Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Mi-Wolo ni Gbaa Biblia Mli Saji

Biblia Mli Sane 25: Weku lɛ Fã Kɛtee Mizraim

Biblia Mli Sane 25: Weku lɛ Fã Kɛtee Mizraim

YOSEF nyɛɛɛ aye ehenumɔi anɔ dɔŋŋ. Ekɛɛ etsuji lɛ fɛɛ akɛ amɛshi tsũ lɛ mli. Beni eshwɛ ekɛ enyɛmimɛi hii lɛ pɛ lɛ, kɛkɛ ni Yosef bɔi yaafo. Wɔbaanyɛ wɔna bɔ ni enyɛmimɛi hii lɛ anaa baakpɛ amɛhe aha, ejaakɛ amɛleee nɔ hewɔ ni efóɔ lɛ. Yɛ naagbee lɛ, ekɛɛ amɛ akɛ: ‘Mi ji Yosef. Ani mipapa yɛ wala mli lolo?’

Enyɛmimɛi hii lɛ anaa kpɛ amɛhe aahu akɛ amɛnyɛɛɛ amɛwie. Amɛmiishe gbeyei. Shi Yosef kɛɛ: ‘Nyɛfainɛ nyɛtsia nyɛbɛŋkɛa.’ Beni amɛfee nakai lɛ, ekɛɛ amɛ akɛ: ‘Mi ji Yosef, nyɛnyɛmi nuu lɛ ni nyɛhɔ̃ɔ lɛ kɛtee Mizraim lɛ.’

Yosef tee nɔ ekɛ amɛ wie yɛ mlihilɛ mli akɛ: ‘Nyɛkashwaa nyɛhe akɛ nyɛhɔ̃ɔ mi kɛba biɛ. Nyɔŋmɔ diɛŋtsɛ ji mɔ ni tsu mi kɛba Mizraim koni ahere gbɔmɛi ayiwala. Farao efee mi shikpɔŋ lɛ fɛɛ nɔyelɔ. No hewɔ lɛ nyɛhe afea oya ni nyɛyaa mipapa ŋɔɔ ni nyɛyakɛa lɛ nibii nɛɛ fɛɛ. Ni nyɛkɛa lɛ akɛ eba ni ebahi biɛ.’

Kɛkɛ ni Yosef kɛ enine fɔ̃ enyɛmimɛi hii lɛ akuɛ, ni efua amɛ, ni eshɔshɔɔ amɛ fɛɛ amɛnaa. Beni Farao nu akɛ Yosef nyɛmimɛi hii lɛ eba lɛ, ekɛɛ Yosef akɛ: ‘Ha ni amɛkɛ shwiilii aya ni amɛyaŋɔ amɛ papa kɛ amɛwekumɛi lɛ ni amɛku amɛsɛɛ kɛba biɛ. Maha amɛ shikpɔŋ ni hi fe fɛɛ yɛ Mizraim.’

Ni amɛfee nakai. Oona ni Yosef miikpee epapa atuu beni ekɛ eweku muu lɛ fɛɛ baa Mizraim lɛ.

Yakob weku lɛ eda agbo diɛŋtsɛ. Beni amɛfã kɛba Mizraim lɛ, no mli lɛ Yakob bii kɛ enabii lɛ fɛɛ ayibɔ ji mɛi 70. Shi ŋamɛi lɛ hu fata he, kɛ ekolɛ tsuji babaoo hu. Mɛnɛɛmɛi fɛɛ bahi Mizraim. Atsɛɔ amɛ Israelbii, ejaakɛ Nyɔŋmɔ etsake Yakob gbɛi efee lɛ Israel. Israelbii lɛ batsɔmɔ gbɔmɛi krɛdɛɛ amɛha Nyɔŋmɔ, taakɛ wɔbaana yɛ sɛɛ mli lɛ.

1 Mose 45:1-28; 46:1-27.

Yosef kɛ eweku lɛ


Sanebimɔi

  • Mɛni ba be ni Yosef jie ehe kpo etsɔɔ enyɛmimɛi lɛ?
  • Mɛni Yosef kɛ mlihilɛ tsɔɔ mli eha enyɛmimɛi lɛ?
  • Mɛni Farao wie be ni enu Yosef nyɛmimɛi lɛ ahe lɛ?
  • Te Yakob weku lɛ dalɛ yɔɔ ha tɛŋŋ be ni amɛfã kɛba Mizraim lɛ?
  • Mɛɛ gbɛi akɛwo Yakob weku lɛ, ni mɛni hewɔ?

Sanebimɔi ni fata he

  • Kanemɔ 1 Mose 45:1-28.

    Mɛɛ gbɛ nɔ Biblia mli sane ni kɔɔ Yosef he lɛ tsɔɔ akɛ, Yehowa baanyɛ atsake nɔ ni ato afɔ shi ni akɛbaaye etsuji awui lɛ koni efee nɔ kpakpa? (1 Mose 45:5-8; Yes. 8:10; Fil. 1:12-14)

  • Kanemɔ 1 Mose 46:1-27.

    Mɛɛ nɔmimaa Yehowa kɛha Yakob be ni eyaa Mizraim lɛ? (1 Mose 46:1-4)