ ni efee, shi ani eye omanye?
  • Yehowa ŋmɛ Satan gbɛ ni efee mɛni, ni mɛni hewɔ?
  • Mɛni hewɔ Hiob ŋa lɛ kɛɛ lɛ akɛ ‘elomɔ Nyɔŋmɔ koni egbo’ lɛ? (Kwɛmɔ mfoniri lɛ.)
  • Taakɛ obaana yɛ mfoniri ni ji enyɔ lɛ mli lɛ, Yehowa jɔɔ Hiob yɛ mɛɛ gbɛ nɔ, ni mɛni hewɔ?
  • Kɛji ákɛ wɔye Yehowa anɔkwa tamɔ Hiob lɛ, mɛɛ jɔɔmɔi wɔnine baashɛ nɔ?

Sanebimɔi ni fata he

  • Kanemɔ Hiob 1:1-22.

    Te Kristofoi ni yɔɔ ŋmɛnɛ lɛ aaafee tɛŋŋ amɛkase Hiob? (Hiob 1:1; Fil. 2:15; 2 Pet. 3:14)

  • Kanemɔ Hiob 2:1-13.

    Mɛɛ gbɛ̀i srɔtoi enyɔ ni kɛ amɛhe kpãaa gbee Hiob kɛ eŋa lɛ kɛfee amɛnii yɛ Satan yiwaa lɛ he? (Hiob 2:9, 10; Abɛi 19:3; Mika 7:7; Mal. 3:14)

  • Kanemɔ Hiob 42:10-17.

    Mɛɛ nibii ni je amɛhe anaa yɛ nyɔmɔwoo ni Hiob nine shɛ nɔ lɛ kɛ nɔ ni Yesu nine shɛ nɔ yɛ amɛ anɔkwayeli shihilɛ gbɛ ni amɛkɔ lɛ mli? (Hiob 42:12; Fil. 2:9-11)

    Jɔɔmɔi ni Hiob nine shɛ nɔ yɛ emuuyeli mli ni ehiɛ kɛha Nyɔŋmɔ lɛ mli lɛ woɔ wɔ hewalɛ yɛ mɛɛ gbɛ nɔ? (Hiob 42:10, 12; Heb. 6:10; Yak. 1:2-4, 12; 5:11)

Ekrokromɛi Hu Nɛ

Hiob He Sane

Hiob nɔkwɛmɔnɔ lɛ hãa wɔnáa ekãa kɛfiɔ shi yɛ kai fɛɛ ni wɔkɛkpeɔ lɛ mli. Ŋɔɔ Biblia mli sane nɛɛ koni ole enɛ he saji krokomɛi.